AI និងព័ត៌មានមិនពិតធ្វើឲ្យនយោបាយហ្វីលីពីនកាន់តែវឹកវរ

ប្រទេសហ្វីលីពីនកំពុងមានការកើនឡើងយ៉ាងខ្លាំងនៃព័ត៌មានក្លែងក្លាយដែលបង្កើតឡើងដោយ AI ខណៈដែលការប្រកួតប្រជែងខាងនយោបាយរវាងអតីតប្រធានាធិបតី Rodrigo Duterte និងប្រធានាធិបតីបច្ចុប្បន្ន Ferdinand Marcos Jr. កាន់តែក្តៅគគុក។

បន្ទាប់ពីអតីតប្រធានាធិបតី Rodrigo Duterte ត្រូវបានចាប់ខ្លួនដោយតុលាការឧក្រិដ្ឋកម្មអន្តរជាតិ (ICC) កាលពីខែមីនា ពីបទឧក្រិដ្ឋកម្មជុំវិញអំពើហិង្សាបង្រ្កាបគ្រឿងញៀន គ្រួសារជនរងគ្រោះជាច្រើនបានចាប់ផ្តើមប្រឈមមុខនឹងរលកថ្មីនៃការវាយប្រហារតាមអ៊ីនធឺណិត។ ម្នាក់ក្នុងចំណោមពួកគេមាន Sheerah Escuerdo ដែលបានបាត់បង់ប្អូនប្រុសអាយុ ១៨ ឆ្នាំរបស់នាងឈ្មោះ Ephraim ក្នុងការបង្ក្រាបគ្រឿងញៀនរបស់លោក Duterte។ នាង​ធ្លាប់បាន​និយាយ​ជា​សាធារណៈ​ក្នុង​បទ​សម្ភាស​តាម​ទូរទស្សន៍​ដោយ​អំពាវនាវ​រក​យុត្តិធម៌។

ថ្មីៗនេះ Sheerah មានការភ្ញាក់ផ្អើលជាខ្លាំង នៅពេលដែលឃើញវីដេអូក្លែងក្លាយនៅលើ Facebook បង្ហាញពីរូបរាងដូចបងប្រុសរបស់នាង ដែលអះអាងថាគេនៅមានជីវិត ហើយចោទប្រកាន់នាងថានិយាយកុហកដើម្បីចង់បានប្រាក់។ វីដេអូនេះត្រូវបានបង្កើតឡើងដោយប្រើប្រាស់បច្ចេកវិទ្យា AI ហើយត្រូវបានចែករំលែកដោយអ្នកមានឥទ្ធិពលគាំទ្រលោក Duterte ជាមួយនឹងអ្នកតាមដានរាប់ពាន់នាក់។ វីដេអូបានរីករាលដាលយ៉ាងឆាប់រហ័ស ហើយមនុស្សជាច្រើនបានចាប់ផ្តើមបង្ហោះមតិស្អប់ខ្ពើមលើអ៊ីនធឺណិត ដោយចោទប្រកាន់ Sheerah និងក្រុមគ្រួសារជនរងគ្រោះថាបានភូតកុហក។

ព័ត៌មានមិនពិតប្រភេទនេះប្រើប្រាស់ដើម្បីបង្ខូចកេរ្តិ៍ឈ្មោះអ្នកដែលកំពុងនិយាយប្រឆាំងនឹងសកម្មភាពរបស់លោក Duterte ។ គ្រួសារជនរងគ្រោះផ្សេងទៀត និងអ្នកផ្សេងទៀតដែលគាំទ្រការស៊ើបអង្កេតរបស់ ICC ក៏ប្រឈមនឹងការវាយប្រហារតាមអ៊ីនធឺណិតស្រដៀងគ្នានេះដែរ ដោយគោលដៅ​គឺ​ដើម្បី​បំភ័យ​ប្រជាជន​ឲ្យ​នៅ​ស្ងៀម ហើយ​បញ្ឈប់​ពួកគេ​ពី​ការ​ទាមទារ​យុត្តិធម៌។

យុទ្ធនាការផ្សព្វផ្សាយព័ត៌មានមិនពិត ភាគច្រើនបង្កើតឡើងដោយអ្នកគាំទ្រ Duterte មានគោលបំណងបង្ខូចកេរ្តិ៍ឈ្មោះអ្នករិះគន់ និង ICC និងការពារកូនស្រីរបស់លោក Duterte គឺអនុប្រធានាធិបតី Sara Duterte ពីការចោទប្រកាន់កាន់តែខ្លាំងឡើង។

អ្នកជំនាញ បាននិយាយថា AI ឥឡូវនេះត្រូវបានប្រើប្រាស់មិនត្រឹមតែដើម្បីបង្កើតវីដេអូ និងរូបភាពក្លែងក្លាយប៉ុណ្ណោះទេ ប៉ុន្តែថែមទាំងសិក្សាពីនិន្នាការនយោបាយ និងជួយបង្កើតការឃោសនាផងដែរ។ ទោះបីជារដ្ឋាភិបាលបានព្យាយាមគ្រប់គ្រងការផ្សព្វផ្សាយព័ត៌មានក្លែងក្លាយ និងការប្រើប្រាស់ AI ខុសក៏ដោយ ក៏មនុស្សជាច្រើននៅតែមានការព្រួយបារម្ភ។ ការស្ទង់មតិបង្ហាញថា ប្រជាជនហ្វីលីពីនភាគច្រើនចង់បានទាំងលោក Rodrigo Duterte និងកូនស្រីអនុប្រធានាធិបតី Sara Duterte ប្រឈមមុខនឹងយុត្តិធម៌។

ជាមួយនឹងការបោះឆ្នោតពាក់កណ្តាលអាណត្តិឆ្នាំ ២០២៥ នឹងមកដល់ឆាប់ៗនេះ ព័ត៌មានមិនពិតកំពុងរីករាលដាលកាន់តែខ្លាំង និងមានឥទ្ធិពលឲ្យមនុស្សជឿ។ ក្នុងពេលជាមួយគ្នានេះ មានចម្ងល់ជាច្រើនដែល AI គួរតែត្រូវបានប្រើប្រាស់ក្នុងនយោបាយ និងថាតើវាត្រូវបានប្រើដោយយុត្តិធម៌ និងត្រឹមត្រូវដែរឬទេ៕

អត្ថបទ៖ ប៊ុន សុភាព