ថៃ រកឃើញមនុស្សស្លាប់ថែមទៀត ក្នុងហេតុការណ៍បាក់ដីភ្នំ 

សពមនុស្សចំនួន៣នាក់ទៀតហើយ ត្រូវបានរកឃើញក្នុងហេតុការណ៍បាក់ដី នៅខេត្ត ឈៀងម៉ៃ ខណៈ៦នាក់បន្តបាត់ខ្លួននិង១៥នាក់ រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, គ្រោះធម្មជាតិបាក់ដីភ្នំដ៏រន្ធត់នេះ បានកើតឡើងនាវេលាម៉ោង២:៥០នាទីរំលងអធ្រាត្រឈានចូលថ្ងៃពុធទី២៧ខែសីហាឆ្នាំ២០២៥ ក្នុងភូមិ Pang Ung ឃុំ Mae Suek ស្រុក Mae Chaem។

ឥទ្ធិពលនៃព្យុះ Kajiki បានបង្កឲ្យមានភ្លៀងធ្លាក់ខ្លាំង បាក់ដីភ្នំសង្កត់លើផ្ទះពលរដ្ឋ បំផ្លិចបំផ្លាញយានយន្ត សំណង់ហេដ្ឋារចនាសម្ព័ន្ធនានា។

ស្របពេលជាមួយគ្នានោះ អាជ្ញាធរបានព្រមានឲ្យពលរដ្ឋនៅតាមតំបន់ងាយរងគ្រោះ ត្រូវជម្លៀសចេញជាបន្ទាន់ ព្រោះតែហានិភ័យបាក់ដីភ្នំជាបន្តទៀត។

ព្យុះ Kajiki បានវាយប្រហារខេត្តចំនួន៥៨ នៅភាគខាងជើង ឦសាន កណ្តាល និងខាងត្បូងប្រទេសថៃ បណ្តាលឲ្យមានភ្លៀងធ្លាក់ខ្លាំង បង្កជាទឹកជំនន់ បំណាក់ដី និងបាតុភូតរន្ទះបាញ់។ 

នៅខេត្ត Loei ជាប់ទល់ដែនឡាវ, ព្យុះ Takiji បានបង្កជាទឹកជំនន់ ជន់លិចធ្ងន់ធ្ងរ ខណៈទឹកទន្លេ Man និង Hueang ហក់ឡើងខ្ពស់ ធ្វើឲ្យពលរដ្ឋរស់នៅសហគមន៍តាមដងទន្លេត្រូវជម្លៀសទៅកាន់ទីទួលសុវត្ថិភាព។

តំបន់ដែលរងគ្រោះខ្លាំងបំផុតគឺស្រុក Na Haeo និង Dan Sai ដោយនៅទីនោះតំបន់ខ្លះត្រូវទឹកជន់លិច ជម្រៅត្រឹមចង្កេះ កាត់ផ្តាច់ផ្លូវ រំខានដល់ការធ្វើដំណើរនិងដឹកជញ្ជូន។ រីឯនៅខេត្ត Mae Hong Son ជាប់ទល់ដែនមីយ៉ាន់ម៉ាឯណោះ, ភ្លៀងធ្លាក់យ៉ាងគំហុក ក៏បង្កជាជំនន់ផងដែរក្នុងតំបន់មួយចំនួនដោយជន់លិចដីស្រែចម្ការ ថែមទាំងកាត់ផ្តាច់ផ្លូវធ្វើដំណើរទៀតផង៕

អត្ថបទ៖ សុខ​ សុវណ្ណ

ចុចអាន៖ ស្លាប់​១០​នាក់ ទាំង​នៅ​ថៃ និង​វៀតណាម ​​ដោយសារ​ខ្យល់ព្យុះ​បង្ក​ជា​ទឹកជំនន់ និងបំណាក់ដី