កូរ៉េខាងត្បូង ជប៉ុន ចិន នឹងរៀបចំកិច្ចប្រជុំកំពូលត្រីភាគីលើកដំបូង ចាប់តាំងពីឆ្នាំ ២០១៩

មេដឹកនាំកូរ៉េខាងត្បូង ចិន និងជប៉ុននៅសប្ដាហ៍ក្រោយនេះនឹងរៀបចំកិច្ចប្រជុំកំពូលត្រីភាគីជាលើកដំបូងក្នុងរយៈពេលជិត ៥ ឆ្នាំ ចាប់តាំងពីឆ្នាំ ២០១៩ នៅក្នុងទីក្រុងសេអ៊ូល ។ ​នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៤ ខែឧសភាននេះ ។

ក្នុងនោះប្រធានាធិបតីកូរ៉េខាងត្បូងលោក Yoon Suk Yeol នឹងជួបជាមួយនាយករដ្ឋមន្ត្រីចិនលោក Li Qiang និងនាយករដ្ឋមន្ត្រីជប៉ុនលោក Fumio Kishida នៅរដ្ឋធានីកូរ៉េខាងត្បូងនៅថ្ងៃចន្ទសប្ដាហ៍ក្រោយ ដោយលោក Yoon នឹងធ្វើកិច្ចពិភាក្សាទ្វេភាគីដាច់ដោយឡែកជាមួយ Li និង Kishida នៅថ្ងៃអាទិត្យ ហើយមេដឹកនាំទាំងបីក៏គ្រោងនឹងចូលរួមកិច្ចប្រជុំកំពូលស្ដីពីធុរកិច្ច និងលើកទឹកចិត្តដល់អ្នកជំនួញមកពីប្រទេសទាំងបីផងដែរ ។

គួរបញ្ជាក់ថា លើកចុងក្រោយដែលមេដឹកនាំនៃប្រទេសទាំងបីបានជួបគ្នាគឺនៅឆ្នាំ ២០១៩ ហើយការខកខានកន្លងមកនេះ គឺដោយសារតែជំងឺរាតត្បាតកូវីដ ១៩ រួមជាមួយជម្លោះការទូត និងប្រវត្តិសាស្ត្ររវាងកូរ៉េខាងត្បូង និងអតីតមេដឹកនាំអាណានិគមជប៉ុនផងដែរ ។

បើងាកមកមើលពីប្រវត្តិសាស្រ្តកូរ៉េ និងជប៉ុន ជម្លោះផ្លូវច្បាប់លើការគ្រប់គ្រងឆ្នាំ ១៩១០ ដល់ឆ្នាំ ១៩៤៥ របស់ប្រទេសជប៉ុនលើឧបទ្វីបកូរ៉េនៅតែបន្តកើតមានរវាងប្រទេសទាំងពីរ ។ ប៉ុន្តែដោយសារការគំរាមកំហែងកាន់តែខ្លាំងឡើងដែលបង្កឡើងដោយក្រុងព្យុងយ៉ាង កូរ៉េខាងត្បូងបានកប់ស្នាមប្រវតិ្តសាស្រ្តជាមួយប្រទេសជប៉ុន និងពង្រឹងទំនាក់ទំនងជាមួយជប៉ុនដែលជាសម្ព័ន្ធមិត្តដ៏យូរអង្វែងរបស់ទីក្រុងវ៉ាស៊ីនតោនវិញ ។

ខណៈប្រទេសចិនដែលជាដៃគូពាណិជ្ជកម្មដ៏ធំបំផុតរបស់កូរ៉េខាងត្បូង ប៉ុន្តែចិនក៏នៅតែជាដៃគូសេដ្ឋកិច្ចដ៏សំខាន់បំផុតរបស់កូរ៉េខាងជើង និងជាសម្ព័ន្ធមិត្តការទូតផងដែរ ។ កិច្ចប្រជុំកំពូលនាពេលខាងមុខនេះក៏ជាការកត់សម្គាល់ឃើញថាគឺជាដំណើរទស្សនកិច្ចលើកដំបូងរបស់លោក Li ទៅកាន់កូរ៉េខាងត្បូងផងដែរ ចាប់តាំងពីចូលកាន់តំណែងជានាយករដ្ឋមន្ត្រីចិនក្នុងខែមីនា ឆ្នាំ២០២៣ ៕

អត្ថបទ៖ ប៊ុន សុភាព