ព័ត៌មានជាតិ

ពលរដ្ឋខ្មែររាប់ពាន់នាក់នៅថៃ សម្រុកចូលស្រុកវិញតាមច្រកបានឡែម

បានផុស

៤៣ វិនាទី មុន

នៅ

ថ្ងៃសុក្រ ២៥ កក្កដា ២០២៥

ដោយ

កាសែតបាងកកប៉ុស្តិ៍របស់ថៃបានរាយការណ៍ថា ប្រជាជនកម្ពុជានៅថៃជាង ២ ០០០ នាក់ បានវិលត្រឡប់មកកម្ពុជាវិញនាព្រឹកថ្ងៃសុក្រនេះ តាមច្រកបានឡែម-កំរៀង បាត់ដំបង ក្រោយជម្លោះប្រដាប់អាវុធតាមព្រំដែនកម្ពុជាផ្ទុះឡើងក្រោមការវាយប្រហារឈ្លានពានរបស់ថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេបញ្ជាការរងនៃបញ្ជាការដ្ឋានការពារព្រំដែនចន្ទបុរី-ត្រាត លោក Charamphakorn Promphakorn បានចេញសេចក្តីណែនាំពិសេសមួយ ដើម្បីជួយសម្រួលដល់ការធ្វើដំណើរប្រកបដោយសុវត្ថិភាព និងសណ្តាប់ធ្នាប់ ទាំងជនជាតិថៃ និងកម្ពុជា ដែលចង់ត្រឡប់ទៅឬមកប្រទេសរៀងៗខ្លួន។

លោកបានឱ្យដឹងថា ព្រំដែននឹងបើកចំហរសម្រាប់ការធ្វើមាតុភូមិនិវត្តន៍របស់ប្រជាជងទាំង២ ចន្លោះពីម៉ោង ៩ ព្រឹក ដល់ម៉ោង ៣ រសៀល ចាប់ផ្ដើមពីថ្ងៃព្រហស្បតិ៍ម្សិលមិញមក។

ការធ្វើមាតុភូមិនិវត្តន៍របស់ពលរដ្ឋខ្មែររាប់ពាន់នាក់នៅពេលនេះ ធ្វើឡើងក្រោយយោធាថៃបើកការវាយប្រហារលើកម្ពុជា ដោយបង្កជាជម្លោះប្រដាប់អាវុធចុងក្រោយឡើង។

គួររំឭកថា ដោយសារតែភាពតានពាក់ព័ន្ធតឹងព្រំដែន កន្លងមកកម្ពុជាបានអំពាវនាវឱ្យប្រជាជនខ្មែរ រួមទាំងពលករចំណាកស្រុក ត្រឡប់ចូលស្រុកវិញ ដើម្បីបញ្ចៀសការធ្វើទុក្ខបុកម្នេញក្នុងប្រទេសថៃ។ ជាថ្នូរនឹងនោះ រដ្ឋាភិបាលបានសម្របសម្រួលការស្វែងរកការងារ និងផ្ដល់ដំណោះស្រាយមួយចំនួនទាក់ទងនឹងបញ្ហាបំណុលធនាគារជាដើម។

ការធ្វើមាតុភូមិនិវត្តន៍ពេលនេះផងដែរ ក៏កើតឡើងក្រោយមានរបាយការណ៍ផ្សេងៗគ្នាថា ជនជាតិខ្មែរក្នុងប្រទេសថៃបានរងនូវអំពើហិង្សាផ្លូវកាយពីក្រុមជាតិនិយមជ្រុលថៃ រងការបៀតបៀនផ្សេងៗ និងការរើសអើងជាដើម។ ការណ៍នេះបង្កក្ដីបារម្ភពីពលរដ្ឋកម្ពុជាជាច្រើនដែលរស់នៅក្នុងប្រទេសថៃ ដោយខ្លាចថា ពួកគេអាចក្លាយជាជនរងគ្រោះនៃនិន្នាការស្អប់ជាតិសាសន៍ប្រឆាំងជនជាតិខ្មែរនៅថៃ ដោយសារតែជម្លោះប្រដាប់អាវុធចុងក្រោយនេះ៕