រុស្ស៊ី បានដៃ បាញ់មីស៊ីលស្រោចលើអ៊ុយក្រែន ចំពេល ត្រាំ និង ហ្សេលេនស្គី កំពុងឈ្លោះគ្នា

ស្របពេលប្រធានាធិបតីអាមេរិក​ ដូណាល់ ត្រាំ និងប្រមុខរដ្ឋាភិបាលទីក្រុងកៀវ វ្ល៉ាឌីមៀរ ហ្សេលេនស្គី កំពុងឆ្លើយឆ្លងពាក្យសម្តីគ្នាដ៏ក្តៅគគុកនោះ ស្រាប់តែរុស្ស៊ីឯណោះ បានបើកការវាយប្រហារយ៉ាងចាស់ដៃ សន្ធាប់លើប្រទេសអ៊ុយក្រែន ដោយកំណត់គោលដៅលើរោងចក្រហ្គាស់។ នេះបើយោងតាមការចំផ្សាយរបស់ ABC News កាលពីថ្ងៃព្រហស្បតិ៍ទី២០ខែកុម្ភៈឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីកងកម្លាំងអ៊ុយក្រែន, រុស្ស៊ីបានបាញ់មីស៊ីលចំនួន១៤គ្រាប់និងបញ្ជូនដ្រូន ១៦១គ្រឿងមកទម្លាក់គ្រាប់បែកលើទីក្រុង Odesa ប៉ុន្តែក្នុងនោះខ្លួនបានបាញ់ទម្លាក់ដ្រូនចំនួន ៨០គ្រឿង។ ​ទោះបីជាយ៉ាងណាក៏ដោយ អ៊ុយក្រែន មិនបញ្ជាក់ទេថាតើ ខ្លួនស្ទាប់ចាប់បានមីស៊ីលប៉ុន្មានគ្រាប់។  

ស្របពេលជាមួយគ្នានោះ រដ្ឋមន្ត្រីក្រសួងថាមពលអ៊ុយក្រែន German Galushchenko បានបង្ហោះលើ Facebook ថា «ការវាយប្រហារឧក្រិដ្ឋកម្មនេះ គឺមានគោលបំណង រំខានមិនឲ្យអ៊ុយក្រែន ផលិតហ្គាស់ ដែលចាំបាច់សម្រាប់ការរស់នៅប្រចាំថ្ងៃរបស់ប្រជាជនខ្លួន»។

ចំណែកក្រសួងការពារជាតិរុស្ស៊ីឯណោះ ក៏អះអាងពីការវាយប្រហារនេះដែរ ហើយប្រកាសពីជោគជ័យនៃប្រតិបត្តិការដែលខ្លួន បានកំណត់គោលដៅលើទីតាំងឧស្សាហកម្មយោធា របស់អ៊ុយក្រែន។

ការវាយប្រហារនេះកើតឡើង ចំពេលលោក ត្រាំ និងលោក ហ្សេលេនស្គី កំពុងផ្ទុះសង្គ្រាមពាក្យសម្តីជាមួយគ្នា ដែលផ្តើមឡើង បន្ទាប់ពីគណៈប្រតិភូទីក្រុងវ៉ាស៊ីន បានជួបពិភាក្សាអំពីការបញ្ចប់សង្គ្រាមជាមួយមន្ត្រីជាន់ខ្ពស់រុស្ស៊ី នៅឯប្រទេសអារ៉ាប៊ីសាអូឌីត ទាំងដែលគ្មានវត្តមានទីក្រុងកៀវ។

លោក ហ្សេលេនស្គី បានបង្ហាញការខកចិត្តយ៉ាងខ្លាំងដែលសហរដ្ឋអាមេរិក មើលរំលងខ្លួនមិនអញ្ជើញឲ្យចូលរួម ហើយលោកប្រកាសកាលពីថ្ងៃចន្ទទី១៧ខែកុម្ភៈឆ្នាំ២០២៥ថា អ៊ុយក្រែន នឹងមិនទទួលស្គាល់លទ្ធផលនៃជំនួបនេះឡើយ។ 

យ៉ាងណាក្តី ក្រោយមកលោក ត្រាំ បានឆ្លើយតបវិញដោយបញ្ជាក់ថា​ «​ប្រសិនបើ​អ៊ុយក្រែន​ចង់​បាន​កៅអី​នៅ​តុចរចាមែន គួរតែរៀបចំការបោះឆ្នោតសិន»។ មិនត្រឹមប៉ុណ្ណឹង លោក ត្រាំ ថែមចោទ​ថា ​លោក​ ហ្សេលេនស្គី​​​នេះ​ឯង​ជាអ្នកធ្វើឲ្យសង្គ្រាមជាមួយរុស្ស៊ីផ្ទុះឡើងទៀតផង ហើយអ៊ុយក្រែនខ្លួនឯងទេដែលជាអ្នកបោះបង់ចោលឱកាសបញ្ចប់​សង្គ្រាមក្នុងរយៈពេល៣ឆ្នាំមកនេះនោះ។

មិនត្រឹមប៉ុណ្ណឹង ប្រមុខសេតវិមានបានហៅលោក ហ្សេលេនស្គី ថាជាជនផ្តាច់ការដែលគ្មានការបោះឆ្នោត​ និងជាអ្នកកំប្លែងដែលបោកយកជំនួយអាមេរិក ទៅជះក្នុងសង្រ្គាមដែលមិនអាចឈ្នះបាន៕

អត្ថបទ៖ សុខ សុវណ្ណ

ចុចអាន៖ មន្ត្រីអាមេរិក-រុស្ស៊ីទើប​ចរចាគ្នាចប់ ស្រាប់តែ​ ពូទីន ​លើកទ័ពចូលវាយតំបន់ថ្មីនៅអ៊ុយក្រែន