ព័ត៌មានអន្ដរជាតិ

ត្រាំ ប្រាប់ថា ចំណាប់ខ្មាំងនៅហ្គាហ្សា ១០នាក់ទៀតនឹងត្រូវបានដោះលែងឆាប់ៗ

បានផុស

១១ ខែ មុន

នៅ

ថ្ងៃសៅរ៍ ១៩ កក្កដា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានប្រកាសនៅល្ងាចថ្ងៃសុក្រទី១៨ខែកក្កដាថា ចំណាប់ខ្មាំង ១០នាក់ផ្សេងទៀត ដែលត្រូវបានឃុំខ្លួនក្នុងតំបន់ហ្គាហ្សា នឹងត្រូវដោះលែង«ក្នុងពេលដ៏ខ្លីខាងមុខ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានធ្វើការកត់សម្គាល់នេះ ក្នុងពេលពិសាអាហារពេលល្ងាចនៅសេតវិមានជាមួយសមាជិកសភាមកពីគណបក្សសាធារណរដ្ឋ ដោយសរសើរការចរចាដែលដឹកនាំដោយបេសកជនពិសេសអាមេរិក Steve Witkoff។

មេដឹកនាំអាមេរិក បាននិយាយថា «យើងបានទទួលចំណាប់ខ្មាំងភាគច្រើនត្រឡប់មកវិញ។ យើងនឹងមាន ១០នាក់ទៀតនឹងមកក្នុងពេលឆាប់ៗនេះ ហើយយើងសង្ឃឹមថានឹងបញ្ចប់វាយ៉ាងឆាប់រហ័ស»។ នេះគឺជាផ្នែកមួយនៃសំណើសម្រាប់បទឈប់បាញ់រយៈពេល ៦០ថ្ងៃ រវាងអ៊ីស្រាអែល និងក្រុមហាម៉ាស ដែលនៅក្នុងនោះមានការដោះលែងចំណាប់ខ្មាំងនៅរស់ចំនួន ១០នាក់ និងសាកសព ១៨នាក់ផ្សេងទៀត ជាថ្នូរនឹងការដោះលែងអ្នកជាប់ឃុំប៉ាឡេស្ទីនមួយចំនួននៅក្នុងប្រទេសអ៊ីស្រាអែល។

ការចរចាបានបន្តធ្វើឡើងនៅទីក្រុងដូហា ចាប់តាំងពីថ្ងៃទី៦ខែកក្កដា សម្របសម្រួលដោយអាមេរិក កាតា និងអេហ្ស៊ីប។ ខណៈពេលដែលទាំងអ៊ីស្រាអែល និងក្រុមហាម៉ាសបានសម្តែងការគាំទ្រចំពោះបទឈប់បាញ់បណ្តោះអាសន្ន មានការខ្វែងគំនិតគ្នាលើលក្ខខណ្ឌមួយចំនួន ជាពិសេសទាក់ទងនឹងការដកទ័ពអ៊ីស្រាអែល និងការធានាសម្រាប់បទឈប់បាញ់ជាអចិន្ត្រៃយ៍។

អ្នកនាំពាក្យដែលមានទំនាក់ទំនងជាមួយក្រុមហាម៉ាស បានទទួលស្គាល់ការបើកចំហររបស់ក្រុមចំពោះការផ្អាកបណ្តោះអាសន្នក្នុងការប្រយុទ្ធគ្នា ប៉ុន្តែបានសង្កត់ធ្ងន់ថា កិច្ចព្រមព្រៀងដ៏ទូលំទូលាយ និងយូរអង្វែង នៅតែចាំបាច់៕