ស្លាប់​៥​​និង​របួស​ជាង​៥០នាក់​ក្នុង​ក្នុងហេតុ​ការណ៍​​បំផ្ទុះ​គ្រាប់​បែក​​ក្នុង​រថយន្ត​ដឹក​សិស្ស​​​នៅ​ប៉ាគីស្ថាន​

ការវាយប្រហារដោយបំផ្ទុះគ្រាប់បែកអត្តឃាតលើរថយន្តក្រុងដឹកសិស្សសាលារៀននៅទីក្រុង Khuzdar ភាគនិរតី​នៃ​​ប្រទេសប៉ាគីស្ថាន សម្លាប់មនុស្សចំនួន ៥នាក់ក្នុងនោះមានក្មេងស្រី​៣នាក់ និងរងរបួសចំនួន៥៣នាក់ដែលភាគច្រើនជាកុមារ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២២ខែឧសភានេះ។

ការបំផ្ទុះដ៏សាហាវនេះ បានកើតឡើង ខណៈ​ពេល​ដែលរថយន្តក្រុង​ដឹកសិស្ស​ទៅ​កាន់​សាលារៀន​ នៅក្នុងខេត្ត Balochistan ដែលជាតំបន់ដែលញាំញីដោយអំពើហិង្សារបស់ពួកផ្តាច់ខ្លួនជាយូរមកហើយ។

ទោះបីជាមិនមានក្រុមណាមួយចេញមុខអះអាងទទួលខុសត្រូវភ្លាមៗក៏ដោយ ការសង្ស័យត្រូវ​បាន​ភ្ជាប់​ទៅលើ​ក្រុមផ្តាច់ខ្លួនជនជាតិភាគតិច Baloch ជាពិសេសកងទ័ពរំដោះ Balochistan (BLA) ដែលមានប្រវត្តិវាយប្រហារបុគ្គលិកសន្តិសុខ និងហេដ្ឋារចនាសម្ព័ន្ធនៅក្នុងខេត្ត ខណៈសហរដ្ឋអាមេរិកបានកំណត់ក្រុមនេះជាអង្គការភេរវករនៅឆ្នាំ២០១៩ ។

រដ្ឋមន្ត្រីមហាផ្ទៃប៉ាគីស្ថាន លោក Mohsin Naqvi បានថ្កោលទោសការវាយប្រហារនេះថា ជាទង្វើដ៏​ព្រៃផ្សៃ ខណៈដែលនាយករដ្ឋមន្ត្រី​ប៉ាគីស្ថាន លោក Shehbaz Sharif និង​យោធាប៉ាគីស្ថាន បានស្តីបន្ទោសឥណ្ឌា ចំពោះការចោទប្រកាន់​ថា ​ប៉ាគីស្ថាន​បានគាំទ្រក្រុមសកម្មប្រយុទ្ធនៅក្នុងខេត្ត Balochistan។ ការ​ចោទ​ប្រកាន់​ទាំង​នេះ ​ឥណ្ឌា​មិន​បាន​ឆ្លើយ​តប​​យ៉ាងណា​នោះ​ទេ។

ខេត្ត Balochistan ថ្វីត្បិតតែជាខេត្តធំជាងគេរបស់ប្រទេសប៉ាគីស្ថានក៏ដោយ ​ប៉ុន្តែ​​មាន​ចំនួនប្រជាជនតិច និងមានសេដ្ឋកិច្ចទន់ខ្សោយ​ជាងគេ​​។ ប្រជាជនជនជាតិភាគតិច Baloch បានចោទប្រកាន់រដ្ឋាភិបាលជាយូរមកហើយថា មានការរើសអើង និងការកេងប្រវ័ញ្ចធនធានក្នុងស្រុក។ ខណៈពេលដែលការវាយប្រហាររបស់ពួកសកម្មប្រយុទ្ធមិនមែនជារឿង​ចម្លែកនោះទេ តែការផ្តោតទៅលើសិស្សសាលាគឺជារឿងដ៏កម្រ។

ការវាយប្រហារចុងក្រោយនេះក៏កើតឡើង ចំពេលមានការព្រមានកើនឡើងពី BLA ដែលថ្មីៗនេះបានប្តេជ្ញាថានឹងបង្កើនប្រតិបត្តិការប្រឆាំងនឹងយោធាប៉ាគីស្ថាន។ ក្រុមនេះអះអាងថា គោលដៅរបស់ខ្លួនគឺខេត្ត Balochistan ដើម្បីទាមទារឯករាជ្យ និងសន្តិភាព ទោះបីជាយុទ្ធសាស្ត្រហិង្សារបស់ខ្លួនបានទាក់ទាញការថ្កោលទោសយ៉ាងទូលំទូលាយក៏ដោយ៕

អត្ថបទ៖ ប៊ុន សុភាព