ទីក្រុងមូស្គូ៖ ១០០% អង់គ្លេស ជួយអ៊ុយក្រែន ប្រព្រឹត្តអំពើភេរវកម្មនៅក្នុងដី រុស្ស៊ី

មួយរយៈចុងក្រោយនេះ ទឹកដីរុស្ស៊ីត្រូវរងការវាយប្រហារជាបន្តបន្ទាប់ពីសំណាក់អ៊ុយក្រែន ដូចជាការបំផ្ទុះស្ពាននៅតំបន់គ្រីមៀនិងការបាញ់ដ្រូនលើមូលដ្ឋានទ័ពចំនួន៥កន្លែងជាដើម ហើយជុំវិញរឿងទាំងនេះ ឥឡូវទីក្រុងមូស្គូ បានបញ្ជាក់យ៉ាងច្បាស់ថា ១០០%តែម្តង គឺអង់គ្លេស នៅពីក្រោយជួយទីក្រុងកៀវ ប្រព្រឹត្ត «អំពើភេរវកម្ម»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចោទប្រកាន់នេះគឺចេញពីមាត់រដ្ឋមន្ត្រីការបរទេសរុស្ស៊ី Sergey Lavrov អំឡុងវេទិកា «អនាគតឆ្នាំ២០៥០» នៅទីក្រុងមូស្គូ កាលពីថ្ងៃចន្ទទី៩ខែមិថុនា​ដោយលោកនិយាយថា «ហានិភ័យបានឡើងដល់កម្រិតគំរាមកំហែងភេរវកម្មហើយនៅក្នុងទឹកដីរុស្ស៊ី។ ជាការពិត ដ្បិតរឿងទាំងនេះជាស្នាដៃរបស់អ៊ុយក្រែនក៏ដោយ ប៉ុន្តែវាមិនមែនធ្វើឡើងដោយគ្មានការគាំទ្រពីចក្រភពអង់គ្លេសនោះទេ។ ពីមុនរឿងបែបនេះ មានការជួយដោយទាំងអាមេរិកនិងអង់គ្លេស ប៉ុន្តែឥឡូវនៅសល់តែអង់គ្លេសមួយគត់ ១០០%»។

ក្រោយពេលសហរដ្ឋអាមេរិក ហាក់ដកខ្លួនលែងសូវជួយអ៊ុយក្រែនដូចមុន គេឃើញមានមហាអំណាចអឺរ៉ុបមួយចំនួនចេញមុខមាត់ជាងគេក្នុងគាំទ្រទីក្រុងកៀវ ហើយក្នុងនោះរួមមានទាំងអង់គ្លេសនេះផងដែរ។

កាលពីសប្តាហ៍មុន ទីក្រុងឡុងដ៍ ​ប្រកាស​ថានឹងផ្គត់ផ្គង់​ដ្រូន ១០០ ០០០​គ្រឿងដល់អ៊ុយក្រែន​​ត្រឹមខែមេសា​ឆ្នាំ​២០២៦ ពោលគឺច្រើន​ជាង​មុន​​​១០​ដ​ង​​នៃ​ចំនួន​ដែលខ្លួន​ធ្លាប់​បាន​​​សន្យា។

គំនិតផ្តួចផ្តើមនេះ គឺជាផ្នែកមួយនៃកញ្ចប់ជំនួយយោធាដ៏​ធំ​​តម្លៃ​ជាង ៤,៥​ពាន់លានផោន ក្នុងគោលបំណងពង្រឹងសមត្ថភាពការពាររបស់អ៊ុយក្រែន ចំពេល​កំពុង​មានការឈ្លានពាន​ពី​រុស្ស៊ី។

បន្ថែមពីលើការចែកចាយ​ដ្រូន​ អង់គ្លេសក៏បញ្ចប់ការបញ្ជូន​គ្រាប់​កាំភ្លើងធំចំនួន ១៤០ ០០០​គ្រាប់ទៅកាន់អ៊ុយក្រែនដែរ គិតចាប់តាំងពីខែមករាមក ហើយនឹងបែងចែកប្រាក់បន្ថែមចំនួន ២៤៧​លានផោនទៀតនៅឆ្នាំនេះ ដើម្បីបណ្តុះបណ្តាលកងកម្លាំងអ៊ុយក្រែន។

សង្គ្រាម​រុស្ស៊ី-អ៊ុយក្រែន​នា​ពេល​បច្ចុប្បន្ន បាន​បង្ហាញ​ដល់​ពិភពលោក​ទាំង​មូល​ថា ដ្រូន​កំពុង​​ក្លាយ​ជា​អាវុធ​ និង​ជា​​យានជំនិះគ្មានមនុស្ស​បើក​​ដ៏​សំខាន់​នៅលើសមរភូមិទំនើប៕

អត្ថបទ៖ សុខ សុវណ្ណ

ចុចអាន៖ រុស្ស៊ី បន្តសងសឹកអ៊ុយក្រែនចាស់ដៃ, លើកនេះបញ្ជូនដ្រូនវាយប្រហារដល់ទៅជិត ៥០០គ្រឿង