ប្រទេសមួយក្នុងតំបន់អាស៊ីត្រៀមអនុម័តប្រើប្រាស់វ៉ាក់សាំងចាក់តែមួយដូស Johnson & Johnson

ក្រុមប្រឹក្សាកូរ៉េខាងត្បូងបាននិយាយថា វ៉ាក់សាំងការពារជំងឺកូវីដ ១៩ ចាក់តែមួយដូសរបស់ក្រុមហ៊ុន Johnson & Johnson មានសុវត្ថិភាព និងប្រសិទ្ធភាព ។ នេះបើយោងតាមក្រសួងសុវត្ថិភាពចំណីអាហារ និងឱសថបាននិយាយនៅថ្ងៃចន្ទនេះ ។

នៅពេលទទួលបានភ្លើងខៀវ វ៉ាក់សាំង Johnson & Johnson នឹងក្លាយជាវ៉ាក់សាំងការពារជំងឺកូវីដ ១៩ ទីបីដែលត្រូវបានអនុញ្ញាតនៅក្នុងប្រទេសកូរ៉េខាងត្បូង បន្ទាប់ពីវ៉ាក់សាំង AstraZeneca និង Pfizer-BioNTech ដែលវ៉ាក់សាំងទាំងពីរនេះត្រូវការចាក់ ២ ដូស ។

កូរ៉េខាងត្បូងមានកិច្ចព្រមព្រៀងដើម្បីទទួលបានវ៉ាក់សាំង Johnson & Johnson ចំនួន ៦ លានដូស ហើយបាននិយាយថា ពួកគេនឹងត្រៀមខ្លួនសម្រាប់ការចាក់វ៉ាក់សាំងនេះចាប់ពីត្រីមាសទី ២ ។

ការអនុញ្ញាតិចុងក្រោយនៃវ៉ាក់សាំងនេះនឹងត្រូវបានសម្រេចច បន្ទាប់ពីគណៈកម្មាធិការជំនាញចំនួនពីរបន្ថែមទៀតបើកកិច្ចប្រជុំ ។

រហូតមកដល់ពេលនេះប្រទេសកូរ៉េខាងត្បូងបានចាក់វ៉ាក់សាំងដូសដំបូងចំនួន ៧៩៣,៩៦៦ ក្នុងចំណោមបុគ្គលិកពេទ្យ និងក្រុមដែលមានហានិភ័យខ្ពស់ចាប់តាំងពីចាប់ផ្តើមយុទ្ធនាការចាក់វ៉ាក់សាំងរបស់ខ្លួនកាលពីខែកុម្ភៈ ។

គួរបញ្ជាក់ថា គិតត្រឹមពេលនេះប្រទេសកូរ៉េខាងត្បូងមានករណីឆ្លងជំងឺកូវីដ ១៩ ចំនួន ១០២,១៤១ ករណី និងមានអ្នកស្លាប់ចំនួន ១,៧២៦ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ដំណឹងល្អ! វ៉ាក់សាំងចាក់តែមួយដូស Johnson & Johnson មានសុវត្ថិភាពលើមនុស្សអាយុលើស ១៨ ឆ្នាំ

ចុចអាន ៖ ដំណឹងល្អមួយទៀត! វ៉ាក់សាំងកូវីដចាក់តែមួយដូសរបស់ Johnson & Johnson បង្ហាញប្រសិទ្ធភាព ៦៦ ភាគរយ