កូរ៉េខាងជើងទំនងជាបានទទួលការផ្គត់ផ្គង់វេជ្ជសាស្រ្តពីទីភ្នាក់ងារអន្តរជាតិមួយ

យោងតាមការចេញផ្សាយរបស់ទូរទស្សន៍ជាតិជប៉ុនកាលពីថ្ងៃទី១៧ខែកក្កដានេះ បានឲ្យដឹងថា កូរ៉េខាងជើងទំនងជាបានទទួលការផ្គត់ផ្គង់ផ្នែកវេជ្ជសាស្រ្តពីទីភ្នាក់ងារអន្តរជាតិណាមួយបន្ទាប់ពីការផ្អាក​​​ពីរទៅ​បី​ឆ្នាំ ដោយសារការរាតត្បាតមេរោគឆ្លងកូវីដ១៩។

យោងតាមអាកាសយានដ្ឋានក្នុងទីក្រុងប៉េកាំងបានបង្ហោះនៅលើគេហទំព័ររបស់ខ្លួនថា ក្រុមហ៊ុនអាកាសចរណ៍រដ្ឋកូរ៉េខាងជើង Air Koryo បានហោះហើរយន្តហោះដឹកទំនិញពីទីក្រុងប៉េកាំងទៅកាន់ទីក្រុងព្យុងយ៉ាងកាលពីថ្ងៃចន្ទ។

គួររំឭកថា ប្រទេសកូរ៉េខាងជើងបានផ្អាកសេវាកម្មហោះហើរ​ត្រង់​រវាង​ប្រទេសចិន បន្ទាប់ពីមានការរីករាលដាលនៃជំងឺរាតត្បាត ប៉ុន្តែប្រទេសនេះបានបន្តប្រតិបត្តិការសេវាកម្មហោះហើជាមួយប្រទេសចិនវិញក្នុងខែសីហាឆ្នាំ២០២៣ ហើយបច្ចុប្បន្នកំណត់ពេលហោះហើរចំនួនបី​ជើង​ក្នុងមួយសប្តាហ៍ ប៉ុន្តែជើងហោះហើរកាលពីថ្ងៃចន្ទគឺជាជើងហោះហើរមិនធម្មតា។ ប្រភព​ការទូតខ្លះ​​និយាយ​ថា ជើងហោះហើរ​កាលពី​ថ្ងៃ​ចន្ទ​ហាក់ដូចជា​បាន​ដឹក​សម្ភារ​ពេទ្យ​ពី​ទីភ្នាក់ងារ​អន្តរជាតិ​មួយ រួមទាំង​វ៉ាក់សាំង​សម្រាប់​កុមារ​។

គួរបញ្ជាក់ថា នៅក្នុងការផ្លាស់ប្តូរដាច់ដោយឡែកមួយ ស្ថានទូតចិននៅទីក្រុងព្យុងយ៉ាងបានបញ្ជាក់កាលពីថ្ងៃចន្ទថាលោក Qu Dongyu អគ្គនាយកអង្គការស្បៀងអាហារ និងកសិកម្ម (FAO) របស់អង្គការសហប្រជាជាតិ កំពុងបំពេញទស្សនកិច្ចនៅកូរ៉េខាងជើង។ ដំណើរទស្សនកិច្ចទៅកាន់កូរ៉េខាងជើងដោយមន្ត្រីទីភ្នាក់ងារអន្តរជាតិមិនទាន់ត្រូវបានបញ្ជាក់ជាផ្លូវការនៅឡើយទេចាប់តាំងពីជំងឺរាតត្បាតកូវីដ​១៩​។ ប្រទេសនានាកំពុងឆ្ងល់ថាតើទីក្រុងព្យុងយ៉ាងនឹងចាប់ផ្តើមទទួលយកជំនួយពីទីភ្នាក់ងារអន្តរជាតិពេញលេញឬយ៉ាងណា។

ប្រទេសកូរ៉េខាងជើង ធ្លាប់បានបញ្ជូនយន្តហោះទៅកាន់ប្រទេសចិនដើម្បីដឹកការផ្គត់ផ្គង់​វេជ្ជសាស្រ្ត មួយថ្ងៃបន្ទាប់ពីខ្លួនបានបញ្ជាក់ពីការផ្ទុះឡើងដំបូងនូវជម្ងឺកូវីដ១៩ ដោយមានជើងហោះហើរយន្តហោះ Air Koryo ចំនួន៣គ្រឿងមកពីប្រទេសកូរ៉េខាងជើងទៅកាន់ទីក្រុង Shenyang របស់ប្រទេសចិន៕

អត្ថបទ៖ ប៊ុន សុភាព