កូរ៉េខាងត្បូង អាមេរិក និងជប៉ុន ធ្វើសមយុទ្ធរួមគ្នាជាថ្មី ត្រៀមទប់ទល់ កូរ៉េខាងជើង

យោងតាមអ្នកនាំពាក្យយោធាបាននិយាយថា ប្រទេសកូរ៉េខាងត្បូង សហរដ្ឋអាមេរិក និងជប៉ុន បានចាប់ផ្តើមសមយុទ្ធត្រីភាគី នៅថ្ងៃទី១៥ ខែកញ្ញា ដែលជាការបន្តកិច្ចខិតខំប្រឹងប្រែងរបស់ពួកគេ ក្នុងការធ្វើឲ្យស៊ីជម្រៅនូវកិច្ចសហប្រតិបត្តិការសន្តិសុខបីផ្លូវ ពោលគឺប្រឆាំងនឹងការគំរាមកំហែងនុយក្លេអ៊ែរ និងមីស៊ីលនៃផ្នែកយោធារបស់កូរ៉េខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចុះផ្សាយដោយសារព័ត៌មាន KJD បានបញ្ចាក់ឲ្យដឹងថា សមយុទ្ធមួយនេះហៅថា « Freedom Edge» ដែលមានរយៈពេល៥ថ្ងៃ និងបានដំណើរការនៅក្នុងដែនទឹកអន្តរជាតិភាគខាងកើត និងខាងត្បូងនៃកោះជេជូ នៃប្រទេសកូរ៉េខាងត្បូង ដែលដំណើរការចាប់ពីថ្ងៃទី ១៥ ដល់ថ្ងៃទី១៩ ខែកញ្ញា។

សមយុទ្ធដែលកំពុងបន្តគឺជាជុំទីបីនៃសមយុទ្ធត្រីភាគី បន្ទាប់ពីជុំមុននៃសមយុទ្ធដែលបានធ្វើឡើងនៅក្នុងខែមិថុនា និងខែវិច្ឆិកាឆ្នាំមុនរៀងៗខ្លួន។ នេះក៏​ជា​សមយុទ្ធ​លើក​ដំបូង​ដែល​ត្រូវ​បាន​ធ្វើ​ឡើង ​ចាប់​តាំង​ពី​​ប្រធានាធិបតី Lee Jae Myung និង​ប្រធានាធិបតី​អាមេរិក ដូណាល់ ត្រាំ ឡើង​កាន់​តំណែងផងដែរ។

នៅមុននេះបន្តិចយោធាបាននិយាយថា ប្រទេសទាំងបីនឹងមានបំណងបង្កើនកិច្ចសហប្រតិបត្តិការរបស់ពួកគេ ដើម្បីរក្សាកិច្ចសហប្រតិបត្តិការត្រីភាគី រឹងមាំ និងស្ថិរភាព តាមរយៈសមយុទ្ធនេះ។

ដោយឡែក បញ្ជាការដ្ឋានឥណ្ឌូប៉ាស៊ីហ្វិករបស់សហរដ្ឋអាមេរិកបាននិយាយថា សមយុទ្ធនេះ បង្ហាញពីការប្តេជ្ញាចិត្តរួមគ្នារបស់ប្រទេសនានាក្នុងការសម្រេចបានជារួម និងរក្សាសន្តិភាពនៅក្នុងតំបន់អាស៊ីប៉ាស៊ីហ្វិក។ ជាពិសេស វានឹងបង្ហាញពីការហ្វឹកហ្វឺនក្នុងគោលបំណងពង្រឹងសមត្ថភាពការពារមីស៊ីលផ្លោង ក៏ដូចជាសមយុទ្ធការពារដែនអាកាស ការហ្វឹកហ្វឺនជម្លៀសវេជ្ជសាស្រ្ត និងការបណ្តុះបណ្តាលប្រតិបត្តិការរារាំងដែនសមុទ្រ។

ទន្ទឹមនឹងសមយុទ្ធ Freedom Edge កូរ៉េខាងត្បូង និងសហរដ្ឋអាមេរិក គ្រោងនឹងធ្វើសមយុទ្ធយោធាមួយទៀត ដែលគេហៅថា «Iron Mace» ចាប់ពីថ្ងៃច័ន្ទដល់ថ្ងៃសុក្រ ដោយផ្តោតលើការរួមបញ្ចូលទ្រព្យសម្បត្តិនុយក្លេអ៊ែររបស់ទីក្រុងវ៉ាស៊ីនតោន និងសមត្ថភាពធម្មតារបស់ទីក្រុងសេអ៊ូល ដើម្បីទប់ស្កាត់ការគំរាមកំហែងរបស់កូរ៉េខាងជើង។

ទោះជាយ៉ាងណាក៏ដោយ ប្រទេសកូរ៉េខាងជើងឯណោះ បានតវ៉ាប្រឆាំងនឹងសមយុទ្ធរួមគ្នាក្នុងចំណោមប្រទេសទាំងបី ដោយព្រមានពីសកម្មភាពយោធាប្រឆាំងនឹងសមយុទ្ធ Freedom Edge ពីមុន ដែលពាក់ព័ន្ធនឹងនាវាផ្ទុកយន្តហោះដើរដោយថាមពលនុយក្លេអ៊ែររបស់សហរដ្ឋអាមេរិក។ បន្ទាប់ពីសមយុទ្ធលើកដំបូងកាលពីខែមិថុនាឆ្នាំមុន កូរ៉េខាងជើងបានរិះគន់សមយុទ្ធនេះថា ជាការប៉ុនប៉ងដើម្បីពង្រឹង ប្លុកយោធាដែលដឹកនាំដោយរដ្ឋអាមេរិក ៕

អត្ថបទ៖ សាង ស្រីល័ក្ខ

ចុចអាន៖នាយក​រដ្ឋមន្ត្រី​ស្ត្រី​​ដំបូង ​នេប៉ាល់ សន្យា​ប្រគល់​អំណាច​ក្នុងពេល​៦​ខែ​ បើរកមេដឹកនាំថ្មីបានភ្លាម