គណៈប្រតិភូ អាមេរិក ហោះទៅ តៃវ៉ាន់ បង្ហាញការគាំទ្រពេញទំហឹងដល់មេ​ដឹកនាំជាប់ឆ្នោតថ្មី

បន្ទាប់ពីលោក Lai Ching-te ឈ្នះឆ្នោតជាប្រធានាធិបតីរបស់តៃវ៉ាន់ជាផ្លូវការហើយនោះ រដ្ឋាភិបាលទីក្រុងវ៉ាស៊ីនតោនបានបញ្ជូនអតីតមន្ត្រីគណៈប្រតិភូទៅកាន់ទីក្រុងតៃប៉ិដើម្បីបង្ហាញសញ្ញាគាំទ្រពេញទីចំពោះដែនកោះប្រជាធិបតេយ្យដែលកំពុងស្ថិតក្រោមការសម្លុតពីសំណាក់ប្រទេសចិន ។ នេះបើយោងតាមការចុះផ្សាយដោយសារព័ត៌មានជប៉ុន Nikkei Asia ។

គណៈប្រតិភូអាមេរិកដែលជួបជាមួយលោក Lai និងប្រធានាធិបតីផុតអាណត្តិលោកស្រី Tsai Ing-wen នៅថ្ងៃចន្ទនេះរួមមាន លោក Stephen Hadley អតីតទីប្រឹក្សាសន្តិសុខជាតិអាមេរិកពីឆ្នាំ ២០០៥ ដល់ឆ្នាំ ២០០៩ ក្រោមការកាន់អំណាចរបស់អតីតប្រធានាធិបតីលោក George Bush, អតីតអនុរដ្ឋមន្ត្រីការបរទេសលោក James Steinberg និងលោកស្រី Laura Rosenberger ជានាយកជាន់ខ្ពស់ទទួលបន្ទុកកិច្ចការចិន និងតៃវ៉ាន់ប្រចាំនៅទីក្រុងវ៉ាស៊ីតោន ។

ក្នុងបេសកកម្មលើកនេះដែរ លោក Hadley បាននិយាយថា សហរដ្ឋអាមេរិកកំពុងទន្ទឹងរង់ចាំកិច្ចការបន្តទំនាក់ទំនង តៃវ៉ាន់-អាមេរិក ក្រោមការដឹកនាំរបស់រដ្ឋាភិបាលថ្មី ជាពិសេសគឺការធ្វើការងាររួមគ្នាដើម្បីការពារសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ។

អតីតទីប្រឹក្សាសន្តិសុខជាតិរូបនេះបានប្រាប់លោកស្រី Tsai ថា “លទ្ធិប្រជាធិបតេយ្យរបស់តៃវ៉ាន់ គឺជាគំរូដ៏ភ្លឺស្វាងសម្រាប់ពិភពលោក និងជាជោគជ័យនៃលទ្ធិប្រជាធិបតេយ្យដោយផ្អែកលើតម្លាភាព នីតិរដ្ឋ ការគោរពសិទ្ធិមនុស្ស និងសេរីភាព ។ ខ្ញុំរីករាយដែលមានឱកាសជួបជាមួយលោកស្រីប្រធានាធិបតី Tsai ដើម្បីបញ្ជាក់ជាថ្មីថា ការប្តេជ្ញាចិត្តរបស់សហរដ្ឋអាមេរិកចំពោះតៃវ៉ាន់គឺរឹងមាំ មានគោលការណ៍ និងទ្វេភាគី ហើយសហរដ្ឋអាមេរិកនឹងឈរជាមួយមិត្តរបស់យើងមួយនេះ” ។

ចំណែកយោងតាមប្រព័ន្ធផ្សព្វផ្សាយតៃវ៉ាន់ Focus Taiwan បានចុះផ្សាយផងដែរថា អតីតមន្ត្រីទាំងនោះបានហោះទៅដល់ទីក្រុងតៃប៉ិកាលពីល្ងាចថ្ងៃអាទិត្យ ពោលមួយថ្ងៃ បន្ទាប់ពីគណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាចឈ្នះឆ្នោតអាណត្តិប្រធានាធិបតី ៣ លើកជាប់គ្នាមិនធ្លាប់មានពីមុនមក ។

គួរបញ្ជាក់ថា លោក Lai Ching-te ត្រូវបានពលរដ្ឋផ្ដល់សេចក្ដីទុកចិត្តបោះឆ្នោតឲ្យឈ្នះតំណែងជាប្រធានាធិបតីក្នុងសំឡេងគាំទ្រជិត ៥.៦ លានសំឡេង ឬ ៤០ ភាគរយនៃសំឡេងឆ្នោតបានការ ប៉ុន្តែបក្សកំពុងកាន់អំណាចមួយនេះបានចាញ់សំឡេងឆ្នោតនៅក្នុងអាសនៈសភា ពោលទទួលបានត្រឹម ៥១ អាសនៈប៉ុណ្ណោះក្នុងចំណោម ១១៣ អាសនៈ ខណៈគណបក្ស Kuomintang (KMT) រកបាន ៥២ អាសនៈ ៕

ដោយ ៖ សុខ ជីវ័ន្ត

ចុចអាន ៖ អាមេរិក និងចិន ប្រតិកម្មយ៉ាងណាខ្លះ បន្ទាប់ពី តៃវ៉ាន់ ជ្រើសរើសបាន ប្រធានាធិបតីថ្មី