ស្លាប់មនុស្ស ៨ នាក់ក្នុងហេតុការណ៍ក្រឡាប់នាវាដឹកប្រេងដោតទង់ជាតិ កូរ៉េខាងត្បូង នៅសមុទ្រ ជប៉ុន

សមាជិកនាវិក ៨ នាក់បានស្លាប់ បន្ទាប់ពីនាវាដឹកប្រេងដោតទង់ជាតិកូរ៉េខាងត្បូងដែលបានបោះយុថ្កានៅឆ្នេរសមុទ្រនៃកោះ Mutsure ខេត្ត Yamaguchi របស់ជប៉ុនបានក្រឡាប់កាលពីថ្ងៃពុធ ។ នេះបើយោងតាមការចេញផ្សាយរបស់សារព័ត៌មាន Japan Time នៅថ្ងៃទី២១​ ខែមីនានេះ ។

សមាជិកនាវិកម្នាក់បានស្នើសុំជំនួយនៅម៉ោងប្រហែល ៧ និង ០៥ ព្រឹក ដោយរាយការណ៍ថា កប៉ាល់កំពុងក្រឡាប់ ខណៈនាវាដឹកនេះផ្ទុកទៅដោយអាស៊ីតអាគ្រីលីកប្រហែល ៩៨០ តោន និងនាវិក ១១ នាក់ ក្នុងនោះមានជនជាតិឥណ្ឌូណេស៊ី ៨ នាក់ កូរ៉េខាងត្បូង ២ នាក់ និងចិនម្នាក់ ហើយមកដល់ពេលនេះមិនទាន់មានការបញ្ជាក់ថាមានការកំពប់ប្រេងនៅឡើយទេ ។

យោងតាមឆ្មាំឆ្នេរសមុទ្រជប៉ុនបានឲ្យដឹងថា ដំបូងឡើយសមាជិកនាវិកបរទេស ៩ នាក់ត្រូវបានស្រង់ចេញពីផ្ទៃទឹក និងបញ្ជូនទៅមន្ទីពេទ្យ ប៉ុន្តែក្រោយមកមនុស្ស ៨ នាក់ក្នុងចំណោម ៩ នាក់នោះត្រូវគេរាយការណ៍ថាស្លាប់ ខណៈក្រុមអ្នកជួយសង្គ្រោះនៅតែបន្តស្វែងរកសមាជិក ២ នាក់ទៀតដែលបាត់ខ្លួននៅឡើយ ។

រហូតមកដល់ពេលនេះ ក្រសួងធនធានទឹក និងឧតុនិយម ក៏បានចេញសេចក្តីជូនដំណឹងស្តីពីខ្យល់បក់បោកខ្លាំង និងរលកខ្ពស់ៗផងដែរគិតត្រឹមថ្ងៃព្រហស្បតិ៍នេះ ៕

អត្ថបទ ៖ ប៊ុន សុភាព