ថៃ ចាប់ផ្ដើមសាកល្បងវ៉ាក់សាំងការពារកូវីដ ផលិតក្នុងស្រុកលើមនុស្ស

រដ្ឋាភិបាលថៃនៅថ្ងៃចន្ទនេះបានចាប់ផ្តើមការសាកល្បងវ៉ាក់សាំងការពារជំងឺកូវីដ ១៩ ដែលផលិតក្នុងប្រទេសលើមនុស្ស ហើយរំពឹងថានឹងដាក់ឲ្យប្រើប្រាស់នៅឆ្នាំក្រោយ ។

ការចាក់វ៉ាក់សាំងរបស់ប្រទេសថៃកំពុងកំណត់គោលដៅចំនួនពាក់កណ្តាលនៃមនុស្សពេញវ័យរបស់ខ្លួននៅដំណាច់ឆ្នាំនេះដោយប្រើវ៉ាក់សាំងរបស់ក្រុមហ៊ុន AstraZeneca ចំនួន ៦១ លានដូសដែលនឹងត្រូវផលិតក្នុងស្រុកចាប់ពីខែមិថុនា ។

វ៉ាក់សាំងនេះកំពុងត្រូវបានបង្កើតឡើងដោយក្រុមហ៊ុនផលិតឱសថរបស់រដ្ឋ អង្គការឱសថរដ្ឋាភិបាល (GPO) ជាមួយនាយកដ្ឋានវេជ្ជសាស្ត្រនៃសាកលវិទ្យាល័យ Mahidol និងអង្គការមិនរកប្រាក់ចំណេញរបស់អាមេរិក និងប្រើវីរុសអសកម្មដើម្បីបង្កភាពស៊ាំ ។

លោក Piyasakol Sakolsatayadorn ប្រធានក្រុមប្រឹក្សាសាកលវិទ្យាល័យ Mahidol បានប្រាប់សន្និសីទសារព័ត៌មានថា “វ៉ាក់សាំងដែលផលិតដោយជនជាតិថៃសម្រាប់ប្រជាជនថៃត្រូវបានគេរំពឹងថានឹងត្រូវប្រើនៅឆ្នាំក្រោយ” ។

ចំណែកព្រឹទ្ធបុរសនៃសាកលវិទ្យាល័យ Mahidol លោក Bangjong Mahaisavariya បាននិយាយថា អ្នកស្ម័គ្រចិត្តចំនួន ៤៦០ នាក់នឹងត្រូវទទួលយកសម្រាប់ការសាកល្បងនេះ ក្នុងនោះ ២១០ នាក់នឹងត្រូវប្រើក្នុងដំណាក់កាលដំបូង ។ ដំណាក់កាលទី ២ ត្រូវបានរំពឹងថានឹងចាប់ផ្តើមនៅខែកក្កដាជាមួយនឹងលទ្ធផលនៅដំណាច់ឆ្នាំ ។

រីឯរដ្ឋមន្រ្តីក្រសួងសុខាភិបាលលោក Anutin Charnvirakul បាននិយាយថា វ៉ាក់សាំងនេះនឹងផ្តល់ជម្រើសកាន់តែច្រើនដល់ប្រទេសថៃជាមួយនឹងឧបសគ្គតិចបំផុត ។

លោកបានប្រាប់សន្និសីទសារព័ត៌មានថា “ទោះបីជាយើងអាចផលិតវ៉ាក់សាំងនៅក្នុងប្រទេសក៏ដោយក៏វាបានមកពីការផ្ទេរបច្ចេកវិទ្យា និងស្ថិតក្រោមការគ្រប់គ្រងរបស់ម៉ាកក្រុមហ៊ុន AstraZeneca ។ ប៉ុន្តែថ្ងៃនេះប្រសិនបើយើងទទួលបានជោគជ័យយើងអាចកំណត់ទិសដៅផ្ទាល់របស់យើង” ។

ទន្ទឹមនោះវ៉ាក់សាំងក្នុងស្រុកមួយផ្សេងទៀតកំពុងត្រូវបានបង្កើតឡើងដោយសាកលវិទ្យាល័យ Chulalongkorn និងប្រើប្រាស់បច្ចេកវិទ្យា Messenger RNA (mRNA) ហើយគេរំពឹងថានឹងចាប់ផ្តើមការសាកល្បងមនុស្សឆាប់ៗនេះ ។

គួរបញ្ជាក់ថា គិតត្រឹមពេលនេះប្រទេសថៃមានករណីឆ្លងជំងឺកូវីដ ១៩ សរុបចំនួន ២៧,៨៧៦ ករណី និងមានអ្នកស្លាប់ចំនួន ៩១ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ កូវីដនៅកម្ពុជានិងថៃ ថ្ងៃនេះដូចគ្នាបេះបិទ ទាំងអ្នកឆ្លងនិងស្លាប់

ចុចអាន ៖ ខណៈកូវីដផ្ទុះខ្លាំងឡើងវិញ ថៃហាមមិនឲ្យលេងបាញ់ទឹកដាក់គ្នាក្នុងពិធីបុណ្យចូលឆ្នាំថ្មី