ម្ចាស់ផ្ទះថៃ កំពុងពិចារណាហាម កម្ពុជា ចូលប្រកួតកីឡាស៊ីហ្គេម ២០២៥

រដ្ឋមន្ត្រីក្រសួងទេសចរណ៍ និងកីឡារបស់ថៃ លោក សូរាវង្ស ធានថង (Sorawong Thienthong) កំពុងពិចារណាមិនឱ្យអត្តពលិក កម្ពុជា ចូលរួមការប្រកួតក្នុងព្រឹត្តិការណ៍កីឡាស៊ីហ្គេម លើកទី ៣៣ នៅចុងឆ្នាំ ២០២៥ នេះ ដែលថៃធ្វើជាម្ចាស់ផ្ទះ បន្ទាប់ពី កម្ពុជា និង ថៃ បាននិង​កំពុងមានជម្លោះព្រំដែនជាមួយគ្នា។

យោងតាមប្រភពរបស់សារព័តមាន ថៃ Thai PSB World បានឱ្យដឹងថា មូលហេតុ ដែលលោក សូរាវង្ស ធានថង មិនចង់ឱ្យ កម្ពុជា ចូលរួមក្នុងព្រឹត្តិការណ៍កីឡាស៊ីហ្គេមនៅចុងឆ្នាំ ២០២៥ នេះ ដោយលោកមានការព្រួយបារម្ភចំពោះសុវត្ថិភាពរបស់អត្តពលិក កម្ពុជា នៅ​ប្រទេស​ថៃ​ ខណៈភាគីប្រទេសទាំង ២ នៅតែឡើងកម្តៅ និងកំពុងបន្តប៉ះគ្នាដោយអាវុធនៅតាមព្រំដែន។

ទាក់ទងនឹងរឿងនេះដែរ លោក សូរាវង្ស បានលើកឡើងថា ៖«ខ្ញុំគឺបារម្ភអំពីអំពើហិង្សាដែលអាចកើតមានឡើង បន្ទាប់ពីមានការប៉ះទង្គិចគ្នារវាង ថៃ និងកម្ពុជា។ វាអាចនឹងជះឥទ្ធិពលដល់តួនាទីរបស់ ថៃ ក្នុងការធ្វើជាម្ចាស់ផ្ទះកីឡាស៊ីហ្គេម។ ជាពិសេស គឺសុវត្ថិភាពរបស់អត្តពលិកកម្ពុជាអំឡុងពេលព្រឹត្តិការណ៍នេះ»។

គួរឱ្យដឹងថា កាលពីខែ មិថុនា កន្លងទៅ មុនពេលបញ្ហាព្រំដែនឡើងកម្តៅខ្លាំងបែបនេះ លោក វ៉ាត់ ចំរើន រដ្ឋ​លេខាធិការ​ក្រសួង​អប់រំ យុវជន​ និង​កីឡា និង​ជា​ អគ្គលេខាធិការ​នៃ គណៈកម្មាធិការជាតិអូឡាំពិកកម្ពុជា បានបញ្ជាក់ថា កម្ពុជា នៅតែមានឆន្ទៈចូលរួមប្រកួតកីឡាស៊ីហ្គេមនៅ ថៃ ចុងឆ្នាំនេះ ដោយលើកហេតុផលថា កីឡា មិនពាក់ព័ន្ធនឹងនយោបាយឡើយ។ ប៉ុន្តែគិតត្រឹមថ្ងៃទី ២៥ ខែ កក្កដា ឆ្នាំ ២០២៥ នេះ គឺគណៈកម្មាធិការជាតិអូឡាំពិកកម្ពុជា មិនទាន់មានអ្វីធ្វើបច្ចុប្បន្នភាពថ្មី អំពីការចូលរួម ឬមិនចូលរួមនៅឡើយទេ។ ព្រឹត្តិការណ៍កីឡាស៊ីហ្គេម លើកទី ៣៣ នៅ​ថៃ​ គ្រោងនឹងរៀបចំនៅខែ ធ្នូ ចុងឆ្នាំ ២០២៥ ៕

ប្រែសម្រួល៖ សេម កុសល
ប្រភព៖ Thai PSB World