ក្រុមហាម៉ាស ដោះលែងចំណាប់ខ្មាំង ៣នាក់ទៀត

ក្រោយមានភាពស្រពិចស្រពិលអំពីបទឈប់បាញ់ ទីបំផុតក្រុមហាម៉ាស សុខចិត្តដោះលែងចំណាប់ខ្មាំងចំនួន៣នាក់ទៀតហើយ ខណៈភាគីអ៊ីស្រាអែលឯណោះ ក៏រៀបចំដោះលែងអ្នកទោសប៉ាឡេស្ទីនចំនួន ៣៦៩នាក់ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ចំណាប់ខ្មាំងទាំង៣ឈ្មោះ Alexander Troufanov (ជនជាតិអ៊ីស្រាអែលដើមកំណើតរុស្ស៊ី), Yair Horn (ជនជាតិអ៊ីស្រាអែលដើមកំណើតអាហ្ស់ទីន) និង Sagui Dekel-Chen (ជនជាតិអ៊ីស្រាអែលដើមកំណើតអាមេរិក) ត្រូវបានក្រុមហាម៉ាស ប្រគល់ឲ្យកាកបាទក្រហមក្នុងទីក្រុង Khan Younis នៅថ្ងៃសៅរ៍ទី១៥ខែកុម្ភៈឆ្នាំ២០២៥។

សាច់ញាតិនិងមនុស្សម្នា យ៉ាងច្រើនកុះករ បាននាំគ្នាមកអបអរសាទរនិងស្វាគមន៍ ចំពោះការវិលត្រឡប់របស់អ្នកទាំង៣ ហើយសង្ឃឹមថា ចំណាប់ខ្មាំងដែលនៅសេសសល់ នឹងត្រូវបានដោះលែងជាបន្តបន្ទាប់។

យ៉ាងណា គេមិនភ្លេចឡើយ ការដោះលែងនេះគឺបានមកពីការរួមចំណែកខិតខំសម្របសម្រួលជាទីបំផុត ពីសំណាក់ប្រទេសអេហ្ស៊ីបនិងកាតា ធ្វើយ៉ាងណា ដើម្បីបញ្ចៀសបទឈប់បាញ់ដ៏ផុយស្រួយឲ្យបាន។

កាលពីខែមករា ក្រុមហាម៉ាស បានយល់ព្រមដោះលែងចំណាប់ខ្មាំងអ៊ីស្រាអែលចំនួន៣៣នាក់ រួមទាំងស្ត្រី កុមារ និងអ្នកជំងឺ របួស និងបុរសចំណាស់ ផងដែរជាថ្នូរនឹងអ្នកទោស និងអ្នកជាប់ឃុំប៉ាឡេស្ទីនរាប់រយនាក់ ក្នុងអំឡុងពេលបទឈប់បាញ់រយៈពេល៦សប្តាហ៍ ខណៈក្នុងអំឡុងពេលនោះ កងកម្លាំងអ៊ីស្រាអែលក៏ត្រូវដកថយពីទីតាំងមួយចំនួននៅហ្គាហ្សាផងដែរ។

មុនថ្ងៃសៅរ៍នេះ ចំណាប់ខ្មាំងអ៊ីស្រាអែល១៦នាក់ ក្នុងចំណោម៣៣នាក់ ត្រូវបានបញ្ជូនទៅផ្ទះរបស់ពួកគេវិញរួចទៅហើយ ខណៈនៅសល់ចំណាប់ខ្មាំងចំនួន៧៦នាក់ទៀត កំពុងស្ថិតក្នុងតំបន់ហ្គាហ្សា៕

អត្ថបទ៖ សុខ សុវណ្ណ

ចុចអាន៖ ក្រុមហាម៉ាសនឹងដោះលែងចំណាប់ខ្មាំង៣នាក់បន្ថែមទៀត ក្រោម​សម្ពាធខ្លាំង​​ពីអ៊ីស្រាអែល​