ទឹកចិត្ត Miss Cosmo អាមេនី ជួយអំពាវនាវជនភៀសសឹក កម្ពុជា ក្លាយជាកម្លាំងចលករដ៏មហិមាពុំកាត់ថ្លៃបាន

បវរកញ្ញា Lilia Gzraryan ដែលទស្សនិកជនស្គាល់ថាជាបេក្ខភាព Miss Cosmo Armenia ឆ្នាំ២០២៤ នាពេលនេះ នាងបានសស្រាកស្រាំយ៉ាងខ្លាំងក្លា ដោយអំពាវនាវទៅដល់មហាជន តាមរយៈការផុសស្ទូរី (story IG) នៅគណនីផ្ទាល់ខ្លួន ដែលនោះបានសបង្ហាញឲ្យដឹងថា ថ្វីដ្បិតតែនាងមិនមែនកើតលើទឹកដីសុវណ្ណភូមិ តែនាងមានបេះដូងសប្បុរស និងបរិសុទ្ធស្អាត ធំជាងអ្វីៗទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការបង្ហោះនូវសំណេរវែងអន្លាយនោះដែរ បវរញ្ញាវ័យ២២ឆ្នាំរូបនេះ បានសុំនូវការបរិច្ចាគនិងជំនួយគ្រប់ប្រភេទដែលបងប្អូនអាចមានលទ្ធិភាពបរិច្ចាគបាន ពិសេសរបស់របរនិងថ្នាំសង្កូវសង្រ្គោះបឋមដែលអាចព្យាបាលរបួសភ្លាមៗ។ ការបរិច្ចាគមានទីតាំងនៅសួនវត្តបុទម នាវេលាម៉ោង៨ព្រឹកដល់១២ថ្ងៃត្រង់។

បន្ទាប់ពីរូបភាពប៉ុន្មានសន្លឹករបស់ជនភៀសសឹកកម្ពុជា បានចែកចាយភ្លាមៗនោះ អ្នកគាំទ្ររួមមហាជនជាច្រើនបានចូលទៅបញ្ចេញមតិសរសើរ និងអរគុណសម្រាប់ទឹកចិត្តដ៏ថ្លៃថ្លាមិនអាចកាត់ថ្លៃបាន នៅក្នុងនាមនាងជា Miss Cosmo Armenia ឆ្នាំ២០២៤។

បើទោះបីជាបវរកញ្ញារូបនេះមិនបានកើតនៅលើទឹកដីកម្ពុជាមែនពិត តែនៅក្នុងនាមជាមនុស្សជាតិដូចគ្នាដែលស្អប់ខ្ពើមសង្គ្រាម ស្អប់ការឈ្លានពានពីសត្រូវ នាំឲ្យរូបនាងក្លាយជាកម្លាំងចលករដ៏មហិមាមួយ ព្រមទាំងជាសំឡេងមួយដែលស្រែកដល់ពិភពលោកថា ប្រជាជនកម្ពុជាចង់បានសន្តិភាពមិនមែនការរត់ភៀសខ្លួនចោលផ្ទះសម្បែង ព្រោះកម្ពុជាបានឆ្លងកាត់នូវសង្គ្រាមឆ្អែតឆ្អន់ហើយ។

សូមជម្រាបជូនថា Lilia Gzraryan បានបញ្ចប់បរិញ្ញាបត្រផ្នែកទំនាក់ទំនងអន្តរជាតិ និងជាអ្នករៀបចំព្រឹត្តិការណ៍អន្តរជាតិជាផ្លូវការនៅសាកលវិទ្យាល័យ Samara។ នាងមាន​ចំណង់​ចំណូល​ចិត្ត​លើ​វិស័យ​ប្រដាល់ និង​មាន​បទពិសោធន៍​៤​ឆ្នាំ​ក្នុង​កីឡា​នេះ។ នាង​ក៏មាន​ជំនឿ​យ៉ាងមុតមាំថា ការ​ប្រដាល់​បាន​ជួយ​នាង​អភិវឌ្ឍ​វិន័យ​ក្នុង​ជីវិត។

តាំងពីកុមារភាពមក នាងចូលចិត្តតន្ត្រី និងជាអ្នកគាំទ្ររបស់ Michael Jackson និង Ariel Rivera ។ Lilia មានចំណង់ខ្លាំងក្នុងការរៀនភាសា នាងនិយាយភាសាអាមេនី រុស្ស៊ី និងអង់គ្លេស ហើយកំពុងរៀនភាសាចិន អេស្ប៉ាញ និងតាហ្គាឡុក(Tagalog) ផងដែរ៕

អត្ថបទ៖ សាង ស្រីល័ក្ខ

ចុចអាន៖ថៃឆ្លើយទាំងបំពានឥតខ្មាស់ថា មិនបានប្រើ ​F-16 វាយ​ប្រហារ​ជន​ស៊ីវិលទេ