ព័ត៌មានអន្ដរជាតិ

ថាក់ស៊ីន អួតក្ដែងៗមុខអ្នកកាសែតថា UNSC មិនជ្រៀតជ្រែកទេ ហើយគឃ្លើនឲ្យយោធាឆ្ពោះទៅមុខ

បានផុស

១២ ខែ មុន

នៅ

ថ្ងៃសៅរ៍ ២៦ កក្កដា ២០២៥

ដោយ

អតីតនាយករដ្ឋមន្ត្រីថៃ ថាក់ស៊ីន នៅថ្ងៃទី ២៦ កក្កដា ២០២៥នេះ បានប្រកាសអួតក្ដែងៗនៅចំពោះមុខក្រុមអ្នកកាសែត ដោយជឿជាក់យ៉ាងមុតមាំថា ក្រុមប្រឹក្សាសន្តិសុខអង្គការសហប្រជាជាតិ (UNSC) មិនជ្រៀតជ្រែកឬលូកដៃចូលឡើយ ហើយលោកបានបន្តគាំទ្រយោធាថៃ ឲ្យឆ្ពោះទៅមុខធ្វើតាមយុទ្ធសាស្ត្រឈ្លានពានកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់អតីតនាយករដ្ឋមន្ត្រីរូបនេះ ស្របពេលដែលលោកបានចុះទៅសួរសុខទុក្ខជនភៀសខ្លួននៅខេត្ត Ubon Ratchathani ហើយឆ្លៀតឪកាសទាញយកប្រជាប្រិយខ្លួនឡើងវិញ តាមរយៈការអួតបំប៉ោងអំណាចឲ្យពលរដ្ធខ្លួនជឿជាក់។

ថាក់ស៊ីនបាននិយាយថា កន្លងមកលោកធ្លាប់បានពិភាក្សាជាមួយយោធារួចមកហើយ ដោយឲ្យពួកគេធ្វើតាមយុទ្ធសាស្ត្រ ពេលសមរភូមិចប់។ ចំពោះករណីដែលកម្ពុជាបានបញ្ជូនរឿងនេះទៅកាន់ក្រុមប្រឹក្សាសន្តិសុខអង្គការសហប្រជាជាតិ លោកជាអ្នកផ្តួចផ្តើមគំនិតមុនគេ នោះគឺតាមច្បាប់អន្តរជាតិ បើថៃមិនទៅតុលាការអន្តរជាតិទេ ក៏គ្មានបញ្ហាអ្វីកើតឡើងដែរ។

មិនតែប៉ុណ្ណោះ អតីតជនប្រមាថព្រះមហាក្សត្រខ្លួនឯងនេះថែមទាំងប្រកាសទៀតថា ប្រទេសថៃចង់ឲ្យកម្ពុជាមកពិភាក្សាទ្វេភាគី ហើយថៃមិនទទួលយកសិទ្ធិអំណាចរបស់តុលាការយុត្តិធម៌អន្តរជាតិទេ។ ជាពិសេស នៅលើពិភពលោកមានប្រទេសជាង ៧០ ដែលទទួលយកសិទ្ធិអំណាចរបស់តុលាការយុត្តិធម៌អន្តរជាតិក្នុងចំណោម ១៩៦ ប្រទេស។ ចំណែកថៃ ស្ថិតនៅក្នុងក្រុមប្រទេសដែលមិនទទួលយកសិទ្ធិអំណាចរបស់តុលាការយុត្តិធម៌អន្តរជាតិ ដោយសារពួកគេជឿជាក់ថា ខ្លូនមិនមែនជាអ្នកឈ្លានពាន ដូចនេះ គ្មាននរណាមានសិទ្ធិយកថៃទៅតុលាការពិភពលោកទេ។

ទោះជាយ៉ាងណាក៏ដោយ ការលើកឡើងរបស់លោកថាក់ស៊ីនដោយមិនចេះអៀនខ្មាស់នេះ គឺផ្ទុយស្រឡះទាំងស្រុងទាំងដែលយោធាថៃបាននិងកំពុងឈ្លានពានកម្ពុជាតាមរយៈការប្រើយន្តហោះ F-16 គ្រាប់បែកចង្កោម ព្រមទាំងប្រើប្រាស់គ្រប់អាវុធធន់ធ្ងន់គ្រប់ប្រភេទ មកលើជនស៊ីវិលជាច្រើន ព្រមទាំងបំផ្លិចបំផ្លាញទីតាំងជុំវិញនៃរចនាសម្ព័ន្ធផ្ទាល់របស់ប្រាសាទព្រះវិហារ ដែលជាបេតិកភណ្ឌពិភពលោក និងជាមរតកវប្បធម៌ប្រវត្តិសាស្ត្រដ៏ថ្លៃថ្លារបស់ប្រជាជនខ្មែរ៕