ចិន ជួបគ្រោះធម្មជាតិពីរដំណាលគ្នា ក្នុងពេលតែមួយ

ប្រទេសចិនឯណោះក៏កំពុងទទួលរងការវាយប្រហារពីគ្រោះធម្មជាតិដែរ ដោយក្នុងពេលដំណាលគ្នា ចិនជួបទាំងទឹកជំនន់ផង និងរលកកម្តៅផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅទីក្រុង Chongqing ភាគនិរតី រលកកម្តៅកំពុងតែវាយប្រហារ ដោយសីតុណ្ហភាពបានឡើងខ្ពស់ផុត៤០អង្សារសេ​ ធ្វើឲ្យពលរដ្ឋមួយចំនួន ត្រូវបង្ខំចិត្តសំងំក្នុងផ្ទះមិនហ៊ានចេញក្រៅពេលថ្ងៃត្រង់។

ដោយសារតែសីតុណ្ហភាពហក់ឡើងខ្លាំងនៅតំបន់មួយចំនួននៃប្រទេសចិន វាធ្វើឲ្យបណ្តាញអគ្គិសនីរបស់ខ្លួនកាន់តែយ៉ាប់យ៉ឺន ចំពេលតម្រូវការឈានដល់កម្រិតខ្ពស់ ពោលគឺលើសពី១.៥ពាន់លានគីឡូវ៉ាត់ឯណោះ។

ជុំវិញបញ្ហាអាកាសធាតុក្តៅនេះដែរ ទីក្រុង Chongqing បានដំឡើងការព្រមានអំពីរលកកម្តៅរបស់ខ្លួនដល់កម្រិតខ្ពស់បំផុត ដែលជាការប្រកាសអាសន្នពណ៌ក្រហម ដោយ២១ស្រុកក្នុងចំណោម៣៨ បានព្យាករថា សីតុណ្ហភាពនឹងឡើងដល់៤៣អង្សាសេ ឬឈានដល់៤៤អង្សាសេនៅថ្ងៃអាទិត្យ។

ចំណែកនៅទីក្រុងប៉េកាំងវិញ ព្យុះភ្លៀងដ៏ខ្លាំងបង្កជាទឹកជំនន់ បណ្តាលឲ្យមនុស្សរាប់សិបនាក់ស្លាប់ និងច្រើននាក់ទៀតបាត់ខ្លួន។

តាមរបាយការណ៍បឋម មនុស្សជាង៦០នាក់បានបាត់បង់ជីវិត ខណៈពលរដ្ឋជាង ៣០០ ០០០នាក់រងផលប៉ះពាល់ និងផ្ទះចំនួន ២៤ ០០០ ខ្នងរងការខូចខាត។

ក្នុង​ចំណោម​អ្នក​ស្លាប់​មាន​មនុស្ស​ចាស់​ចំនួន ៣១​នាក់​នៅ​មណ្ឌល​ថែទាំ​មួយ​ក្នុង​សង្គាត់ Miyun។ អ្នកបាត់ខ្លួនរួមមានមន្ត្រីក្នុងតំបន់ចំនួនបួននាក់ដែលចូលរួមក្នុងកិច្ចខិតខំប្រឹងប្រែងជួយសង្គ្រោះ។

សូមជម្រាបថា ភ្លៀងធ្លាក់ខ្លាំងចាប់ផ្ដើមតាំងពីថ្ងៃទី២៣ដល់២៩ខែកក្កដា បង្កឲ្យមានទឹកជំនន់ភ្លាមៗ ជាពិសេសនៅតំបន់ភ្នំភាគខាងជើងដូចជា Miyun និង Huairou។

ទន្ទឹមនោះ ទំបន់ Miyun បានប្រឈមនឹងសម្ពាធទឹកដែលមិនធ្លាប់មានពីមុនមក ដោយទទួលបានទឹក ៩១០ លានម៉ែត្រគូបក្នុងរយៈពេល ៧ ថ្ងៃ បំបែកកំណត់ត្រា៥០ ឆ្នាំ៕

អត្ថបទ៖ សុខ សុវណ្ណ

ចុចអាន៖ ទឹកជំនន់នៅទីក្រុងប៉េកាំងប្រទេសចិន សម្លាប់មនុស្ស ៤៤ នាក់ និងបាត់ខ្លួន ៩ នាក់