នំ​ជំនួយ​ជីវជាតិ​ជាជំនួយ​របស់ WFP ត្រូវ​សង្ស័យថា លក់​បន្ត​នៅ​មីយ៉ាន់ម៉ា ខណៈ UN ព្រមាន​ចាត់ការ​

អង្គការសហប្រជាជាតិ (UN) បានប្រកាសថា ខ្លួននឹងចាត់វិធានការចំពោះអ្នកដែលលក់បន្តនូវនំ​ជំនួយ​ជីវជាតិដែលបានចែកចាយនៅតំបន់រងគ្រោះរញ្ជួយដីក្នុងប្រទេសមីយ៉ាន់ម៉ា។ នេះបើយោងតាមការចេញផ្សាយរបស់ Eleven Media Group នៅថ្ងៃទី២៥ខែមេសានេះ។

ទីភ្នាក់ងារ​ក​ម្មវិធី​ស្បៀងអាហារ​ពិភពលោក (WFP)​ នៃ​​​អង្គការសហប្រជាជាតិ បានឲ្យដឹងថា ខ្លួនបានដឹងពីការបង្ហោះតាមប្រព័ន្ធផ្សព្វផ្សាយសង្គមដែលអះអាងថា នំចំណីអាហារូបត្ថម្ភរបស់ WFP កំពុងត្រូវបានលក់នៅទីក្រុង Nay Pyi Taw តែមិនមានភស្តុតាងដើម្បីគាំទ្រការអះអាងទាំងនេះទេ ខណៈការចែកចាយនំអាហាររូបត្ថម្ភចុងក្រោយនៅទីក្រុង Nay Pyi Taw គឺនៅថ្ងៃទី១ខែមេសា។

WFP ថា«ជំនួយមនុស្សធម៌មិនគួរត្រូវបានលក់បន្តទេ។ WFP កំពុងតាមដានស្ថានភាពជាប្រចាំ ហើយនឹងចាត់វិធានការភ្លាមៗ ប្រសិនបើរកឃើញថាវាជាការពិត»។

អង្គការ​សហប្រជាជាតិ​ បាននិយាយថា នំចំណីដែលចែកចាយដោយ WFP មិនមែនជានំធម្មតាទេ ប៉ុន្តែជាផលិតផលអាហារបំប៉នពិសេស ត្រូវបានរចនាឡើងសម្រាប់ប្រើប្រាស់ភ្លាមៗក្នុងស្ថានភាពអាសន្ន ដូចជាការរញ្ជួយដីនាពេលថ្មីៗនេះ។

នំទាំងនេះមានម្សៅស្រូវសាលី ម្សៅសណ្តែក ស្ករ ម្សៅទឹកដោះគោ វីតាមីន និងសារធាតុរ៉ែដូចជា កាល់ស្យូម ម៉ាញេស្យូម ជាតិដែក អ៊ីយ៉ូត អាស៊ីតហ្វូលិក វីតាមីន B1 B2 B6 B12 និងផ្សេងៗទៀត។ នំ​នេះមិន​អាច​ផ្តល់​ដល់​កុមារ​អាយុ​ក្រោម​ប្រាំមួយ​ខែ​ទេ។ កុមារដែលមានអាយុលើសពី ៦ ខែទើបអាចញ៉ាំនំនេះបាន បន្ទាប់ពីពួកគេបៅដោះ ខណៈមនុស្សពេញវ័យអាចញ៉ាំនំនេះបានប្រាំកញ្ចប់ក្នុងមួយថ្ងៃ អាស្រ័យលើភាពស្រេកឃ្លានរបស់ពួកគេ។

នំទាំងនេះគឺជាផលិតផលជំនួយមនុស្សធម៌ដ៏សំខាន់ដែលត្រូវបានរចនាឡើងដើម្បីផ្តល់អាហារសង្គ្រោះបន្ទាន់ភ្លាមៗសម្រាប់អ្នកដែលមិនអាចមានលទ្ធភាពធ្វើម្ហូប ឬទិញអាហារធម្មតាក្នុងពេលមានអាសន្ន។ កម្មវិធីអាហារពិភពលោក (WFP) បានចាប់ផ្តើមចែកចាយនំដែលមានជីវជាតិនេះដល់ប្រជាជនដែលរងផលប៉ះពាល់តាំងពីរយៈពេល ៤៨ ម៉ោងបន្ទាប់ពីការរញ្ជួយដី។ នំនេះមិនមានសម្រាប់លក់ទេ ដោយអង្គការសហប្រជាជាតិកំពុងចែកចាយនំនេះដោយឥតគិតថ្លៃជាជំនួយសង្គ្រោះបន្ទាន់ដល់តំបន់រងគ្រោះរញ្ជួយដីនៅឡើយ។

គួរបញ្ជាក់ថា រញ្ជួយដីកម្រិត៧.៧រ៉ិចទ័រដែលបានវាយប្រហារកាលពីថ្ងៃទី២៨ខែមីនា បណ្ដាលឲ្យមនុស្សចំនួន ៥,៣៥២នាក់ស្លាប់, របួស ៧,១០៨នាក់ និងបាត់ខ្លួនចំនួន ៥៣៨នាក់ បើយោងតាម Mizzima News។ ប៉ុន្តែបើតាមក្រុមប្រឹក្សារដ្ឋបាលរដ្ឋរបស់របបយោធា មានមនុស្ស ៣,៧២៧ នាក់បានស្លាប់, ១២៩នាក់កំពុងបាត់ខ្លួន និង ៥,១០៦ នាក់បានរងរបួស។ លើសពីនេះមនុស្សប្រមាណ ៤ ម៉ឺនកំពុងស្នាក់នៅក្នុងតង់បណ្ដោះអាសន្ន ខ្វះទឹកស្អាតដែលបង្កើននិភ័យឆ្លងជំងឺផ្សេងៗ៕

អត្ថបទ៖ ប៊ុន សុភាព