ត្រាំ ព្រមានថា អ៊ុយក្រែន អាចអស់ប្រទេសទាំងមូល បើមិនព្រមចរចាជាមួយរុស្ស៊ី

ក្នុងសារបង្ហោះលើបណ្តាញសង្គម Truth Social កាលពីថ្ងៃពុធទី២៣ខែមេសាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បានព្រមានថា អ៊ុយក្រែន អាចបាត់ប្រទេសទាំងមូលតែម្តង បើលោក វ៉ូឡូឌីមៀរ ហ្សេលេនស្គី នៅតែរឹងទទឹងមិនព្រមចូលតុចរចាជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារនោះ លោកត្រាំ ថែមទាំងចោទប្រកាន់ប្រធានាធិបតីអ៊ុយក្រែនជាសាធារណៈថា បានធ្វើឲ្យខូចដល់កិច្ចចរចាសន្តិភាព ព្រោះតែការបដិសេធទទួលស្គាល់តំបន់គ្រីមៀថាជារបស់រុស្ស៊ីផងដែរ។

មុននេះមួយថ្ងៃ លោក ហ្សេលេនស្គី បានប្រកាសប្រឆាំងយ៉ាងដាច់អហង្ការថា ខ្លួនមិនទទួលស្គាល់គ្រីមៀជារបស់រុស្ស៊ី ដាច់ខាត ក្រោយមានសេចក្តីរាយការណ៍ថា អាមេរិកបានដាក់រឿងទទួលស្គាល់នេះនៅក្នុងផែនការសន្តិភាព ដែលត្រៀមបង្ហាញអំឡុងកិច្ចប្រជុំទីក្រុងឡុងដ៍។

លោកហ្សេលេនស្គី ប្រាប់ទៅអ្នកសារព័ត៌មានថា «គ្រីមៀ គឺជាទឹកដីរបស់យើង ទឹកដីរបស់ប្រជាជនអ៊ុយក្រែន ហើយយើងគ្មានអ្វីត្រូវនិយាយអំពីប្រធានបទនេះទេ ព្រោះវានៅក្រៅរដ្ឋធម្មនុញ្ញរបស់យើង»។

មិនត្រឹមប៉ុណ្ណឹង លោកថែមទាំងព្រមានទៀតថា «ការពិភាក្សាបញ្ហាអធិបតេយ្យភាពគ្រីមៀនេះ មានតែនាំទៅរកការប្រយុទ្ធគ្នាកាន់តែខ្លាំងប៉ុណ្ណោះ។ ពេលណា យើងចាប់ផ្តើមនិយាយអំពីគ្រីមៀ អំពីទឹកដីអធិបតេយ្យរបស់យើង នោះយើងនឹងឈានចូលទម្រង់នៃការអូសបន្លាយសង្រ្គាម! នេះជាអ្វីដែលរុស្ស៊ីចង់បាន»។

យ៉ាងណាក៏ដោយ លោក ត្រាំ បានប្រតិកម្មខ្លាំងៗទៅនឹងការប្រឆាំងនេះ ដោយនិយាយថា «សេចក្តីថ្លែងការណ៍នេះ គឺមានគ្រោះថ្នាក់ខ្លាំងណាស់ចំពោះការចរចាសន្តិភាពជាមួយរុស្ស៊ី ទាំងដែលគ្រីមៀបានបាត់បង់ប៉ុន្មានឆ្នាំមកហើយ។ មេដឹកនាំអ៊ុយក្រែន ប្រហែលចង់អូសបន្លាយជម្លោះឲ្យកាន់តែយូរ»។

សូមជម្រាបជាថ្មី គ្រីមៀ បានរៀបចំធ្វើប្រជាមតិដើម្បីចូលរួមជាមួយរុស្ស៊ីក្នុងឆ្នាំ២០១៤ បន្ទាប់ពីរដ្ឋប្រហារប្រដាប់អាវុធដែលគាំទ្រដោយលោកខាងលិចនៅទីក្រុងកៀវ។ ទោះបែបនេះក្តី រដ្ឋាភិបាលអ៊ុយក្រែនថ្មី រួមជាមួយអ្នកគាំទ្រលោកខាងលិចរបស់ខ្លួន មិនដែលទទួលស្គាល់លទ្ធផលនៃការធ្វើប្រជាមតិនោះទេ៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ប្រកាសមិនទទួលស្គាល់ថា គ្រីមៀ ជារបស់រុស្ស៊ី ដាច់ខាត