យោធាមីយ៉ាន់ម៉ាវាយប្រហារចំសាលារៀនសម្លាប់សិស្សសិស្សនិងគ្រូ២២នាក់

ការវាយប្រហារតាមផ្លូវអាកាសរបស់របបយោធាមីយ៉ាន់ម៉ាចំសាលារៀនមួយ​កន្លែង​​កាលពីថ្ងៃចន្ទបានសម្លាប់មនុស្ស ២២នាក់ រួមទាំងកុមារ ២០នាក់ បើទោះបីជាបទឈប់បាញ់មនុស្សធម៌​ស្ថិត​នៅ​ជា​ធរមាន​នៅឡើយ​​ក្រោយការ​ពន្យា​ម្តងហើយ​ម្តងទៀត​ ក្រោយគ្រោះរញ្ជួយដីដ៏បំផ្លិចបំផ្លាញក៏ដោយ។ យោងតាមការចេញផ្សាយរបស់កាសែត Bangkok Post នៅថ្ងៃទី១៣ខែឧសភានេះ។

សាក្សីដែលជាអ្នកស្រុក បាននិយាយថា ការវាយប្រហារនេះចំសាលារៀនមួយនៅក្នុងភូមិ Oe Htein Kwin ក្នុងតំបន់ Sgaing ចម្ងាយប្រហែល ១០០គីឡូម៉ែត្រ ភាគពាយព្យនៃចំណុចកណ្តាលនៃការរញ្ជួយដីថ្ងៃទី ២៨ ខែមីនា នៅម៉ោង ១០:០០ ព្រឹក (ម៉ោងក្នុងស្រុក)។

បើតាមសម្ដីគ្រូបង្រៀន​អាយុ ៣៤ឆ្នាំ​ម្នាក់​នៅ​សាលា​ដោយ​សុំ​មិន​បញ្ចេញ​ឈ្មោះ​ បាន​និយាយ​ថា​៖«មនុស្ស​សរុប ២២ នាក់ ក្នុង​នោះ​មាន​កុមារ ២០នាក់ និង​គ្រូ ២នាក់ ​ត្រូវ​បាន​សម្លាប់​ក្នុងការវាយប្រហារនេះ»។ លើសពីនេះដំបូលសាលានិងជញ្ជាំងបានរងការខូចខាត រូបភាពដែលបង្ហាញឲ្យឃើញពីកាតាបសិស្សសាលាគក្បែរដងទង់ជាតិ ខណៈឪពុកម្ដាយយំសោកគួរឲ្យសង្វេគ។

ប្រទេសមីយ៉ាន់ម៉ាបានរងនូវសង្រ្គាមស៊ីវិលចាប់តាំងពីយោធាបានទម្លាក់រដ្ឋាភិបាលស៊ីវិលនៅឆ្នាំ ២០២១ ដោយរបបយោធាបានទទួលរងនូវការខាតបង់យ៉ាងធ្ងន់ធ្ងរសោយសារការវាយដណ្ដើមពីក្រុមទ័ពព្រៃប្រឆាំងរដ្ឋប្រហារជាច្រើន និងក្រុមប្រដាប់អាវុធជនជាតិភាគតិច។

ប៉ុន្តែយោធាបានសន្យាថានឹងមានបទឈប់បាញ់ពេញមួយខែនេះ «ដើម្បីបន្តដំណើរការកសាង និងស្តារឡើងវិញ» បន្ទាប់ពីគ្រោះរញ្ជួយដីកម្រិត ៧.៧ រ៉ិចទ័រ ដែលបានសម្លាប់មនុស្សរាប់ពាន់នាក់។ ទោះបីជាយ៉ាងណាក៏ដោយ ក្នុងអំឡុងពេលបទឈប់បាញ់ អ្នកស្រុកមួយចំនួននៅភាគខាងកើតប្រទេសមីយ៉ាន់ម៉ាបាននិយាយថា ពួកគេត្រូវបានផ្លាស់ទីលំនៅនិងនៅតែរងការវាយប្រហារពីរបបយោធា។

អង្គការសហប្រជាជាតិ និងអ្នកឃ្លាំមើលជម្លោះឯករាជ្យបាននិយាយថា របបយោធាបានបន្តយុទ្ធនាការរបស់ខ្លួនក្នុងការទម្លាក់គ្រាប់បែកពីលើអាកាស បើទោះបីជាបទឈប់បាញ់សំដៅកាត់បន្ថយការឈឺចាប់និងសម្រាលទុក្ខពលរដ្ឋក៏ដោយ។

កាលពីសប្តាហ៍មុន អង្គការសហប្រជាជាតិបាននិយាយថា ចាប់តាំងពីការរញ្ជួយដីមក ជនស៊ីវិលជាង ២០០ នាក់ត្រូវបានសម្លាប់នៅក្នុងការវាយប្រហារដោយយោធាយ៉ាងហោចណាស់ ២៤៣ លើក រួមទាំងការវាយប្រហារតាមអាកាសចំនួន ១៧១ លើកផងដែរ៕

អត្ថបទ៖ ប៊ុន សុភាព