ព័ត៌មានអន្ដរជាតិ

មេដឹកនាំ G7 នឹងជួបគ្នារឿងការវាយប្រហាររបស់អ៉ីរ៉ង់លើអ៉ីស្រាអែល

បានផុស

២ years មុន

នៅ

ថ្ងៃអាទិត្យ ១៤ មេសា ២០២៤

ដោយ

មេដឹកនាំក្រុមប្រទេសមហាអំណាចទាំង៧ (G7) នឹងធ្វើការសម្របសម្រួលដើម្បីចេញការឆ្លើយតបផ្លូវទូតរួមគ្នាមួយចំពោះការវាយប្រហារដ៏សាហាវរបស់ប្រទេសអ៉ីរ៉ង់លើប្រទេសអ៉ីស្រាអេល។ នេះជាសំដីរបស់លោក ចូ បៃដិន ប្រធានាធិបតីសហរដ្ឋអាមេរិក។

មេដឹកនាំក្រុមប្រទេស G7 នឹងជួបប្រជុំគ្នាតាមរយៈវីដេអូអនឡាញមួយនៅល្ងាចថ្ងៃអាទិត្យនេះ ដើម្បីសម្របសម្រួលពីការឆ្លើយតបរួមគ្នាមួយចំពោះការវាយប្រហាររបស់អ៉ីរ៉ង់លើអ៉ីស្រាអែល ដែលបានក្លាយជាការគំរាមកំហែងកាន់តែរាលដាលនៅមជ្ឈិមបូព៌ា។

នាយករដ្ឋមន្ត្រីអ៉ីតាលី លោក Giorgia Meloni បាននិយាយក្នុងសេចក្តីថ្លែងការណ៍មួយថា ប្រទេសអ៉ីតាលី ដែលជាប្រធាន G7 នឹងរៀបចំកិច្ចប្រជុំនៅល្ងាចថ្ងៃអាទិត្យនេះ (១៤ ខែមេសា)។

លោក Meloni រួមជាមួយមេដឹកនាំអន្តរជាតិជាច្រើនទៀតបានធ្វើការថ្កោលទោសចំពោះការវាយប្រហាររបស់អ៉ីរ៉ង់កាលពីយប់ថ្ងៃសៅរ៍។ រដ្ឋាភិបាលទីក្រុងតេអេរ៉ង់បានបើកការប្រហារសងសឹកដោយគ្រាប់មីស៊ីល និងយន្តហោះគ្មានមនុស្សជិះរាប់រយដើម្បីជាការសងសឹកទៅនឹងអ៉ីស្រាអែលដែលបានវាយប្រហារលើស្ថានទូតអ៉ីរ៉ង់នៅទីក្រុងដាម៉ាស ប្រទេសស៊ីរី កាលពីថ្ងៃទី១ ខែមេសា ឆ្នាំ២០២៤។

ការវាយប្រហារសងសឹកនេះបានជំរុញឲ្យមានការព្រួយបារម្ភយ៉ាងខ្លាំងអំពីជម្លោះកាន់តែរាលដាលនៅក្នុងតំបន់។

ប្រធានាធិបតីសហរដ្ឋអាមេរិក លោក ចូ បៃដិន បានហៅការវាយប្រហារនេះជា«ការវាយប្រហារផ្លូវការអាកាសមិនធ្លាប់មាន»លើបន្ទាយទាហានក្នុងប្រទេសអ៉ីស្រាអែល។ លោកបានបញ្ជាក់ថា មេដឹកនាំ G7 នឹងសម្របសម្រួលចេញ«ការឆ្លើយតបការទូតរួមគ្នាមួយ» ហើយសហរដ្ឋអាមេរិកនឹងនៅជិតស្និទ្ធជាមួយមេដឹកនាំអ៉ីស្រាអែល។

ទាហានអ៉ីស្រាអែលបានឲ្យដឹងថា អ៉ីរ៉ង់បានបាញ់មីស៊ីល និងយន្តហោះគ្មានមនុស្សជិះជាង៣០០លើអ៉ីស្រាអែល ប៉ុន្តែ៩៩%ត្រូវបានស្ទាក់ចាប់ និងបាញ់ទម្លាក់។

ក្រុមប្រទេស G7 គឺសហរដ្ឋអាមេរិក កាណាដា អ៉ីតាលី អង់គ្លេស បារាំង អាល្លឺម៉ង់ និងជប៉ុន៕

ប្រែសម្រួល៖ វីរបុត្រ
ប្រភព៖ POLITICO