ថៃ រំពឹង​ថា​នឹង​មិនត្រូវ​អាមេរិក​ដំឡើង​ពន្ធគយ

ប្រទេសថៃ មានសុទិដ្ឋិនិយមថា ខ្លួននឹងមិនប្រឈមមុខនឹងការយកពន្ធ​គយ​ថ្មីពីសហរដ្ឋអាមេរិកទេ ទោះបីជាមានការព្រួយបារម្ភកាន់តែខ្លាំងឡើងអំពីអតិរេកពាណិជ្ជកម្មរបស់ខ្លួន​ក៏​ដោយ។

រដ្ឋមន្ត្រីពាណិជ្ជកម្មថៃ លោក Pichai Naripthaphan បានឲ្យ​ដឹង​កាល​ពី​ថ្ងៃ​ទី​១៤​កុម្ភៈ​ថា ប្រទេស​របស់​លោក​សង្ឃឹម​​រក្សាទំនាក់ទំនងពាណិជ្ជកម្ម​ឲ្យ​រឹងមាំ និងជៀសវាងរបាំងពាណិជ្ជកម្មបន្ថែម​ពី​អាមេរិក។

អតិរេកពាណិជ្ជកម្មរបស់​ថៃជាមួយ​អាមេរិក បានកើនឡើងដល់ ៣៥,៤​ពាន់លានដុល្លារក្នុងឆ្នាំ​២០២៤ ដែលបង្កឲ្យមានការភ័យខ្លាចនៃការដំឡើងពន្ធ​គយ​។ ជាការឆ្លើយតប រដ្ឋាភិបាលថៃ កំពុងធ្វើការយ៉ាងសកម្មលើយុទ្ធសាស្ត្រចរចា ដើម្បីដោះស្រាយកង្វល់ទាំងនេះ និងធានាបាននូវទំនាក់ទំនងវិជ្ជមានបន្ត។

លោករដ្ឋមន្ត្រី Pichai បានសង្កត់ធ្ងន់លើភាពជាដៃគូយូរអង្វែងរវាងប្រជាជាតិទាំងពីរ ដោយកត់សម្គាល់ថា អ្នកវិនិយោគអាមេរិកមានសិទ្ធិផ្តាច់មុខក្នុងការកាន់កាប់អាជីវកម្មថៃមួយចំនួនយ៉ាងពេញលេញ។

នាយករដ្ឋមន្ត្រីថៃ លោកស្រី Paetongtarn Shinawatra បានណែនាំមន្ត្រី​ឲ្យ​​ធ្វើការសិក្សាលើផលប៉ះពាល់សក្តានុពលនៃគោលនយោបាយពាណិជ្ជកម្មរបស់​អាមេរិក ជាពិសេសលើការនាំចេញពី​ថៃក្នុងវិស័យដូចជា កសិកម្ម និងអេឡិចត្រូនិក។ ជំហានសកម្មនេះមានគោលបំណងវាយតម្លៃ និងកាត់បន្ថយផលប៉ះពាល់អវិជ្ជមានពីពន្ធគយរបស់​អាមេរិក។

ដើម្បីដោះស្រាយសក្ដានុពលពាណិជ្ជកម្មបន្ថែមទៀត ថៃគ្រោងនឹងនាំចូលសារធាតុ​អេតានចំនួន ១​លានតោននៅឆ្នាំនេះ ហើយក៏កំពុងរិះរកមធ្យោបាយ ដើម្បីលើកទឹកចិត្តក្រុមហ៊ុនពិភពលោកឲ្យមកបណ្តាក់ទុននៅក្នុងប្រទេសផងដែរ។ កិច្ចខិតខំប្រឹងប្រែងទាំងនេះត្រូវបានរៀបចំឡើង ដើម្បីធ្វើ​ឲ្យ​មានតុល្យភាពពាណិជ្ជកម្ម និងកាត់បន្ថយផលប៉ះពាល់អវិជ្ជមានណាមួយដែលកើតឡើងពីភាពតានតឹងពាណិជ្ជកម្មរវាង​អាមេរិក និងចិនដែលកំពុងបន្ត៕

ដោយ៖ ឈាង