ប្រមុខការទូតកម្ពុជា ចាត់តំណាងចូលរួមកិច្ចប្រជុំបន្ទាន់ របស់ក្រុមប្រឹក្សាសន្តិសុខ​ UN ជុំវិញការឈ្លាន ពានពីកងទ័ពថៃ

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បាន​​​ចាត់តំណាង រៀបចំ​ឱ្យឯកអគ្គរាជទូត និងជាព្រះរាជតំណាងអចិន្ត្រៃរបស់កម្ពុជា​ ចូលរួម​កិច្ច​ប្រ​ជុំបន្ទាន់របស់ក្រុមប្រឹក្សាសន្តិសុខ​អង្គការ​សហប្រជាជាតិ ជុំវិញការឈ្លានពានពីកងទ័ព​ថៃមក​លើ​​​កម្ពុជា។

អ្នកនាំពាក្យក្រសួងការបរទេស លោក ជុំ សន្ទរី បានប្រាប់ឱ្យដឹងថា កិច្ចប្រជុំបន្ទាន់​របស់​ក្រុម​​​ប្រឹក្សា​សន្តិសុខអង្គការសហប្រជាជាតិនឹងត្រូវរៀបចំឡើងនៅវេលាម៉ោង ៣ រសៀល ថ្ងៃទី ២៥ ​ខែកក្កដា ម៉ោងនៅរដ្ឋធានីញូយ៉ក សហរដ្ឋអាមេរិក តាមសំណើរបស់សម្ដេច ហ៊ុន ម៉ាណែត នាយករដ្ឋ​មន្ត្រី​កម្ពុជា​ ដើម្បីបញ្ឈប់ការឈ្លានពានរបស់ថៃ។

លោក ជុំ សន្ទរី បញ្ជាក់ថា៖ «តាមសំណើរបស់សម្ដេចនាយករដ្ឋមន្ត្រី ប្រធានក្រុមប្រឹក្សា​សន្តិ​សុខអង្គការប្រជាជាតិ បានសម្រេចកោះប្រជុំជាបន្ទាន់នៅម៉ោង ៣ រសៀលល្ងាចថ្ងៃទី ២៥ នៅរដ្ឋធានីញូយ៉ក ត្រូវនឹងម៉ោង ២ ភ្លឺ ថ្ងៃ ២៦ នៅកម្ពុជា»។

លោក ជុំ សន្ទរី បញ្ជាក់ថា ដោយសារពេលវេលាលឿនរហ័សពេក ឧបនាយករដ្ឋមន្ត្រី ប្រាក់ សុខុន មិនអាចចូលរួមបានក៏បានចាត់តំណាងឱ្យឯកអគ្គរាជទូត និងជាព្រះរាជតំណាង​អចិន្ត្រៃ​របស់កម្ពុជានៅអង្គការសហប្រជាជាតិចូលរួមថ្លែងបទអន្តរាគមន៍។

នៅថ្ងៃទី ២៤ ខែកក្កដា ឆ្នាំ ២០២៥ សម្ដេច ហ៊ុន ម៉ាណែត បានផ្ញើលិខិតទៅកាន់ប្រធាន​ក្រុមប្រឹក្សា​សន្ដិសុខអង្គការ​សហប្រជាជាតិឱ្យបើកកិច្ចប្រជុំជាបន្ទាន់ បន្ទាប់ពីមានការផ្ទុះ​អាវុធ​រវាងកងទ័ពកម្ពុជា-ថៃ នៅព្រំដែនកម្ពុជា ដោយសម្ដេច​បានស្នើទៅប្រធានប្ដូរវេនក្រុម​ប្រឹក្សាសន្ដិ​សុខអង្គការសហប្រជាជាតិលោក អាស៊ីម អ៊ីហ្វធីហ្កា អាហ្វមាដ (Asim Iftikhar Ahmad) ឱ្យបើកកិច្ចប្រជុំបន្ទាន់មួយក្នុងចំណោមសមាជិកក្រុមប្រឹក្សាសន្ដិសុខ ដើម្បីដាក់សម្ពាធលើ​ប្រទេស​​ថៃ​បញ្ឈប់សកម្មភាពឈ្លានពានលើទឹកដីកម្ពុជា៕

អត្ថបទ៖ ឡេង ដេត