Connect with us

ព័ត៌មានអន្ដរជាតិ

ឆេះ​ផ្សារ​ល្បី​មួយ​កន្លែង​នៅ​បាងកក ងាប់​សត្វ​អស់​ជាង​១០០០​ក្បាល

បានផុស

នៅ

អគ្គិភ័យ​នៅ​ផ្សារ Chatuchak ក្នុង​ទី​​ក្រុង​បាងកក ប្រទេស​ថៃ បាន​​ឆក់​យក​ជីវិត​សត្វ​ចិញ្ចឹម​អស់​ប្រមាណ ១០០​០​ក្បាល និង​បង្ក​ឲ្យ​តូប​លក់​ដូរ​ជាង ១០០​​តូប បាន​ឆេះ​ខ្ទេច​ខ្ទី​គ្មាន​សល់។ នេះ​បើ​យោង​​តាម​ការ​ចុះ​ផ្សាយ​ដោយ​សារព័ត៌មាន​ថៃ Bangkok Post នៅ​ថ្ងៃ​ទី​១១ ខែ​មិថុនា ឆ្នាំ​២០២៤ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រី​នៅ​​សង្កាត់ Chatuchak បាន​​រាយការណ៍​ថា អគ្គិភ័យ​បាន​ចាប់ផ្ដើម​ឆេះ​នៅ​វេលា​ម៉ោង ៤និង​១០​នាទី​ព្រឹក ស្ថិត​នៅ​​ម្ដុំ​កន្លែង​លក់​សត្វ​ចិញ្ចឹម ដែល​បណ្ដាល​ឲ្យ​សត្វ​ជា​ច្រើន​ក្បាល​ត្រូវ​ដុត​ទាំង​រស់​​​នៅ​ក្នុង​ទ្រុង​ជួយ​សង្គ្រោះ​មិន​បាន។ សត្វ​ចិញ្ចឹម​ទាំង​នោះ​ មាន​ដូចជា ឆ្កែ ឆ្មា សត្វ​ស្លាប ពស់ កណ្តុរ និង​​​ប្រភេទ​សត្វ​ល្មូន​មួយ​ចំនួន។ ករណី​ឆេះ​នេះ បណ្ដាល​មក​ពី​ការ​ឆ្លង​ចរន្ត​អគ្គិសនី តែ​មិន​បាន​ធ្វើ​​ឲ្យ​​មាន​មនុស្ស​រង​របួស​ឬ​ស្លាប់​នោះ​ឡើយ។

បើ​តាម​អាជីវករ​ម្នាក់​នៅ​ក្នុង​ផ្សារ Chatuchak បាន​​ឲ្យ​​ដឹង​​ថា ភ្លើង​ចាប់​​​ផ្ដើម​ឆេះ​ចេញ​ពី​តូប​លក់​ឆ្កែ​មួយ​កន្លែង ដែល​ម្ចាស់​តូប​រមែង​បើក​កង្ការ​ទុក​ចោល​ទល់ៗ​ភ្លឺ ឲ្យ​សត្វ​ចិញ្ចឹម​របស់​គាត់។

តូប​សត្វ​ដែល​ត្រូវ​អគ្គិភ័យ​លេប​ត្របាក់ មាន​ចំនួន​ ១១៨​តូប លើ​​ផ្ទៃ​​​​ដី​ចំនួន ១៤០០​ម៉ែត្រ​ការ៉េ ដែល​ត្រូវ​ចំណាយ​ពេល​៣០​នាទី​ទើប​ពន្លត់​បាន​សម្រេច។

សូម​បញ្ជាក់​ថា ផ្សារ Chatuchak គឺ​ជា​ផ្សារ​ដ៏​ធំ​បំផុត​​មួយ​នៅ​​អាស៊ីអាគ្នេយ៍ ដែល​បាន​ទាក់ទាញ​ភ្ញៀវ​ទេសចរ​​ប្រមាណ​ជិត ២០​ម៉ឺន​នាក់​ឲ្យ​ទៅ​លេង​នៅ​រៀងរាល់​ថ្ងៃ​សៅរ៍-អាទិត្យ។ ផ្សារ​នេះ​បើក និង​ពេញ​និយម​​សម្រាប់​ភ្ញៀវ​ទេសចរ​​តែ​នៅ​​ថ្ងៃ​ចុង​សប្ដាហ៍​​ប៉ុណ្ណោះ ប៉ុន្តែ​​តំបន់​ដែល​​លក់​សត្វ​ចិញ្ចឹម​វិញ គឺ​បើក​ជា​រៀងរាល់​ថ្ងៃ​តែ​ម្ដង៕

ដោយ៖ ឈាង​​​​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម