មីស៊ីលអ៊ីរ៉ង់ ៣៥០គ្រាប់ហោះចូលអ៊ីស្រាអែល គឺជា “ការប្រកាសសង្គ្រាម”

ក្រោយមីស៊ីល៣៥០គ្រាប់​ ហោះចូលប្រទេសអ៊ីស្រាអែលក្នុងការសងសឹក របស់អ៊ីរ៉ង់, ពេលនេះ រដ្ឋាភិបាលទីក្រុងហ្ស៊េរុយសាឡិមបានប្រាប់សារព័ត៌មាន Sky News ថា ខ្លួនចាត់ទុកនោះគឺជាការប្រកាសសង្គ្រាម ហើយបានអនុម័តផែនការដើម្បីវាយលុកនិងការពារខ្លួនរួចហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ប្រធានាធិបតីអ៊ីស្រាអែល លោក Isaac Herzog គូសបញ្ជាក់ថា ខ្លួនមិនចង់ច្បាំងសង្រ្គាមទេ ប៉ុន្តែលើកឡើងថា ពួកគេនឹងសងសឹក បន្ទាប់ពីការវាយប្រហារតាមផ្លូវអាកាស មិនញញើតរបស់អ៊ីរ៉ង់កាលពីព្រឹកថ្ងៃអាទិត្យទី១៤ខែមេសា។

លោកថែមទាំងប្រកាសទៀតផងថា “ដល់ពេលហើយដែលពិភពលោក ត្រូវប្រឈមមុខនឹងចក្រភពបិសាចនៅក្នុងទីក្រុងតេហេរ៉ង់ ហើយបញ្ជាក់យ៉ាងច្បាស់ថា អាកប្បកិរិយារបស់ពួកគេមិនអាចទទួលយកបានឡើយ”។

មុនការវាយប្រហារនេះ ទីក្រុងតេហេរ៉ង់ ក៏បានជូនដំណឹងម្តងហើយម្តងទៀតដែរថា ខ្លួននឹងសងសឹកចំពោះការវាយប្រហារតាមអាកាសលើស្ថានកុងស៊ុលរបស់ខ្លួននៅទីក្រុងដាម៉ាសនៃ ប្រទេសស៊ីរី ដែលបានសម្លាប់ឧត្តមសេនីយ៍កំពូលអ៊ីរ៉ង់ពីររូប កាលពីដើមខែនេះ។

យ៉ាងណា ឧត្តមនាវីឯករបស់កងកម្លាំងការពារខ្លួនអ៊ីស្រាអែល (IDF) លោក Daniel Hagari បានចោទប្រកាន់អ៊ីរ៉ង់ថា ព្យាយាមបញ្ឆេះភ្លើងសង្គ្រាមនៅតំបន់មជ្ឈិមបូព៌ានិងបង្កើនភាពតានតឹងក្នុងតំបន់ ដោយការបាញ់បង្ហោះយន្តហោះគ្មានមនុស្សបើកអត្តឃាត៦០តោន, មីស៊ីល និងគ្រាប់រ៉ុកកែត មកលើប្រទេសអ៊ីស្រាអែល។

ស្របពេលជាមួយគ្នានោះដែរ អ្នកនាំពាក្យ IDF អះអាងថា ផែនការរបស់អ៊ីរ៉ង់ត្រូវបរាជ័យ ហើយលោកបានសរសើរការឆ្លើយតបពី “សម្ព័ន្ធភាពក្នុងតំបន់” ដែលបានជួយស្ទាក់ចាប់មីស៊ីលបាន៩៩%។

ទន្ទឹមនេះ មេដឹកនាំក្រុមប្រទេស G7 ក៏ជួបពិភាក្សាគ្នាកាលពីថ្ងៃអាទិត្យផងដែរ ដោយថ្នាក់ដឹក​នាំទាំងអស់បានថ្កោលទោសយ៉ាងដាច់អហង្ការ ចំពោះទង្វើរបស់អ៊ីរ៉ង់លើអ៊ីស្រាអែល ហើយព្រមានត្រូវចៀសឲ្យផុត ចំពោះហានិភ័យនៃសង្គ្រាមក្នុងតំបន់ដែលមិនអាចគ្រប់គ្រងបាន។

នៅក្នុងសេចក្តីថ្លែងការណ៍រួម បន្ទាប់ពីការកោះប្រជុំជាបន្ទាន់នោះ, ប្រទេសទាំងអស់និយាយថា ពួកគេត្រៀមខ្លួនរួចជាស្រេចដើម្បីចាត់វិធានការបន្ថែមទៀត និងឆ្លើយតបទៅនឹងគំនិតផ្តួចផ្តើមដែលធ្វើឲ្យមានអស្ថិរភាពបន្ថែមទៀត៕

អត្ថបទ៖ សុខ សុវណ្ណ

ចុចអាន៖ មេដឹកនាំ G7 នឹងជួបគ្នារឿងការវាយប្រហាររបស់អុីរ៉ង់លើអុីស្រាអែល