ព័ត៌មានអន្ដរជាតិ

មានករណីសង្ស័យ «សងសឹងនៅអាមេរិក» ដោយខ្មាន់កាំភ្លើងបាញ់សម្លាប់និងរបួសនៅរដ្ឋតិចសាស់

បានផុស

៤ ខែ មុន

នៅ

ថ្ងៃចន្ទ ២ មីនា ២០២៦

ដោយ

អាជ្ញាធរនៅរដ្ឋតិចសាស់ បានឱ្យដឹងថា មានខ្មាន់កាំភ្លើងម្នាក់បានសម្លាប់មនុស្សពីរនាក់ និងបណ្តាលឲ្យរងរបួសជាង១០នាក់នៅរដ្ឋតិចសាស់ ដោយសង្ស័យថា ជាការសងសឹងលើការវាយប្រហាររបស់សហរដ្ឋអាមេរិកលើប្រទេសអ៊ីរ៉ង់ សម្លាប់មេដឹកនាំកំពូលលោក អាលី ខាមេនី (Ali Khamenei) បណ្តាលឱ្យមានអ្នកស្លាប់ ជាពិសេសមានជនស៊ីវិលយ៉ាងច្រើនរងរបួស។ នេះបើយោងតាមប្រភពពីអាជ្ញាធរដោយប្រព័ន្ធផ្សព្វផ្សាយអាមេរិក។

លោកស្រី Lisa Davis មេប៉ូលិសក្នុងក្រុង Austin។ រូបភាព៖ KSL NewsRadio

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម RT ចុះផ្សាយថ្ងៃទី០២ខែមិនា ឆ្នាំ២០២៦ ការវាយប្រហារនេះកើតឡើងក្នុងសង្កាត់មួយក្នងពេលរាត្រីដ៏មមាញឹកក្នុងទីក្រុងអូស្ទីន (Austin) ជិតសាកលវិទ្យាល័យតិចសាស់ មុនម៉ោង២ ព្រឹកថ្ងៃអាទិត្យ។ យោងតាម លោកស្រី Lisa Davis ប្រធានប៉ូលិសក្នុងក្រុង Austin។

ជនសង្ស័យមានឈ្មោះ Ndiaga Diagne អាយុ ៥៣ឆ្នាំ បានបើកការបាញ់ប្រហារ នៅខាងក្រៅសួនច្បារស្រាបៀរ Buford’s Backyard Beer Garden ដោយសម្លាប់មនុស្សពីរនាក់ និងរបួសយ៉ាងហោចណាស់ ១៤នាក់ផ្សេងទៀត។

គួរឱ្យដឹងថា ពលរដ្ឋអាមេរិកដែលមានសញ្ជាតិដើមសេណេហ្គាល់(Senegal) បើកឡានឆ្លងកាត់ទីកន្លែងនោះច្រើនដង មុនពេលឈប់ និងបាញ់កាំភ្លើងខ្លីពីរថយន្ត SUV របស់ខ្លួនទៅលើមនុស្សប្រមូលផ្តុំគ្នានៅខាងក្រៅ នេះបើយោងតាមប្រធានប៉ូលីសរដ្ឋអូស្ទីន។

បន្ទាប់មក ខ្មាន់កាំភ្លើងចុះពីលើឡាន ដោយមានកាំភ្លើងវែងមួយដើម ហើយបន្តបាញ់ទៅលើអ្នកថ្មើរជើង មុនពេលមន្ត្រីប៉ូលីសបាញ់បុរសនោះវិញ។

ប្រភពពីមន្ត្រីអនុវត្តច្បាប់បានស៊ើបអង្កេតប្រាប់កាសែត New York Post ថា៖ « អំពើហិង្សានេះអាចជាទង្វើសងសឹកចំពោះការវាយប្រហាររបស់សហរដ្ឋអាមេរិកលើអ៊ីរ៉ង់»។

ចំណែកលោក Alex Doran ភ្នាក់ងារស្តីទីទទួលបន្ទុកការិយាល័យ FBI ក្នុងទីក្រុង San Antonio និយាយថា ការបាញ់ប្រហារនេះកំពុងត្រូវបានស៊ើបអង្កេតថាជាទង្វើភេរវកម្មដែលអាចកើតមាន។

លោក Doran បានបន្ថែមថា៖ « វាឆាប់ពេកក្នុងការធ្វើការសម្រេចចិត្តលើរឿងនេះ»។

ការស្ទង់មតិរបស់ Reuters/Ipsos ចេញផ្សាយកាលពីថ្ងៃអាទិត្យបានរកឃើញថា មានតែជនជាតិអាមេរិកម្នាក់ក្នុងចំណោម៤នាក់ប៉ុណ្ណោះដែលគាំទ្រការវាយប្រហារនេះ ដោយមានពាក់កណ្តាលនៃអ្នកឆ្លើយតបបាននិយាយថា ប្រធានាធិបតីអាមេរិក ដូណាល់ ត្រាំ ចង់ប្រើប្រាស់កម្លាំងយោធាខ្លាំងពេក៕

ប្រែសម្រួល៖ ណឺ មិនា