ដំណឹងល្អ! វ៉ាក់សាំងចាក់តែមួយដូស Johnson & Johnson មានសុវត្ថិភាពលើមនុស្សអាយុលើស ១៨ ឆ្នាំ

ក្រុមជំនាញរបស់អង្គការសុខភាពពិភពលោក (WHO) បាននិយាយថា វ៉ាក់សាំងការពារជំងឺកូវីដ ១៩ របស់ក្រុមហ៊ុន Johnson & Johnson មានសុវត្ថិភាពសម្រាប់ប្រើលើមនុស្សដែលមានអាយុលើសពី ១៨ ឆ្នាំ ។

លោកវេជ្ជបណ្ឌិត Alejandro Cravioto ប្រធានក្រុមប្រឹក្សា​យុទ្ធសាស្ត្រ​នៃ​អ្នក​ជំនាញ​របស់​អង្គការ​ពិភពលោក ហៅកាត់ថា (SAGE) បាននិយាយថា “វ៉ាក់សាំងចាក់តែមួយដូសដែលត្រូវចាក់បញ្ចូលក្នុងសាច់ដុំមានសមត្ថភាពការពារមនុស្សបានច្រើន” ។

ក្រុមប្រឹក្សា SAGE បានបង្ហាញពីអនុសាសន៍បណ្តោះអាសន្នរបស់ខ្លួនស្តីពីការប្រើប្រាស់វ៉ាក់សាំង Johnson & Johnson នៅក្នុងសន្និសីទសារព័ត៌មានដែលរៀបចំដោយអង្គការសុខភាពពិភពលោកនៅទីក្រុងហ្សឺណែវ ។

វ៉ាក់សាំង Johnson & Johnson មានកិច្ចព្រមព្រៀងក្នុងការផ្តល់វ៉ាក់សាំងចំនួន ៥០០ លានដូសដល់កម្មវិធី COVAX ដែលដឹកនាំដោយអង្គការសុខភាពពិភពលោក ហើយព្យាយាមចែកចាយវ៉ាក់សាំងការពារជំងឺកូវីដ ១៩ ដល់អ្នកដែលត្រូវការបំផុត ។

ពួកគេបានជួបប្រជុំភ្លាមៗបន្ទាប់ពីបណ្តាប្រទេសអ៊ឺរ៉ុបរួមមានអាល្លឺម៉ង់ បារាំង អៀរឡង់ អ៊ីតាលី ហុល្លង់ ដាណឺម៉ាក និងន័រវែសបានផ្អាកការប្រើប្រាស់វ៉ាក់សាំង AstraZeneca ក្នុងរយៈពេលប៉ុន្មានសប្តាហ៍ថ្មីៗនេះ បន្ទាប់ពីមានរបាយការណ៍អំពីមនុស្សកើតដុំកំណកឈាមក្នុងសរសៃ ក្រោយទទួលការចាក់វ៉ាក់សាំង ។

ចំណែកលោកស្រីវេជ្ជបណ្ឌិត Annelies Wilder-Smith ទីប្រឹក្សាបច្ចេកទេសនៃលេខាធិការរបស់ SAGE បាននិយាយថា “មានករណីចំនួន ១៤ ក្នុងចំនោមមនុស្ស ២២,០០០ នាក់ដែលត្រូវបានធ្វើតេស្តវ៉ាក់សាំង Johnson & Johnson ។ ករណីស្ទះសរសៃឈាមពិតជាបាតុភូតនៃជំងឺកូវីដ ១៩ ដោយខ្លួនវាផ្ទាល់ ។ ហេតុដូច្នេះហើយយើងចាំបាច់ត្រូវរកមើលករណីសំខាន់ៗជាទូទៅផ្សេងទៀត” ។

ស្របពេលជាមួយគ្នានេះលោកស្រីវេជ្ជបណ្ឌិត Kate O’Brien ប្រធានផ្នែកចាក់ថ្នាំបង្ការ និងវ៉ាក់សាំងរបស់អង្គការសុខភាពពិភពលោកបានសង្កត់ធ្ងន់ថា “ព្រឹត្តិការណ៍កើតឡើងនៅពេលមនុស្សរាប់រយលាននាក់ត្រូវបានចាក់វ៉ាក់សាំង គឺជារឿងធម្មតាដែលកើតឡើងចំពោះមនុស្សទាក់ទងនឹងសុខភាពរបស់ពួកគេ ហើយវានឹងបន្តកើតមានតទៅទៀត” ។

គួររម្លឹកថា កាលពីថ្ងៃសុក្រសប្ដាហ៍មុនអង្គការសុខភាពពិភពលោកបានអនុម័តការចុះបញ្ជីឲ្យប្រើប្រាស់ជាបន្ទាន់នូវវ៉ាក់សាំងប្រឆាំងជំងឺកូវីដ ១៩ របស់ក្រុមហ៊ុន Johnson & Johnson ដែលការយល់ព្រមនេះគឺដើ​ម្បីពន្លឿនការប្រើប្រាស់ជាពិសេសនៅក្នុងប្រទេសដែលមានភ្នាក់ងារបទប្បញ្ញត្តិទន់ខ្សោយ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ដំណឹងល្អមួយទៀត! វ៉ាក់សាំងកូវីដចាក់តែមួយដូសរបស់ Johnson & Johnson បង្ហាញប្រសិទ្ធភាព៦៦ភាគរយ

ចុចអាន ៖ វ៉ាក់សាំងកូវីដចាក់តែមួយដូស ទទួលបានភ្លើងខៀវសម្រាប់ការប្រើប្រាស់ជាបន្ទាន់ពី WHO