ថៃ បញ្ជាក់ពេលវេលាបើកប្រទេសឡើងវិញទាំងស្រុង និងដកការរឹតត្បិតទាក់ទងជំងឺកូវីដ១៩

មជ្ឈមណ្ឌលគ្រប់គ្រងជំងឺកូវីដ១៩ (CCSA) បាននិយាយកាលពីម្សិលមិញថា ប្រទេសថៃនឹងបើកឡើងវិញទាំងស្រុងនៅត្រឹមខែតុលា ហើយរាល់ការរឹតត្បិតទាក់ទងជំងឺកូវីដ១៩នឹងត្រូវដកចេញ ប្រសិនបើគ្រប់វិស័យទាំងអស់បន្តសហប្រតិបត្តិការជាមួយរាជរដ្ឋាភិបាលក្នុងកិច្ចខិតខំប្រឹងប្រែងទប់ស្កាត់។

អ្នកនាំពាក្យជំនួយការ CCSA លោកស្រី Apisamai Srirangson បាននិយាយថា ក្នុងចំណោមតម្រូវការធំៗសម្រាប់ការបើកប្រទេសឡើងវិញបន្ទាប់ពីការរឹតបន្តឹងអស់រយៈពេលជាងមួយឆ្នាំ គឺការត្រៀមខ្លួនរបស់វិស័យសាធារណៈដើម្បីចាប់ផ្តើមជីវិតធម្មតាឡើងវិញ។

ថ្លែងបន្ទាប់ពីកិច្ចប្រជុំអនុគណៈកម្មាធិការរបស់ CCSA ស្តីពីការបន្ធូរបន្ថយការរឹតត្បិតអាជីវកម្មនិងសកម្មភាព លោកស្រី Apisamai បានសរសើរក្រុមមន្ត្រីនៅក្នុងខេត្តសាមុតសាខន ដែលជាចំណុចកណ្តាលនៃការផ្ទុះជំងឺកូវីដ១៩រលកថ្មី។

លោកស្រីបាននិយាយថា កិច្ចសហប្រតិបត្តិការយ៉ាងសកម្មដោយវិស័យឯកជន និងការឆ្លើយតបយ៉ាងល្អប្រហាក់ប្រហែលគ្នាពីសាធារណៈជន ចំពោះកិច្ចខិតខំប្រឹងប្រែងទប់ស្កាត់ជំងឺកូវីដ១៩របស់រដ្ឋាភិបាល គឺជាលក្ខណៈវិនិច្ឆ័យសំខាន់ពីរផ្សេងទៀតដែលត្រូវយកមកពិចារណាមុនពេលអនុម័តការបើកប្រទេសឡើងវិញទាំងស្រុង។

លោកស្រីនិយាយថា “សំណើនេះនឹងត្រូវពិភាក្សានៅឯកិច្ចប្រជុំនៃគណៈកម្មាធិការធំរបស់ CCSA នៅថ្ងៃទី១៩ខែមីនា។ ជាផ្នែកមួយនៃការបើកឡើងវិញ CCSA នឹងពិចារណាពង្រឹងខេត្តសាមុតសាខនពីតំបន់ត្រួតពិនិត្យអតិបរមា ទៅជាតំបន់ដែលមានការប្រុងប្រយ័ត្នខ្ពស់សម្រាប់ជំងឺកូវីដ១៩”។

ចំណែកអ្នកនាំពាក្យរបស់ CCSA លោក Taweesilp Visanuyothin បានប្រាប់កាសែត Bangkok Post ថា ព័ត៌មានលម្អិតកាន់តែច្បាស់ អំពីគំនិតនៃការបើកប្រទេសឡើងវិញគួរតែត្រូវបានបង្ហាញបន្ទាប់ពីកិច្ចប្រជុំរបស់ CCSA នៅថ្ងៃទី១៩ខែមីនា នៅពេលពួកគេទាក់ទងជាមួយក្រសួងជាច្រើន ហើយចំណាយពេលដើម្បីសម្រេច៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ ទ្រាំមិនបាន! លោក ប្រាយុទ្ធ យកអាល់កុលបាញ់ក្រុមអ្នកកាសែត ព្រោះខឹងសួរសំណួរមួយ (មានវីដេអូ)

ចុចអាន៖ ថៃ ឲ្យអ្នកទេសចរធ្វើចត្តាឡីស័កលើទូកកម្សាន្តដើម្បីរកចំណូល