ហ្សេលេនស្គី ថា បទឈប់បាញ់៣ថ្ងៃដែលប្រកាសដោយពូទីន គ្រាន់ជាឧបាយកលប៉ុណ្ណោះ!

ប្រតិកម្មទៅនឹងការប្រកាសបទឈប់បាញ់រយៈពេល៧២ម៉ោងពីសំណាក់ប្រធានាធិបតីរុស្ស៊ី វ្ល៉ាឌីមៀរ ពូទីន, មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី បានចាត់ទុកថា នោះគ្រាន់តែជាឧបាយកលប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាតាមទូរទស្សន៍នាពេលរាត្រីថ្ងៃចន្ទទី២៨ខែមេសាឆ្នាំ២០២៥ និងត្រូវបានយកមកចុះផ្សាយដោយសារព័ត៌មាន RT, លោក ហ្សេលេនស្គី បានរិះគន់ថា លោកពូទីន បានស្នើឲ្យមានបទឈប់បាញ់រយៈពេលខ្លីដើម្បីប្រារព្ធទិវាជ័យជម្នះ ប៉ុន្តែជីវិតមនុស្សគឺសំខាន់ជាងព្រឹត្តិការណ៍នេះ។

លោកហ្សេលេនស្គី បន្ទោសថា «មានឧបាយកលទៀតហើយ! ពូទីន ចង់ឲ្យបញ្ឈប់ការបាញ់ប្រហារ ដើម្បីផ្តល់ស្ងៀមស្ងាត់ពេលគាត់រៀបចំក្បួនដង្ហែទិវាជ័យជម្នះ។ យើងផ្តល់តម្លៃដល់ជីវិតមនុស្ស មិនមែនក្បួនព្យុហយាត្រានោះទេ។

ទន្ទឹមនោះ លោកហ្សេលេនស្គី បានសម្តែងការខកចិត្តយ៉ាងខ្លាំងដែលបទឈប់បាញ់ ត្រូវស្នើឡើងត្រឹមតែពីរបីថ្ងៃ ហើយបានអំពាវនាវឲ្យមានបទឈប់បាញ់ធំមួយនិងគ្មានលក្ខខណ្ឌ ដែលមានរយៈពេលយ៉ាងតិចក៏៣០ថ្ងៃដែរ។

ម្យ៉ាងវិញទៀត លោកហ្សេលេនស្គី បានចោទទីក្រុងមូស្គូថា តែងតែបដិសេធចំពោះកិច្ចខិតខំប្រឹងប្រែងរបស់ទីក្រុងកៀវនិងអ្នកគាំទ្ររបស់ខ្លួន ក្នុងការនាំយកសន្តិភាពនិងការធានាសន្តិសុខជានិច្ច។

សូមជម្រាបថា មុននេះ លោក ពូទីន បានប្រកាសបទឈប់បាញ់ជាឯកតោភាគីលើកទី២ ដែលមានរយ:ពេល៣ថ្ងៃ ចាប់ពីពាក់កណ្តាលអាធ្រាត្រថ្ងៃទី៨ខែឧសភាដល់ថ្ងៃទី១១ឧសភា ដែលស្របនឹងការប្រារព្ធទិវាជ័យជម្នះរំឭកដល់ការបញ្ចប់សង្គ្រាមលោកលើកទីពីរ។

សេចក្តីថ្លែងការណ៍របស់លោកពូទីន​ បញ្ជាក់ថា «រុស្ស៊ីជឿជាក់ថា ភាគីអ៊ុយក្រែនគួរតែធ្វើតាមគំរូនេះ។ ក្នុងករណីមានការរំលោភលើបទឈប់បាញ់ដោយភាគីអ៊ុយក្រែន កងកម្លាំងប្រដាប់អាវុធនៃសហព័ន្ធរុស្ស៊ីនឹងឆ្លើយតបឱ្យសមស្រប និងមានប្រសិទ្ធភាពបំផុត»។

ទោះបីជាយ៉ាងណាក៏ដោយ កាលពី២សប្តាហ៍មុន លោក ពូទីន ក៏ប្រកាសបទឈប់បាញ់ជាឯកតោភាគីម្តងដែរ ក្នុងអំឡុងពិធីបុណ្យ Easter ប៉ុន្តែបទឈប់បាញ់នោះត្រូវគេមើលឃើញថា ទទួលបរាជ័យ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន បញ្ជូនដ្រូនជាង១០០គ្រឿង ចូលដីរុស្ស៊ី ​វាយប្រហាររោងចក្រផលិតគ្រឿងបង្គុំមីស៊ីល