ព័ត៌មានអន្ដរជាតិ

ប្រធានាធិបតីឆែក ជួបគ្រោះថ្នាក់ ពេលកំពុងជិះម៉ូតូប្រណាំងគ្នា

បានផុស

៦ ថ្ងៃ មុន

នៅ

ថ្ងៃសុក្រ ២៤ ឧសភា ២០២៤

ដោយ

ប្រធានាធិបតីឆែក លោក Petr Pavel ត្រូវបានបញ្ជូនទៅមន្ទីរពេទ្យ ក្រោយរងរបួស ខណៈពេលកំពុងជិះម៉ូតូប្រណាំងគ្នា។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី២៤ ខែឧសភា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យប្រធានាធិបតីសាធារណរដ្ឋឆែក បានឲ្យដឹងថា របួសរបស់លោក Pavel មិនជាធ្ងន់ធ្ងរអ្វីទេ ប៉ុន្តែត្រូវស្ថិតនៅក្រោមការសង្កេតមើលរយៈពេលខ្លីជាបណ្ដោះអាសន្នសិន។ ព័ត៌មានលម្អិតបន្ថែមទៀតមិនត្រូវបានបកស្រាយឲ្យដឹងនោះឡើយ។

ដោយឡែកបើតាមប៉ូលិសឆែកវិញ បានប្រាប់ថា ការស៊ើបអង្កេតមិនត្រូវបានធ្វើឡើងទេ ព្រោះគ្រោះថ្នាក់នេះស្ថិតនៅទីលានប្រណាំងម៉ូតូ មិនមែនជាផ្លូវសាធារណៈ។ នៅពេលកើតហេតុការណ៍ លោក Pavel ត្រូវគេជឿជាក់ថា លោកកំពុងប្រណាំងម៉ូតូធំប្រភេទ BMW R1200 GS។

លោក Pavel វ័យ៦២ឆ្នាំ គឺជាបុគ្គលមួយរូប ដែលស្រឡាញ់ការជិះម៉ូតូកម្សាន្ត។ មុនពិធីឡើងកាន់តំណែងប៉ុន្មានសប្ដាហ៍កាលពីឆ្នាំ២០២៣ លោក Pavel បានទៅជិះម៉ូតូធំចូលលេងរដ្ឋ Bavaria ក្នុងប្រទេសអាល្លឺម៉ង់។

គ្រោះថ្នាក់ដែលកើតឡើងកាលពីថ្ងៃទី២៣ឧសភាម្សិលមិញ មិនមែនជាបញ្ហាទើបបង្កឡើងលើកដំបូងដោយប្រធានាធិបតីរូបនេះឡើយ។ នៅឆ្នាំ២០២៣ លោកធ្លាប់បានធ្វើការសូមទោសជាសាធារណៈម្ដងរួចមកហើយ ដែលត្រូវគេថតបានថា លោកជិះម៉ូតូមិនពាក់មួកសុវត្ថិភាព។ បន្ថែមពីនេះ នៅខែមេសាកន្លងទៅ លោក Pavel បានរងរបួសដាច់រហែកសាច់ជិតចិញ្ចើមភ្នែក ពេលកំពុងលេងបាញ់កាំភ្លើងនៅទីលានកម្សាន្តមួយកន្លែង៕

ដោយ៖ ឈាង

Related Topics:សាធារណរដ្ឋឆែក