ព័ត៌មានជាតិ

ថ្នាក់ដឹកនាំ និង មេយោធាថៃ ប្រឈម«ឧក្រិដ្ឋកម្មសង្គ្រាម» ដោយសារប្រើ F-16 និង Gripen C/D វាយប្រហារតំបន់វប្បធម៌ និងជនស៊ីវិល

បានផុស

២ នាទីutes មុន

នៅ

ថ្ងៃសៅរ៍ ២៦ កក្កដា ២០២៥

ដោយ

មេយោធាថៃសំខាន់ៗ ប្រឈម«ឧក្រិដ្ឋកម្មសង្គ្រាម» ដោយសារតែការចេញបញ្ជាឲ្យប្រើប្រាស់យន្តហោះចម្បាំង F-16 និង Gripen C/D វាយប្រហារតំបន់វប្បធម៌ និងជនស៊ីវិល ដែលជាបម្រាមដាច់ខាតក្នុងគោលដៅវាយប្រហារក្នុងសមរភូមិសង្គ្រាម។

កម្ពុជាអាចប្តឹង ប្រទេសថៃទៅកាន់តុលាការព្រហ្មទណ្ឌអន្តរជាតិ (ICC) ដោយសារតែថៃបើកការបាញ់ប្រហារតាមផ្លូវអាកាសដោយការប្រើប្រាស់យន្តហោះចម្បាំង F-16 របស់សហរដ្ឋអាមេរិក និង ប្រភេទ Gripen C/D ដែលប្រទេសថៃបានទិញពីប្រទេសស៊ុយអែត តាមរយៈការចុះកិច្ចព្រមព្រៀងកាលឆ្នាំ២០០៨ និងទទួលយកមកប្រើប្រាស់កាលឆ្នាំ២០១១ នៅចុងសង្គ្រាមជាមួយកម្ពុជានៅតំបន់ប្រាសាទព្រះវិហារ។ កម្ពុជាក៏អាចប្តឹងទៅកាន់ប្រទេសស៊ុយអែត ដែលលក់យន្តចម្បាំង Gripen C/D ឲ្យថៃផងដែរ។

ប្រភេទ Gripen C/D ដែលប្រទេសថៃបានទិញពីប្រទេសស៊ុយអែត។ armyrecognition

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានថៃ បានដកស្រង់ប្រភពពីកងទ័ពថៃ (RTA) និងមេញ្ជាការកងទ័ពជើងគោកភូមិភាគ២ អំពីការប្រើប្រាស់យន្តហោះចម្បាំង ប្រភេទ F-16 ដែលទិញពីអាមេរិក និងប្រភេទយន្តចម្បាំង Gripen C/D ពីប្រទេសស៊ុយអែតកាលឆ្នាំ២០១១ វាយប្រហារលើប្រទេសកម្ពុជា។

ការប្រើប្រាស់យន្តហោះចម្បាំងទាំងនោះក្នុងគោលដៅការពារខ្លួនគឺមិនខុសទេ ប៉ុន្តែការប្រើប្រាស់ដើម្បីគោលដៅវាយប្រហារឈ្លានពាន គឺខុសច្បាប់ ជាពិសេសនោះ គឺការប្រើប្រាស់វាយប្រហារលើទីតាំងជនស៊ីវិល មន្ទីរពេទ្យ ឬក៏ទីតាំងសម្បត្តិវប្បធម៌។

ការវាយប្រហារលើទីតាំងទាំងនេះត្រូវបានចែងថា ជា«ឧក្រិដ្ឋកម្មសង្គ្រាម»។

ប្រទេសថៃបានចាប់ផ្តើមទិញយន្តហោះចម្បាំងប្រភេទ Gripen C/D ដំបូងក្នុងឆ្នាំ២០០៨ ពេលដែលប្រទេសថៃបានបង្កជម្លោះរួចចូលឈ្លានពានកម្ពុជាលើតំបន់ប្រាសាទព្រះវិហារ ក្រោយកម្ពុជាបានដាក់បញ្ចូលតំបន់ប្រាសាទព្រះវិហារចូលជាសម្បត្តិបេតិកភណ្ឌពិភពលោកដោយជោគជ័យ។

តំបន់ប្រាសាទព្រះវិហារ កម្ពុជាបានឈ្នះក្តីនៅតុលាការយុត្តិធម៌អន្តរជាតិកាលឆ្នាំ១៩៦២។ តំបន់បុរាណដ្ឋានដ៏ពិសិដ្ឋនេះ ត្រូវបានថៃចូលឈ្លានពានកាន់កាប់ ដោយខុសច្បាប់រំលោភលើផែនទីដែលរដ្ឋាភិបាលសៀម (បច្ចុប្បន្នថៃ) បានចុះហត្ថលេខាយល់ព្រមក្នុងឆ្នាំ១៩០៤-១៩០៧៕

រ៉ាន់ រើយ