ព័ត៌មានអន្ដរជាតិ

ថៃ លុបចោលគម្រោងទារលុយ ៣០០បាតពីទេសចរបរទេស

បានផុស

២ years មុន

នៅ

ថ្ងៃព្រហស្បតិ៍ ១៣ មិថុនា ២០២៤

ដោយ

Chheang

រដ្ឋាភិបាលថៃ បានសម្រេចលុបចោលនូវគម្រោងយកថ្លៃឈ្នួលចំនួន ៣០០បាត ពីទេសចរបរទេស ដែលធ្វើដំណើរចូលមកថៃតាមរយៈការជិះយន្តហោះ។ នេះបើយោងតាមការចុះផ្សាយរបស់សារព័ត៌មាន Channel News Asia នៅថ្ងៃទី១៣ ខែមិថុនា។

លោក សេដ្ឋា ថាវីស៊ីន នាយករដ្ឋមន្ត្រីថៃ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានទំនាក់ទំនងសាធារណៈថៃ បានលើកឡើងនៅលើវិបសាយផ្លូវការរបស់ខ្លួនថា ថ្លៃឈ្នួលត្រូវបានបំបាត់ចោលវិញដោយលោក សេដ្ឋា ថាវីស៊ីន នាយករដ្ឋមន្ត្រីថៃ ក្រោមហេតុផលថា រដ្ឋាភិបាលចង់ជំរុញឲ្យមានកំណើនទេសចរច្រើនជាងមុន ដែលជាកត្តាជួយឲ្យសេដ្ឋកិច្ចជាតិរីកចម្រើនទៅមុខ។ នាយករដ្ឋមន្ត្រីថៃ បាននិយាយថា រដ្ឋាភិបាលក្រោមការដឹកនាំរបស់លោក មិនធ្លាប់មានបំណងអនុវត្តគោលការណ៍ទារថ្លៃឈ្នួលពីទេសចរបរទេសឡើយ ដែលគម្រោងនេះដើមឡើយត្រូវបានប្រកាសចេញកាលពីខែកុម្ភៈ ឆ្នាំ២០២៣កន្លងទៅ ដោយរដ្ឋាភិបាលអាណត្តិមុនក្រោមការដឹកនាំរបស់លោក ប្រាយុទ្ធ ចាន់អូចា។

លោក សេដ្ឋា ថា ការប្រមូលលុយពីទេសចរ អាចបង្កើតជាចំណូលរដ្ឋក្នុងរយៈពេលខ្លីប៉ុណ្ណោះ តែបើថៃលុបចោលគម្រោងនេះវិញ នោះទេសចរនឹងកើនឡើងច្រើន ហើយចំណូលអាចទាញចេញពីចំណាយផ្សេងៗរបស់ពួកគេនៅពេលមកដើរលេងនៅក្នុងប្រទេសថៃ។

សូមបញ្ជាក់ថា ក្នុងរយៈពេលប៉ុន្មានខែចុងក្រោយនេះ ថៃកំពុងសកម្មខ្លាំងក្នុងការជំរុញកំណើនទេសចរនៅក្នុងប្រទេស។ តួយ៉ាងដូចជា ការពន្យាររយៈពេលទិដ្ឋាការស្នាក់នៅឲ្យបានកាន់តែយូរថែមទៀតសម្រាប់បរទេស ដោយក្នុងនោះអ្នកដំណើរមកពីប្រទេសចំនួន៩៣ អាចមានវត្តមាននៅក្នុងប្រទេសថៃ រហូតដល់ ៦០ថ្ងៃឯណោះ ដែលពីមុនអនុញ្ញាតត្រឹម៥៧ប្រទេសប៉ុណ្ណោះ។

ក្រសួងទេសចរណ៍ថៃ បានប្រកាសថា ចន្លោះពីខែមករា ដល់ខែមេសា ឆ្នាំ២០២៤ ទេសចរបរទេស សរុបមានចំនួន ១១,៩៥លាននាក់ រកចំណូលចូលរដ្ឋបាន ៥៧៥ពាន់លានបាត ស្មើនឹង ១៥,៦ពាន់លានដុល្លារ។ ថៃរំពឹងថា ទេសចរដែលចូលមកលេងក្នុងឆ្នាំនេះ អាចនឹងកើនដល់ ៤០លាននាក់៕

ដោយ៖ ឈាង

Related Topics:ប្រទេសថៃ