ព្យុះកំណាច Helene សម្លាប់មនុស្ស៤៣នាក់ នៅរដ្ឋចំនួន៤ របស់អាមេរិក

គិតត្រឹមព្រឹកថ្ងៃសៅរ៍ទី២៨ខែកញ្ញាឆ្នាំ២០២៤ សហរដ្ឋអាមេរិក បានរាយការណ៍អំពីមនុស្សស្លាប់យ៉ាងតិច ៤៣នាក់ ដោយសារព្យុះកំណាច Helene នៅរដ្ឋចំនួន៤ ហើយក្នុងចំណោមមនុស្សស្លាប់ក៏រួមមានទាំងសមាជិក២នាក់នៃក្រុមឆ្លើយតបដំបូង ដែលកំពុងព្យាយាមជួយសង្គ្រោះពលរដ្ឋផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, South Carolina គឺជារដ្ឋដែលមានមនុស្សស្លាប់ច្រើនជាងគេ ពោលគឺ១៧នាក់ បន្ទាប់មកគឺ Georgia មាន១៥នាក់, Florida ៨នាក់, North Carolina ២នាក់ និង Virginia មានម្នាក់។

ទោះយ៉ាងណា មន្ត្រីក្នុងរដ្ឋនីមួយៗសុទ្ធតែព្រមានថា តួលេខជនរងគ្រោះអាចកើនឡើងបន្ថែមទៀត ព្រោះនៅមានមនុស្សជាច្រើន កំពុងបាត់ខ្លួននៅឡើយ។

ក្រៅពីគំរាមកំហែងដល់អាយុជីវិត ព្យុះ Helene ក៏បង្កទុក្ខលំបាកដល់ប្រជាជនផងដែរដូចជាបំផ្លាញផ្ទះសម្បែង បង្ខំឲ្យបិទអាកាសយានដ្ឋាន ទឹកជំនន់ជន់លិចដងផ្លូវ រំខានការធ្វើចរាចរណ៍ និងកាត់ផ្តាច់អគ្គិសនីដល់មនុស្សជិត៤លាននាក់។

សូមបញ្ជាក់ថា ព្យុះ Helene បានទៅដល់ដីគោករដ្ឋ Florida ដំបូងគេក្នុងនាមជាព្យុះសង្ឃរាប្រភេទទី៤ដ៏ខ្លាំង កាលពីថ្ងៃសុក្រទី២៧ខែកញ្ញាឆ្នាំ២០២៤ ជាមួយកម្លាំងខ្យល់ ២២៥គីឡូម៉ែត្រក្នុងមួយម៉ោង ដោយវាយប្រហារតំបន់ Big Bend យ៉ាងពេញទំហឹង។

លើសពីនេះ វាត្រូវគេអះអាងថា ជាព្យុះខ្លាំងបំផុតដែលវាយប្រហារភាគអាគ្នេយ៍សហរដ្ឋអាមេរិក នៅក្នុងប្រវត្តិសាស្រ្តសម័យទំនើប។

យ៉ាងណា ឥឡូវព្យុះ Helene បានថមថយកម្លាំងហើយ និងធ្លាក់មកក្លាយជាសម្ព័ន្ធវិសម្ពាធទាបវិញ ដោយធ្វើដំណើរយឺតៗក្នុងល្បឿន៥៥គីឡូម៉ែត្រក្នុងមួយម៉ោងឆ្ពោះទៅកាន់រដ្ឋ Kentucky និង Tennessee៕

អត្ថបទ៖ សុខ សុវណ្ណ

ចុចអាន៖ ទៅដល់រដ្ឋ Florida ភ្លាម ព្យុះសង្ឃរាកំណាច Helene បណ្តាលឲ្យមានមនុស្សស្លាប់ភ្លែត