ហ្សេលេនស្គី បង្ហាញសេចក្តីប្រកាសគ្រីមៀឆ្នាំ២០១៨ ដើម្បីឲ្យ ត្រាំ ភ្លឺភ្នែក

ប្រតិកម្មតបទៅលោក ដូណាល់ ត្រាំ ដែលបង្ខំឲ្យអ៊ុយក្រែន ទទួលស្គាល់ថា តំបន់គ្រីមៀជារបស់រុស្ស៊ី ជាថ្នូរនឹងកិច្ចព្រមព្រៀងសន្តិភាពនោះ ស្រាប់តែប្រមុខដឹកនាំទីក្រុងកៀវ វ៉ូឡូឌីមៀរ ហ្សេលេនស្គី បានបង្ហោះសេចក្តីប្រកាសឆ្នាំ២០១៨ ដែលរដ្ឋបាលអាណត្តិទីមួយរបស់លោក ត្រាំ ប្រឆាំងការកាត់យកឧបទ្វីបនេះពីសំណាក់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈបណ្តាញសង្គម X កាលពីថ្ងៃព្រហស្បតិ៍ទី២៤ខែមេសាឆ្នាំ២០២៥ លោក ហ្សេលេនស្គី បានបង្ហោះសេចក្តីប្រកាសគ្រីមៀឆ្នាំ២០១៨ ធ្វើឡើងដោយអតីតរដ្ឋមន្ត្រីការបរទេសអាមេរិក Mike Pompeo ដែលមានខ្លឹមសារសំខាន់ថា «សហរដ្ឋអាមេរិក សូមច្រានចោលការប៉ុនប៉ងដាក់បញ្ចូលឧបទ្វីបគ្រីមៀ ជារបស់រុស្ស៊ី ហើយសន្យារក្សាគោលនយោបាយនេះ រហូតដល់បូរណភាពទឹកដីរបស់អ៊ុយក្រែនត្រូវបានស្ដារឡើងវិញ»។

ភ្ជាប់ជាមួយសេចក្តីប្រកាសនោះ លោក ហ្សេលេនស្គី ក៏សរសេរ Caption ផងដែរថា «អ៊ុយក្រែន តែងតែធ្វើសកម្មភាពស្របតាមរដ្ឋធម្មនុញ្ញរបស់ខ្លួនជានិច្ច ហើយយើងប្រាកដណាស់ថា ដៃគូរបស់យើង ជាពិសេសសហរដ្ឋអាមេរិក នឹងធ្វើសកម្មភាពស្របតាមការសម្រេចចិត្តដ៏រឹងមាំរបស់ខ្លួន»។

នេះគឺជាការឆ្លើយតបរបស់ភាគីអ៊ុយក្រែន ទៅសហរដ្ឋអាមេរិក ដែលផ្លាស់ប្តូរគោលនយោបាយ១៨០ដឺក្រេ ហើយទៅចែងលក្ខខណ្ឌទទួលស្គាល់តំបន់គ្រីមៀនេះថាជារបស់រុស្ស៊ី នៅក្នុងផែនការសន្តិភាព។

យ៉ាងណាក៏ដោយ លោក ហ្សេលេនស្គី បានប្រកាសប្រឆាំងយ៉ាងដាច់អហង្ការថា ខ្លួនមិនទទួលស្គាល់ថាគ្រីមៀជារបស់រុស្ស៊ី ដាច់ខាត ដោយនិយាយថា «គ្រីមៀ គឺជាទឹកដីរបស់យើង ទឹកដីរបស់ប្រជាជនអ៊ុយក្រែន ហើយយើងគ្មានអ្វីត្រូវនិយាយអំពីប្រធានបទនេះទេ ព្រោះវានៅក្រៅរដ្ឋធម្មនុញ្ញរបស់យើង»។

សូមជម្រាបថា គ្រីមៀ បានរៀបចំធ្វើប្រជាមតិដើម្បីចូលរួមជាមួយរុស្ស៊ីក្នុងឆ្នាំ២០១៤ បន្ទាប់ពីរដ្ឋប្រហារប្រដាប់អាវុធដែលគាំទ្រដោយលោកខាងលិចនៅទីក្រុងកៀវ។

ទោះបីជាយ៉ាងណាក៏ដោយ រដ្ឋាភិបាលអ៊ុយក្រែនថ្មី រួមជាមួយអ្នកគាំទ្រលោកខាងលិចរបស់ខ្លួន មិនដែលទទួលស្គាល់លទ្ធផលនៃការធ្វើប្រជាមតិនោះទេ៕

អត្ថបទ៖ សុខ សុវណ្ណ

ចុចអាន៖ ត្រាំ ព្រមានថា អ៊ុយក្រែន អាចអស់ប្រទេសទាំងមូល បើមិនព្រមចរចាជាមួយរុស្ស៊ី