ព័ត៌មានអន្ដរជាតិ

ចិន៖ កុំឲ្យជម្លោះអ៊ីស្រាអែល-អ៊ីរ៉ង់ រាលដាលប៉ះពាល់ផ្លូវពាណិជ្ជកម្មសមុទ្រ

បានផុស

១២ ខែ មុន

នៅ

ថ្ងៃចន្ទ ២៣ មិថុនា ២០២៥

ដោយ

Chheang

ប្រទេសចិន បានសម្តែងការព្រួយបារម្ភយ៉ាងខ្លាំងថា ជម្លោះដែលកំពុងបន្តរវាងអ៊ីស្រាអែល និងអ៊ីរ៉ង់ ជាពិសេសក្រោយអាមេរិកទម្លាក់គ្រាប់បែកលើរោងចក្រនុយក្លេអ៊ែររបស់ទីក្រុងតេហេរ៉ង់ អាចប៉ះពាល់ដល់ផ្លូវសមុទ្រមជ្ឈិមបូព៌ា ដែលគំរាមកំហែងដល់សន្តិសុខដែនទឹកពិភពលោក និងការផ្គត់ផ្គង់ថាមពល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសចិន លោក Guo Jiakun បាននិយាយក្នុងសន្និសីទសារព័ត៌មានមួយនៅទីក្រុងប៉េកាំងនាថ្ងៃចន្ទទី២៣ខែមិថុនានេះថា «ឈូងសមុទ្រពែរ្ស និងដែនទឹកនៅក្បែរនោះ គឺជាផ្លូវដ៏សំខាន់សម្រាប់ពាណិជ្ជកម្ម និងទំនិញអន្តរជាតិ ព្រមទាំងថាមពល»។ លោកបានបន្ថែមថា «ការរក្សាតំបន់ឲ្យមានសុវត្ថិភាព និងស្ថិរភាព បម្រើផលប្រយោជន៍រួមរបស់សហគមន៍អន្តរជាតិ»។

ទន្ទឹមនោះ លោក Guo ក៏បានអំពាវនាវឲ្យសហគមន៍អន្តរជាតិ «លើកកម្ពស់ការបន្ថយជម្លោះ ដើម្បីបង្ការភាពចលាចលនៅក្នុងតំបន់មិនឲ្យមានផលប៉ះពាល់កាន់តែខ្លាំងលើលំហូរសេដ្ឋកិច្ចពិភពលោក»។

សេចក្ដីថ្លែងការណ៍របស់ចិន ធ្វើឡើងបន្ទាប់ពីសភាអ៊ីរ៉ង់ កាលពីព្រឹកថ្ងៃអាទិត្យបានអនុម័តសំណើបិទច្រកសមុទ្រ Hormuz ដែលជាច្រករបៀងសមុទ្រដ៏សំខាន់មានការដឹកជញ្ជូនប្រេង និងឧស្ម័នរបស់ពិភពលោកឆ្លងកាត់ប្រហែល ២០%។

ទោះបីជាយ៉ាងណាក៏ដោយ ឧត្តមសេនីយឯក Esmaeil Kowsari សមាជិកនៃគណៈកម្មការសន្តិសុខជាតិរបស់សភាអ៊ីរ៉ង់ បាននិយាយថា «ការសម្រេចចិត្តចុងក្រោយក្នុងរឿងបិទច្រកសមុទ្រ Hormuz គឺស្ថិតនៅលើឧត្តមក្រុមប្រឹក្សាសន្តិសុខជាតិ»។

លោក Guo បានជំរុញឲ្យសមាជិកក្រុមប្រឹក្សាសន្តិសុខអង្គការសហប្រជាជាតិគាំទ្រសេចក្តីព្រាងដំណោះស្រាយដោយរុស្ស៊ី ចិន និងប៉ាគីស្ថានដែលស្វែងរកបទឈប់បាញ់ជាបន្ទាន់ ដោយនិយាយថា ក្រុមប្រឹក្សា«មិនអាចនាំគ្នាអង្គុយនៅស្ងៀមទៀតបានទេ»។

លោកបានបញ្ជាក់ថា ការវាយប្រហាររបស់អាមេរិកលើទីតាំងនុយក្លេអ៊ែរអ៊ីរ៉ង់«ជាការបំពានយ៉ាងធ្ងន់ធ្ងរលើគោលបំណង និងគោលការណ៍នៃធម្មនុញ្ញអង្គការសហប្រជាជាតិ» ដោយបន្ថែមថា ទង្វើរបស់ទីក្រុងវ៉ាស៊ីនតោន បានធ្វើឲ្យភាពតានតឹងកាន់តែខ្លាំងឡើងនៅមជ្ឈិមបូព៌ា។

ជាមួយគ្នានេះដែរ លោក Guo បានប្រាប់ថា ចិនបានជម្លៀសពលរដ្ឋខ្លួនចំនួន ៣ ១២៥នាក់ពីប្រទេសអ៊ីរ៉ង់ និង ៥០០នាក់ផ្សេងទៀតពីប្រទេសអ៊ីស្រាអែល៕