ព័ត៌មានអន្ដរជាតិ

ខ្មាន់កាំភ្លើងបាញ់សម្លាប់មនុស្ស១៥០នាក់នៅប្រទេសនីហ្សេរីយ៉ា

បានផុស

១០ ខែ មុន

នៅ

ថ្ងៃអង្គារ ១៧ មិថុនា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៧ខែមិថុនានេះ កាលពីចុងសប្ដាហ៍មុន ខ្មាន់កាំភ្លើងបានវាយប្រហារសហគមន៍ Yelewata ក្នុងរដ្ឋ Benue ភាគខាងជើងកណ្តាលប្រទេសនីហ្សេរីយ៉ា ដោយមកដល់ពេលនេះ បានសម្លាប់មនុស្សយ៉ាងហោចណាស់ ១៥០នាក់ ។

ទាហានឈរយាមមុនពេលមន្ត្រីរដ្ឋាភិបាលមក (រូបភាព៖ AP)

ហេតុការណ៍ដ៏សាហាវនេះបានកើតឡើងនៅពេលដែលក្រុមជនដៃដល់បានវាយប្រហារកាលពីយប់ថ្ងៃសុក្រ លើអ្នកភូមិដែលកំពុងដេកលក់ និងដុតបំផ្លាញផ្ទះសម្បែង។ ជនរងគ្រោះជាច្រើននាក់បានទៅជ្រកកោននៅផ្សារក្នុងស្រុក បន្ទាប់ពីបានរត់គេចខ្លួនពីអំពើហិង្សាដ៏កាចសាហាវនេះ។

ខ្មាន់កាំភ្លើងត្រូវបានគេសង្ស័យថាជាអ្នកក្រុមប្រដាប់អាវុធរបស់ក្រុមអ្នកចិញ្ចឹមសត្វ ដែលជាផ្នែកមួយនៃជម្លោះកាន់តែខ្លាំងឡើងជាមួយកសិករក្នុងតំបន់ជុំវិញបញ្ហាដីធ្លី និងធនធានទឹក។ អ្នករស់រានមានជីវិត និងមន្ត្រីបានពណ៌នាអំពីអំពើហិង្សានេះថាវាឃោរឃៅខ្លាំង ដោយខ្មាន់កាំភ្លើងបានព័ទ្ធនៅជុំវិញភូមិដើម្បីការពារការរត់គេចខ្លួន។ ក្នុងចំណោមអ្នកស្លាប់មានគ្រួសារទាំងមូល រួមទាំងកុមារ។

បុរសម្នាក់មើលផ្ទះដែលត្រូវភ្លើងឆេះក្រោយការបាញ់ប្រហារ (រូបភាព៖ AP)

ប្រធានាធិបតី Bola Tinubu បានថ្កោលទោសការវាយប្រហារនេះថាជា «ការបង្ហូរឈាមដោយមិនដឹងខ្លួន» ហើយបានសន្យាថានឹងចាត់វិធានការយ៉ាងម៉ឺងម៉ាត់។ ការសម្លាប់ដ៏រង្គាលនេះក៏បានបំផ្លាញការផ្គត់ផ្គង់ស្បៀងផងដែរ ដោយបំផ្លាញការប្រមូលផលស្រូវ ដែលធ្វើឲ្យវិបត្តិមនុស្សធម៌ក្នុងតំបន់កាន់តែធ្ងន់ធ្ងរថែមទៀត។

សូមបញ្ជាក់ថាជម្លោះដែលកំពុងបន្តរវាងអ្នកចិញ្ចឹមសត្វ និងកសិករក្នុងស្រុកនៅតែជាគ្រោះថ្នាក់ដ៏ធ្ងន់ធ្ងរដល់សុវត្ថិភាព និងសន្តិភាពរបស់ប្រទេសនីហ្សេរីយ៉ា។ ឥឡូវនេះ ប្រជាពលរដ្ឋកាន់តែច្រើនឡើងកំពុងអំពាវនាវឱ្យរដ្ឋាភិបាលឈានជើងចូលដោះស្រាយ និងបញ្ឈប់អំពើហិង្សាឱ្យបានឆាប់រហ័ស៕