ចំណាប់ខ្មាំង២នាក់ ដែលអ៊ីស្រាអែល ទើបរំដោះបាន សុទ្ធជាមនុស្សចាស់

យោងតាម Reuters, ប្រទេសអ៊ីស្រាអែល បានបញ្ជាក់ពីការរំដោះចំណាប់ខ្មាំងពីរនាក់ ក្នុងប្រតិបត្តិការវាយឆ្មក់នៅទីក្រុង Rafah ហើយអ្នកទាំងពីរមានឈ្មោះ Fernando Simon Marman (អាយុ៦០ឆ្នាំ) និង Louis Har (អាយុ៧០)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធា​អ៊ីស្រាអែលអះអាង​ថា ជនជាតិខ្លួន​ទាំង​ពីរ​នាក់នេះ ​មាន​សុខភាព​ល្អ​ ហើយការសង្គ្រោះ បានកើតឡើងចំពេលមានសេចក្តីរាយការណ៍អំពីការវាយប្រហារអាកាសទ្រង់ទ្រាយធំ នៅទីក្រុងភាគខាងត្បូងហ្គហ្សាមួយនេះ។

ក្នុងសេចក្តីថ្លែងការណ៍មួយលើបណ្តាញសង្គម, កងកម្លាំងការពារអ៊ីស្រាអែល (IDF) និយាយថា ក្នុងអំឡុងប្រតិបត្តិការរួមគ្នាពេលយប់រវាង IDF, ISA (ទីភ្នាក់ងារសន្តិសុខអ៊ីស្រាអែល ឬគេហៅថា Shin Bet) និងប៉ូលិសអ៊ីស្រាអែល, ចំណាប់ខ្មាំងអ៊ីស្រាអែលពីរនាក់មកពី Kibbutz Nir Yitzhak ត្រូវបានជួយសង្គ្រោះ។

ក្រោយរំដោះបាន ចំណាប់ខ្មាំងទាំងពីរ ត្រូវ​នាំ​ទៅ​មន្ទីរពេទ្យ Sheba នៅ​ភាគ​កណ្តាល​ប្រទេស​អ៊ីស្រាអែល​ដើម្បី​ធ្វើ​តេស្ត។

ទន្ទឹមនោះ រដ្ឋមន្ត្រីការពារជាតិអ៊ីស្រាអែល Yoav Gallant បានប្រកាសថា រដ្ឋាភិបាលនឹងធ្វើគ្រប់បែបយ៉ាង ដើម្បីរំដោះចំណាប់ខ្មាំងមកវិញទាំងអស់ ទោះប្រើវិធីអ្វីក៏ដោយ។

ការវាយឆ្មក់ជួយសង្គ្រោះនៅទីក្រុង Rafah កើតឡើងភ្លាមៗ បន្ទាប់ពីសាក្សីក្នុងទីក្រុង រៀបរាប់អំពីការវាយប្រហារអាកាស ច្រើនយប់នៅភាគខាងជើង និងកណ្តាលទីក្រុង។ មានពលរដ្ឋម្នាក់ប្រាប់ទៅ BBC ថា ឧទ្ធម្ភាគចក្រ និងអូប័រ ក៏ចូលរួមក្នុងការវាយប្រហារនេះដែរ។

សូមបញ្ជាក់ជាថ្មី យោធាអ៊ីស្រាអែលបានចាប់ផ្តើមប្រតិបត្តិការរបស់ខ្លួននៅតំបន់ហ្គាហ្សាស្ទ្រីប បន្ទាប់ពីមនុស្សជាង១២០០នាក់ ត្រូវបានខ្មាន់កាំភ្លើងក្រុមហាម៉ាស់ សម្លាប់នៅភាគខាងត្បូងប្រទេស កាលពីថ្ងៃទី៧ខែតុលា ហើយចាប់មនុស្សប្រហែល ២៤០នាក់ទៀតជាចំណាប់ខ្មាំង៕

អត្ថបទ៖ សុខ សុវណ្ណ

ចុចអាន៖ ក្រុមហាម៉ាសព្រមានថា ចំណាប់ខ្មាំង នឹងគ្មានជីវិតចេញពីតំបន់ហ្គាហ្សា ឡើយ