ត្រាំ-ពូទីន អាចជួបប្រជុំទល់មុខគ្នា នៅសប្តាហ៍ក្រោយ

យោងតាមសេតវិមាននៅថ្ងៃព្រហស្បតិ៍ទី៧ខែសីហាឆ្នាំ២០២៥, ប្រធានាធិបតីអាមេរិក ដូណាល់ ត្រាំ អាចនឹងជួបប្រជុំដោយផ្ទាល់ជាមួយមេដឹកនាំរុស្ស៊ី វ្ល៉ាឌីមៀរ ពូទីន នៅដើមសប្តាហ៍ក្រោយ ដើម្បីជជែកគ្នាអំពីបទឈប់បាញ់ ឈានដល់ការបញ្ចប់សង្គ្រាម អ៊ុយក្រែនតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ មន្ត្រីអាមេរិកមិនទាន់កំណត់ទីតាំងនៃជំនួបមួយដែលនឹងក្លាយជាកិច្ចប្រជុំទល់មុខលើកដំបូងរវាងប្រធានាធិបតីកាន់តំណែងរបស់ប្រទេសទាំងពីរ ចាប់តាំងពី ចូ បៃដិន និងពូទីន ជួបគ្នានៅទីក្រុងហ្ស៊ឺណែវ ប្រទេសស្វីស កាលពីខែមិថុនាឆ្នាំ២០២១ នៅឡើយទេ។

ទោះបែបនេះ ក៏មន្ត្រីអាមេរិកបានប្រាប់ទៅ CNN ដែរថា នៅមានឧបសគ្គជាច្រើនដែលត្រូវជម្នះ មុននឹងជំនួបនេះអាចកើតឡើងបាន។ មន្ត្រីអាមេរិកក៏បញ្ជាក់ដែរថា ប្រសិនបើជំនួបកើតឡើងមែន លោក ត្រាំ នឹងជួបលោក ពូទីន មុន ហើយបន្ទាប់មកនឹងជួបត្រីភាគីជាមួយប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី ផងដែរ។

រឿងនេះកើតឡើងចំថ្ងៃតែមួយដែលបេសកជនពិសេសអាមេរិក Steve Witkoff ទៅ​ដល់ទីក្រុងមូស្គូ​ សម្រាប់ដំណើរទស្សនកិច្ច ដើម្បីជំរុញផ្នែកការទូត ក្នុងគោលបំណងបញ្ចប់សង្រ្គាម​អាយុកាល​ជាង​៣​ឆ្នាំ ខណៈលោកត្រាំ ក៏សរសើរដំណើរទស្សនកិច្ចនេះផងដែរថា ទទួលបានលទ្ធផលគាប់ប្រសើរ។

លោក Witkoff បានជួបជាមួយមេដឹកនាំរុស្ស៊ីក្នុងអំឡុងពេលទស្សនកិច្ចនោះ ប៉ុន្តែ​ព័ត៌មាន​លម្អិត ​មិន​ត្រូវ​បាន​គេ​ផ្សព្វផ្សាយ​ជា​សាធារណៈ​ទេ។

សូមជម្រាបជាថ្មី លោក ត្រាំ បានប្តេជ្ញាដាក់ទណ្ឌកម្មថ្មីលើរុស្ស៊ី ប្រសិនបើទីក្រុងមូស្គូមិនបំពេញតាមកាលកំណត់បទឈប់បាញ់។ ទណ្ឌកម្មនេះ ត្រូវបានគេរំពឹងថានឹងរួមបញ្ចូលការយកពន្ធធ្ងន់ទៅលើប្រទេសដែលបន្តទិញប្រេងពីរុស្ស៊ី ជាពិសេសឥណ្ឌា និងចិន ក៏ដូចជាការរឹតបន្តឹងសក្តានុពលលើការនាំចេញឧស្ម័ន និងអ៊ុយរ៉ាញ៉ូមរបស់រុស្ស៊ីផងដែរ៕

អត្ថបទ៖ សុខ សុវណ្ណ

ចុចអាន៖ បេសកជនអាមេរិក Witkoff ទៅ​ដល់​រុស្ស៊ី សម្រាប់កិច្ចពិភាក្សាមុន​ឱសានវាទរបស់​លោក ត្រាំ