លោក Conor បានបញ្ចេញមតិ​ជា​អង់​គ្លេស ចាក់​ដោត ដោយ​ចម្ងល់ ហេតុ​អ្វី​ថៃមិន​ចង់​ឲ្យ​ភាគីទី​ ៣ ជួយ​សម្រុះ​សម្រួល

គ្រូបង្វឹករបស់ក្លិបបាល់ទាត់ បឹងកេត លោក Conor Nestor បានបញ្ចេញសំណេរមួយជាភាសា អង់គ្លេស យ៉ាងចាក់ដោត នៅលើទំព័រហ្វេសប៊ុកផ្លូវការរបស់លោក អំពីបញ្ហាជម្លោះព្រំដែនរវាង កម្ពុជា និង ថៃ។

បញ្ហាព្រំដែនរវាងកម្ពុជា និង ថៃ នៅតែបន្តឡើងកម្តៅខ្លាំងគិតត្រឹមថ្ងៃទី ២៦ ខែ កក្កដា ឆ្នាំ ២០២៥ ។ យ៉ាងណា បន្ទាប់ពីមានជម្លោះនេះកើតឡើង ថៃ បានប្រកាសប្រាប់អន្តរជាតិ ថា កម្ពុជាជាអ្នកចាប់ផ្តើមសង្គ្រាមមុន។ ចំណែក កម្ពុជា វិញបានឈរលើភាពត្រឹមត្រូវ ដោយអះអាងថា ថៃគឺជាអ្នកចាប់ផ្តើមសង្គ្រាមនេះមុន។

ដកស្រង់សំណេរដើមរបស់ បុរសសញ្ជាតិ អៀរឡង់ វ័យ ៤១ ដែលបកប្រែពីភាសា អង់គ្លេស មកខេមរភាសាបានឱ្យដឹងថា៖ «…អ្នកនិយាយថាអ្នកចង់បានសន្តិភាព នេះជាអ្វីដែលរដ្ឋាភិបាលថៃកំពុងនិយាយ ហេតុអ្វីបានជាអ្នកបដិសេធការសម្រុះសម្រួល ហើយបែរ​ជាសុំកិច្ចព្រមព្រៀងទ្វេភាគីជំនួសវិញ? បើ​កម្ពុជា​ចាប់​ផ្តើម​មាន​ជម្លោះ​ដូច​រដ្ឋាភិបាល​ថៃនិយាយពិតមែន ហេតុអ្វី​បាន​ជា​អ្នក​ទុក​ចិត្ត​ក្នុង​កិច្ច​ព្រមព្រៀង​ទ្វេភាគីទៅវិញ? នៅពេល​ការជឿទុកចិត្តត្រូវបានអស់សេចក្តីទុកចិត្ត ការសម្របសម្រួលគឺតែងតែត្រូវការ ប៉ុន្តែនៅពេលដែលអ្នកជាអ្នកឈ្លានពាន ការសម្របសម្រួលគឺជាការគំរាមកំហែងដល់គោលដៅចុងក្រោយរបស់អ្នក។ ខ្ញុំសង្ឃឹមថា សារព័ត៌មានអន្តរជាតិចាប់ផ្តើមឃើញអ្វីច្បាស់ កម្ពុជាជ្រើសរើសសន្តិភាព សុំបទឈប់បាញ់ និងទទួលយកការសម្រុះសម្រួល តែថៃ​បដិសេធ។ កម្ពុជា​ទទួល​យក​ច្បាប់​ក្នុង​សំណុំរឿង​តុលាការ​យុត្តិធម៌​អន្តរជាតិ តែថៃ​មិនព្រម»។

ពាក់ព័ន្ធនឹងបញ្ហានេះ លោក Conor Nestor បានបញ្ចេញមតិជាភាសាអង់គ្លេស ប្រាប់ទៅអ្នកគាំទ្ររបស់លោក ជាពិសេសមិត្តៗរបស់លោកជាជនបរទេសយ៉ាងដូច្នេះថា នៅក្នុងកាលៈទេសៈនេះ វាជាពេលមួយ ដែលពិបាកបែងចែក ថាព័ត៌មានណាពិត ឬមិនពិត។ ប៉ុន្តែបើផ្អែកលើហេតុផល តាមដែលថៃនិយាយថា កម្ពុជា ពិតជាអ្នកចាប់ផ្តើមសង្រាមមុនពិតមែន ចុះហេតុអ្វីបានជាថៃមិនព្រមទទួលយកការសម្របសម្រួល ហើយបែទទូចស្នើសុំការចរចាជាលក្ខណៈទ្វេភាគីទៅវិញ។ ជាមួយគ្នានេះលោកសង្ឃឹមថា សារព័ត៌មានអន្តរជាតិចាប់ផ្តើមមើលឃើញពីអ្វីដែលជាការពិត ដោយកម្ពុជាជ្រើសរើសសន្តិភាព សុំបទឈប់បាញ់ និងទទួលយកការសម្រុះសម្រួល ប៉ុន្តែថៃទៅវិញទេ ដែលតែងតែមិនព្រម។

គួរឱ្យដឹងថា ក្រៅពីលោក Conor Nestor ក៏មានកីឡាករបរទេសមួយចំនួន ដែលកំពុងប្រកបអាជីពនៅកម្ពុជា ដូចជាខ្សែប្រយុទ្ធស្លាបរបស់ វិសាខា Jung-bin Park និងខ្សែការពាររបស់ ភ្នំពេញក្រោន កីឡាករ Yi Young Park បានបញ្ចេញប្រត្តិកម្មលើរឿងនេះផងដែរ៕

អត្ថបទ៖ សេម កុសល