រុស្ស៊ី រៀបផែនការរួចហើយ ដើម្បីសងសឹកអ៊ុយក្រែន ក្រោយយកមីស៊ីលអាមេរិក បាញ់ចូលដីខ្លួន ឥតឈប់

ទីក្រុងមូស្គូអះអាងថា អ៊ុយក្រែននៅតែគឃ្លើន ដោយបាញ់មីស៊ីល ATACMS របស់អាមេរិក ចូលដីរបស់ខ្លួនមួយលើកជាពីរលើក ហើយឥឡូវរដ្ឋមន្ត្រីការបរទេសរុស្ស៊ីព្រមានថា ខ្លួនបានរៀបផែនការរួចស្រេចអស់ហើយ ដើម្បីវាយប្រហារសងសឹកទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sergey Lavrov បានឲ្យដឹងថា ទីក្រុងកៀវ បានយកមីស៊ីល ATACMS បាញ់ចូលរុស្ស៊ីជាថ្មី ចាប់ពីថ្ងៃទី២៣ខែវិច្ឆិកាមក ដោយវាយប្រហារតំបន់ Kursk បណ្តាលឲ្យខូចខាតសំណង់ហេដ្ឋារចនាសម្ព័ន្ធនិងបង្ករបួសស្នាមដល់កងកម្លាំងក៏ដូចជាជនស៊ីវិល។

នៅក្នុងការបង្ហោះលើឆានែល Telegram កាលពីថ្ងៃអង្គារទី២៦ខែវិច្ឆិកាឆ្នាំ២០២៤ លោក Lavrov គូសបញ្ជាក់ថា រុស្ស៊ី បានរៀបចំវិធានការសងសឹករួចជាស្រេច។

ទោះបីជាយ៉ាងណាក៏ដោយ រដ្ឋមន្ត្រីរូបនេះ មិនបានពន្យល់លម្អិតទេថាតើ រុស្ស៊ីនឹងចាត់វិធានការអ្វីខ្លះដើម្បីសងសឹកទៅលើអ៊ុយក្រែនវិញ។

កាលពីសប្តាហ៍មុន ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានបញ្ជាឲ្យកងទ័ព បាញ់មីស៊ីលល្បឿនលឿនជាងសំឡេង១០ដង ប្រភេទថ្មីឈ្មោះ Oreshnik វាយប្រហារទីក្រុង Dnipro របស់អ៊ុយក្រែន យ៉ាងកក្រើកម្តងរួចមកហើយ ជាការឆ្លើយតបទៅលោក វ្ល៉ាឌីមៀរ ហ្សេលេនស្គី ដែលយកមីស៊ីលផ្គត់ផ្គង់ដោយបស្ចិមប្រទេស វាយប្រហារចូលដីរុស្ស៊ីទាំងមិនញញើត។

ជុំវិញបញ្ហានេះដែរ លោក Lavrov បានប្រាប់កាសែត Rossiyskaya Gazeta ថា «ការបាញ់មីស៊ីលចូលជ្រៅក្នុងទឹកដីរុស្ស៊ី គឺជាការបញ្ឆេះស្ថានការណ៍ឲ្យកាន់តែក្តៅ។ អ្នក​ដែល​នៅ​ពី​ក្រោយ​ការ​វាយ​ប្រហារ​លើ​ពលរដ្ឋ​និង​ហេដ្ឋារចនាសម្ព័ន្ធ​រុស្ស៊ី នឹង​ត្រូវ​ប្រឈម​មុខការ​ដាក់​ទណ្ឌកម្មដ៏​ស័ក្តិសមបំផុត។

ចំណែកលោកពូទីន នៅតែទទូចថា ទីក្រុងមូស្គូសូមរក្សាសិទ្ធិ វាយប្រហារទៅលើប្រទេសទាំងឡាយណា ដែលអនុញ្ញាតឲ្យអ៊ុយក្រែនប្រើប្រាស់អាវុធផ្គត់ផ្គង់ដោយលោកខាងលិច យកមកប្រឆាំងនឹងរុស្ស៊ី៕

អត្ថបទ៖ សុខ សុវណ្ណ

ចុចអាន៖ ប្រធានាធិបតី​អ៊ុយក្រែន បារម្ភ​ទឹកដីខ្លួន​ក្លាយ​ជាទីលាន​សាក​អាវុធ​របស់​រុស្ស៊ី​​និង​សម្ព័ន្ធមិត្ត​