ព័ត៌មានអន្ដរជាតិ

Microsoft ថា ក្រុម Hacker អ៊ីរ៉ង់វាយប្រហារគណនីមន្ត្រីអាមេរិក មុនការបោះឆ្នោត

បានផុស

២ years មុន

នៅ

ថ្ងៃសៅរ៍ ១០ សីហា ២០២៤

ដោយ

Chheang

ក្រុមអ្នកស្រាវជ្រាវក្រុមហ៊ុន Microsoft បាននិយាយកាលពីថ្ងៃទី៩ខែសីហាថា ក្រុម Hacker ដែលមានទំនាក់ទំនងជាមួយរដ្ឋាភិបាលអ៊ីរ៉ង់ បានព្យាយាមលួចចូលទៅក្នុងគណនីរបស់មន្ត្រីជាន់ខ្ពស់អាមេរិក ជ្រៀតជ្រែកយុទ្ធនាការឃោសនាបោះឆ្នោតប្រធានាធិបតីកាលពីខែមិថុនាកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ Microsoft បានដាក់ការសង្ស័យថា ការលួចវាយប្រហារនេះ គឺជាផ្នែកមួយនៃការប៉ុនប៉ង់របស់អ៊ីរ៉ង់ ដើម្បីជះឥទ្ធិពលដល់ការបោះឆ្នោតប្រធានាធិបតីអាមេរិកនាខែវិច្ឆិកាខាងមុខ។ ការបង្ហាញរបាយការណ៍ ធ្វើឡើងបន្ទាប់ពីមានសេចក្តីថ្លែងការណ៍ថ្មីៗដោយចារកម្មអាមេរិកដែលថា អ៊ីរ៉ង់បង្កើនប្រើប្រាស់គណនីប្រព័ន្ធបណ្ដាញសង្គមក្លែងក្លាយជាច្រើន ក្នុងគោលបំណងព្យាយាមបង្កជម្លោះនយោបាយនៅក្នុងសហរដ្ឋអាមេរិក។

របាយការណ៍របស់ Microsoft ដដែល បានឲ្យដឹងទៀតថា ក្រៅតែពីការប៉ុនប៉ងវាយប្រហារលើគណនីមន្ត្រីអាមេរិក ក្រុមអ៊ីរ៉ង់ក៏បានបង្កើតវិបសាយជាច្រើនផងដែរ ដើម្បីចែកចាយនូវព័ត៌មានមិនពិតអុកឡុកការបោះឆ្នោត។

ពាក់ព័ន្ធនឹងបញ្ហានេះ មន្ត្រីទូតរបស់អ៊ីរ៉ង់ប្រចាំអង្គការសហប្រជាជាតិនៅទីក្រុងញូវយ៉ក បានប្រាប់ទីភ្នាក់ងារព័ត៌មាន Reuters ថា សមត្ថភាពកុំព្យូទ័ររបស់ខ្លួនគឺ សម្រាប់ការការពារ និងទប់ទល់នឹងការគំរាមកំហែងដែលខ្លួនប្រឈមមុខប៉ុណ្ណោះ តែខ្លួនមិនមានគម្រោងវាយប្រហារតាមប្រព័ន្ធអ៊ីនធឺណិតនោះទេ។ ទូតអ៊ីរ៉ង់ បានបន្ថែមថា៖ «ការបោះឆ្នោតប្រធានាធិបតីអាមេរិក គឺជាបញ្ហាផ្ទៃក្នុងដែលអ៊ីរ៉ង់មិនជ្រៀតជ្រែកនោះឡើយ»៕

ដោយ៖ ឈាង