អ្នកស្និទ្ធិ​បំផុត​របស់​លោកស្រី អ៊ុងសាន ស៊ូជី ទទួល​មរណ​ភាពដោយសារជំងឺមហារីកគ្រាប់​ឈាម

ប៉ុន្មានថ្ងៃបន្ទាប់ពីត្រូវបានដោះលែងពីមន្ទីរឃុំឃាំងរបស់របបយោធា ដោយហេតុផលសុខភាព សម្ព័ន្ធមិត្តជិតស្និទ្ធរបស់មេដឹកនាំប្រជាធិបតេយ្យមីយ៉ាន់ម៉ា លោកស្រី អ៊ុងសាន ស៊ូជី (Aung San Suu Kyi) បានទទួលមរណភាពដោយសារជំងឺមហារីក​គ្រាប់​ឈាមកាលពីថ្ងៃចន្ទទី៧ខែតុលា។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៨ខែតុលានេះ។

លោក Zaw Myint Maung វ័យ៧២ឆ្នាំ ដែលបានចំណាយពេលប្រហែល២ទសវត្សរ៍នៅក្នុងពន្ធនាគារពីបទ«ផ្គើននឹងយោធារបស់មីយ៉ាន់ម៉ា» ខណៈដែលលោកគឺជាមនុស្សជិតស្និទ្ធនឹងលោកស្រី លោកស្រី អ៊ុងសាន ស៊ូជី និងជាដឹកនាំនៃសម្ព័ន្ធជាតិដើម្បីប្រជាធិបតេយ្យ (NLD)។ គាត់ត្រូវបានចាប់ខ្លួនបន្ទាប់ពីរដ្ឋប្រហាររបស់យោធានៅឆ្នាំ២០២១ ហើយត្រូវបានជាប់គុកពីបទពុករលួយ និងបទចោទប្រកាន់ផ្សេងទៀត ហើយថ្មីៗនេះគាត់ត្រូវបានដោះលែងដោយហេតុផលសុខភាព។

ប្រភព​ជាន់ខ្ពស់គណបក្សមួយបានប្រាប់ AFP ដោយសុំមិនបញ្ចេញឈ្មោះថា៖​«យើងបានទទួលការបញ្ជាក់អំពីការស្លាប់របស់គាត់ ដែលវាជាការខាតបង់ដ៏ធំមួយសម្រាប់ពួកយើង ខណៈដែលគាត់គឺជាអនុប្រធានគណបក្ស NLD របស់យើង ទោះបីជាយើងត្រៀមខ្លួនរួចហើយ យើងអាចបាត់បង់គាត់នៅថ្ងៃណាមួយក៏ដោយ យើងសោកស្តាយចំពោះការបាត់បង់គាត់ក្នុងស្ថានភាពដ៏លំបាកនេះ»។

ប្រភព​បាន​ឲ្យ​ដឹង​ថា Zaw Myint Maung បាន​ស្លាប់​ដោយ​សារ​ជំងឺ​មហារីក​គ្រាប់​ឈាម។

លោក Zaw Myint Maung ត្រូវបានឃុំខ្លួនរួមជាមួយឥស្សរជនជាន់ខ្ពស់របស់ NLD ផ្សេងទៀត បន្ទាប់ពីរដ្ឋប្រហារកាល​ពីខែ​កុម្ភៈ​ ឆ្នាំ២០២១ ដែលបានបញ្ចប់ការដឹកនាំបែបលទ្ធិប្រជាធិបតេយ្យរបស់ប្រទេសនេះ ហើយបានប្រគល់ប្រទេសនេះឱ្យគ្រប់គ្រងដោយយោធាវិញ។ នៅឆ្នាំ ១៩៨៨ គាត់បានដឹកនាំកូដកម្មរបស់វេជ្ជបណ្ឌិតដែលជាផ្នែកមួយនៃការបះបោរគាំទ្រលទ្ធិប្រជាធិបតេយ្យដ៏ធំដែលជំរុញលោកស្រី​ទទួលបាន​ការចាប់អារម្មណ៍នៅក្នុងប្រទេសមីយ៉ាន់ម៉ា ដែលបន្ទាប់មកហៅថាភូមា។

នៅឆ្នាំ១៩៨៩ គាត់បានចាកចេញពីការងាររបស់គាត់ជានាយកដ្ឋានជីវគីមីនៃសាកលវិទ្យាល័យហើយបានចូលរួមជាមួយ NLD។ ក្រោយ​មក យោធា​បាន​ចាប់​គាត់​ដាក់​គុក​ក្នុងទោសប្រហែល​ពីរ​ទសវត្សរ៍​សម្រាប់​សកម្មភាព​របស់​គាត់។ បន្ទាប់ពី NLD បានឈ្នះឆ្នោតភ្លូកទឹកភ្លូកដីនៅក្នុងការបោះឆ្នោតឆ្នាំ ២០១៥ លោកបានក្លាយជានាយករដ្ឋមន្ត្រីនៃតំបន់ Mandalay ។

ដោយសាររដ្ឋប្រហារឆ្នាំ ២០២១ បានបង្កឱ្យមានការប្រឆាំងប្រដាប់អាវុធយ៉ាងទូលំទូលាយចំពោះការគ្រប់គ្រងដោយយោធា ដែលរបបយោធាបានបរាជ័យក្នុងការកំទេចជាងបីឆ្នាំក្រោយមកនេះ។ យោងតាមអង្គការសហប្រជាជាតិបានឱ្យដឹងថា មនុស្សជិតបីលាននាក់ត្រូវបានបង្ខំឱ្យចាកចេញពីផ្ទះរបស់ពួកគេដោយសារជម្លោះ។ការ​បង្រ្កាប​របស់​របប​យោធា​លើ​ការ​មិន​ចុះ​សម្រុង​បាន​ធ្វើការគាំទ្រ NLD ធ្លាក់​ចុះ។

កាលពីខែមីនាឆ្នាំមុន របបយោធាបានរំលាយគណបក្ស NLD សម្រាប់ការខកខានក្នុងការចុះឈ្មោះឡើងវិញនៅក្រោមច្បាប់បោះឆ្នោតដែលតាក់តែងដោយយោធាថ្មីដ៏តឹងតែង ដោយបានដកវាចេញពីការបោះឆ្នោតដែលខ្លួនបានបង្ហាញថាវាអាចនឹងរៀបចំឡើងនៅឆ្នាំ ២០២៥ ។

ស្របពេលនេះលោកស្រី អ៊ុងសាន ស៊ូជី អាយុ ៧៩ ឆ្នាំ កំពុងជាប់ពន្ធនាគាររយៈពេល ២៧ ឆ្នាំ ក្រោមបទចោទប្រកាន់រាប់ចាប់ពីអំពើពុករលួយ រហូតដល់ការមិនគោរពការរឹតបន្តឹងការរាតត្បាតនៃជំងឺកូវីដ-១៩។ ក្រុមសិទ្ធិមនុស្សនិយាយថា ការកាត់ក្តីបិទទ្វាររបស់លោកស្រី អ៊ុងសាន ស៊ូជី និងមេដឹកនាំគណបក្ស NLD ផ្សេងទៀត គឺជារឿងថោកទាប ដែលរៀបចំឡើងដើម្បីដកពួកគេចេញពីឆាកនយោបាយប៉ុណ្ណោះ៕

អត្ថបទ៖ ប៊ុន សុភាព