បេសកជនសិទ្ធិមនុស្ស UN បង្ហាញថា បើគ្មានអ្នកផ្ដល់សព្វាវុធ យោធា មីយ៉ាន់ម៉ា​ នឹងទន់ខ្សោយ

បេសកជនសិទ្ធិមនុស្សរបស់អង្គការសហប្រជាជាតិ លោក Tom Andrews បាននិយាយនៅថ្ងៃចន្ទ ទី២៩ ខែមករា នេះថា យោធារបស់មីយ៉ាន់ម៉ាកាន់តែ មានភាពទន់ខ្សោយទៅៗ អស់ជាច្រើនខែមកហើយ ប៉ុន្តែវានៅតែធ្វើឱ្យមានបញ្ហាកាន់តែច្រើនសម្រាប់ប្រជាជនមីយ៉ាន់ម៉ា ប្រសិនបើមិនមានដំណោះស្រាយ។

លោកបានកត់សម្គាល់ ថា ចាប់តាំងពីខែតុលាមក យោធាក្នុងប្រទេសមីយ៉ាន់ម៉ា បានបាត់បង់ទាហានជាង ៤ពាន់នាក់ ដែលបានចុះចាញ់ ឬរត់ចោលស្រុក ហើយយោធាក៏បានបាត់បង់ទឹកដីដែលខ្លួនធ្លាប់គ្រប់គ្រងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសមីយ៉ាន់ម៉ា លោក Andrews បានប្រាប់ CNA ថា ចាប់តាំងពីរដ្ឋប្រហារជិតបីឆ្នាំមុនមក មានមនុស្ស ២.៣ លាននាក់ត្រូវបានផ្លាស់ទីលំនៅ ហើយមនុស្ស ១៨.៦ លាននាក់ផ្សេងទៀត ត្រូវការជំនួយមនុស្សធម៌យ៉ាងខ្លាំង ។ លោកបន្តថា កាលពីឆ្នាំមុន កុមារមីយ៉ាន់ម៉ាជាង ១ម៉ឺននាក់ បានស្លាប់ដោយសារកង្វះអាហារូបត្ថម្ភក្នុងកម្រិតមួយដ៏ធ្ងន់ធ្ងរ។

ពាក់ព័ន្ធទៅនឹង ការយល់ឃើញរបស់លោក Andrews ទៅនឹងស្ថានភាពរបស់ មីយ៉ាន់ម៉ា ទៅពេលអនាគត លោកថា គោលដៅរបស់មេដឹកនាំយោធាមីយ៉ាន់ម៉ា លោក Min Aung Hlaing គឺដើម្បីបន្តកាន់អំណាច ហើយទាមទារឱ្យមានអ្នកទទួលស្គាល់ភាពស្របច្បាប់របស់គាត់ ទាំងលុយកាក់ និងអាវុធ។ លោក​ Andrews បាន​កត់​សម្គាល់​ថា ប្រភព​អាវុធ​លេខ​មួយ​សម្រាប់​របប​យោធា​មីយ៉ាន់ម៉ា គឺ​រុស្ស៊ី។

បេសកជនសិទ្ធិមនុស្សរបស់អង្គការសហប្រជាជាតិ រូបនេះ ​បាន​បន្ត​ថា ទោះ​ជា​យ៉ាង​ណាក៏ដោយសព្វថ្ងៃនេះ មាន​ប្រទេស​ផ្សេង​ៗ ​កំពុង​កាត់​បន្ថយ​ការ​ផ្គត់ផ្គង់​សព្វាវុធ និង​ប្រាក់​ទៅឱ្យ​យោធា​លោក Min Aung Hlaing យ៉ាងខ្លាំង ដូច្នេះសម្រាប់របាយការណ៍នាពេលខាងមុខ បានបង្ហាញថា របបយោធានឹងកាន់តែទន់ខ្សោយ ។

លោក Andrews និយាយយ៉ាងដូច្នេះថា “ប្រជាជនមីយ៉ាន់ម៉ាបានធ្វើការងារមិនគួរឱ្យជឿក្នុងការធ្វើការដើម្បីយុត្តិធម៌ និងសិទ្ធិមនុស្ស សម្រាប់អនាគតប្រទេសរបស់ពួកគេ ប៉ុន្តែពួកគេត្រូវការសហគមន៍អន្តរជាតិដើម្បីឈរជាមួយ។ ​វិធី​ដ៏​ល្អ​បំផុត​ដែល​យើង​អាច​ធ្វើ​បាន​គឺ​ព្យាយាម​បញ្ឈប់​លំហូរចូល​នៃ​អាវុធ និង​ធនធាន​ដែល​យោធា ​ត្រូវ​ការ​ដើម្បី​ទ្រទ្រង់​ខ្លួន​ឯង” ៕

ដោយ ៖​ ប៉ោ កុសល