ទៅដល់រដ្ឋ Florida ភ្លាម ព្យុះសង្ឃរាកំណាច Helene បណ្តាលឲ្យមានមនុស្សស្លាប់ភ្លែត

ព្យុះសង្ឃរា Helene បានបោះពួយទៅវាយប្រហាររដ្ឋ Florida ហើយ ខណៈភ្លាមៗនោះមានសេចក្តីរាយការណ៍អំពីការស្លាប់មនុស្សម្នាក់ និងការបំផ្លិចបំផ្លាញជាបណ្តើរៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ព្យុះនេះ បានទៅដល់ដីគោករដ្ឋ Florida នៅថ្ងៃសុក្រទី២៧ខែកញ្ញាឆ្នាំ២០២៤ ក្នុងនាមជាព្យុះសង្ឃរាប្រភេទទី៤ ដោយពាំនាំទៅជាមួយនូវខ្យល់បក់ កម្លាំង២២៥គីឡូម៉ែត្រក្នុងមួយម៉ោង។

អភិបាលរដ្ឋ Florida លោក Ron DeSantis បានប្រាប់អ្នកសារព័ត៌មានថា មនុស្សម្នាក់បានស្លាប់ក្នុងរថយន្តដោយសារផ្លាកសញ្ញាចរាចរណ៍តាមផ្លូវ ដួលសង្កត់នៅតំបន់ Tampa។ លើសពីនេះលោកបានអំពាវនាវឲ្យប្រជាជន កុំធ្វើដំណើរទៅណាឲ្យសោះបើមិនចាំបាច់ ព្រោះថា​ ដងផ្លូវពិតជាមានគ្រោះថ្នាក់ណាស់។

ក្រៅពីបណ្តាលឲ្យមនុស្សស្លាប់ ព្យុះសង្ឃរា Helene ក៏បង្កទុក្ខវេទនាដល់អ្នករដ្ឋ Florida ផងដែរ ដោយផ្ទះជាង១លានខ្នងគ្មានអគ្គិសនីប្រើប្រាស់ ហើយទឹកជំនន់ថែមទាំងជន់លិចផ្លូវទៀត។ លើសពីនេះ តំបន់ Tampa និង Tallahassee ក៏ត្រូវបង្ខំចិត្តបិទអាកាសយានដ្ឋានផងដែរ។

មិនមែនតែនៅ Florida ទេ, ព្យុះសង្ឃរា Helene ក៏នឹងជះឥទ្ធិពលដល់ភាគអាគ្នេយ៍រដ្ឋ Georgia ព្រមទាំងផ្នែកខ្លះនៃរដ្ឋ North Carolina និង South Carolina ទៀតផង។

សូមបញ្ជាក់ថា Helene គឺជាព្យុះសង្ឃរាខ្លាំងបំផុតក្នុងប្រវត្តិសាស្រ្ត ដែលវាយប្រហារតំបន់ Big Bend នៃរដ្ឋ Florida ហើយដោយសារតែកម្លាំងដ៏ខ្លាំងរបស់ព្យុះនេះ វាអាចគំរាមកំហែងដល់អាយុជីវិត និងបង្កជាគ្រោះមហន្តរាយធំធេង៕

អត្ថបទ៖ សុខ សុវណ្ណ

ចុចអាន៖ រដ្ឋ Florida ជួបព្យុះសង្ឃរាកំណាច ប្រឈមហានិភ័យបង្កគ្រោះមហន្តរាយធំធេង