ជប៉ុន-អាស៊ាន រំពឹងនឹងព្រមព្រៀងលើកិច្ចសហប្រតិបត្តិការសន្តិសុខ ជាពិសេសសកម្មភាពរបស់ ចិន

ប្រទេសជប៉ុន និងសមាគមប្រជាជាតិអាស៊ីអាគ្នេយ៍រំពឹងនឹងឈានដល់កិច្ចព្រមព្រៀងពង្រឹងកិច្ចសហប្រតិបត្តិការសន្តិសុខក្នុងកិច្ចប្រជុំកំពូលពិសេសនៅទីក្រុងតូក្យូនាថ្ងៃសៅរ៍ ទី១៦ ខែធ្នូ ស្របពេលដែលមានការកើនឡើងនៃសកម្មភាពដែនសមុទ្ររបស់ប្រទេសចិន ។

ទន្ទឹមនោះ កិច្ចប្រជុំកំពូលដែលមានរយៈពេល ៣ ថ្ងៃនេះក៏ត្រូវបានរៀបចំឡើងដើម្បីរំឭកខួបលើកទី ៥០ នៃទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសជប៉ុន និងអាស៊ានផងដែរ ។

ស្របពេលជាមួយគ្នានេះ ឯកសារព្រាងនៃសេចក្ដីថ្លែងការណ៍ក្នុងកិច្ចប្រជុំកំពូលនោះក៏បង្ហាញពីចក្ខុវិស័យរួមរបស់ថ្នាក់ដឹកនាំនៃសសរស្ដម្ភទាំងបី រួមទាំងការលើកកម្ពស់ការផ្លាស់ប្ដូរតជំនាន់ ខណៈស្ដីពីសន្តិភាព និងស្ថិរភាពវិញ ភាគីពាក់ព័ន្ធទាមទារឲ្យ “ពង្រឹងកិច្ចសហប្រតិបត្តិការសន្តិសុខ រួមទាំងកិច្ចសហប្រតិបត្តិការសន្តិសុខដែនសមុទ្រ” ផងដែរ ។

ពាក់ព័ន្ធនឹងបញ្ហានេះដែរ ​វាទំនង​ជា​​ការ​ឆ្លើយ​តប​ទៅ​នឹង​សកម្មភាព​បោះ​ជំហានឆ្ពោះទៅមុខ​របស់ប្រទេស​ចិន​នៅ​សមុទ្រ​ចិន​ខាង​ត្បូង ស្របពេលដែលនៅ​ផ្នែក​ខ្លះនៃដែនទឹកមួយនេះកំពុងមាន​ជម្លោះ ។

សេចក្ដីថ្លែងការណ៍នៃផែនការអនុវត្តនោះ ក៏បានអំពាវនាវឲ្យមានកិច្ចសហប្រតិបត្តិការកាន់តែខ្លាំងឡើងសម្រាប់ការកសាងសមត្ថភាពដែនសមុទ្រ ហើយជម្លោះគួរតែត្រូវបានដោះស្រាយតាមរយៈ “មធ្យោបាយសន្តិភាព ដោយមិនប្រើការគំរាមកំហែង ឬការប្រើប្រាស់កម្លាំង ស្របតាមគោលការណ៍ទទួលស្គាល់ជាសកលនៃច្បាប់អន្តរជាតិ” ។

បន្ថែមពីនេះ សេចក្ដីថ្លែងការណ៍នោះក៏អំពាវនាវឲ្យមានកិច្ចសហប្រតិបត្តិការបន្ថែមទៀត ដើម្បីលុបបំបាត់ឧក្រិដ្ឋកម្មឆ្លងដែន ចំពេលមានការកើនឡើងនៃករណីក្លែងបន្លំឆ្លងព្រំដែន ខណៈសន្តិសុខ​តាម​ប្រព័ន្ធ​អ៊ីនធឺណិតក៏ត្រូវ​បាន​​លើក​យកពិភាក្សាដូចគ្នា ហើយជប៉ុន និងអាស៊ានក៏នឹងរួមគ្នាដាក់របាយការណ៍ស្តីពីវឌ្ឍនភាពដែលភាគីទាំងពីរសម្រេចធ្វើបាន នៅក្នុងកិច្ចប្រជុំកំពូលប្រចាំឆ្នាំមួយនេះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចម្លើយសារភាពរបស់សមាជិកក្រុមហាម៉ាស ដែលលើកទង់ ស សុំចុះចាញ់ អ៊ីស្រាអែល