Connect with us

ព័ត៌មានអន្ដរជាតិ

៩ ប្រទេសដែលមិនទាន់មានការឆ្លងកូវីដសូម្បីមួយករណី

បានផុស

នៅ

ជំងឺកូវីដ ១៩ បានសាយភាយពាសពេញពិភពលោកចាប់តាំងពីការផ្ទុះឡើងដំបូងនៅប្រទេសចិននៅចុងឆ្នាំ ២០១៩ ប៉ុន្តែនៅមានប្រទេសមួយចំនួនតូចដែលនៅតែមិនមានករណីឆ្លងជំងឺនេះ ។

គិតមកត្រឹមពេលនេះពិភពលោកមានករណីឆ្លងជំងឺកូវីដ ១៩ ជាង ១៣៤ លានករណី ហើយវាត្រូវបានគេរកឃើញនៅគ្រប់ទ្វីបរួមទាំងអង់តាក់ទិកជាដើម ប៉ុន្តែមានប្រទេសកោះចំនួន ៩ បានការពារ និងទប់ស្កាត់មិនឲ្យឆ្លងជំងឺនេះសូម្បីតែមួយករណី ។

១. ទូវ៉ាលូ (Tuvalu)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូវ៉ាលូជាក្រុមនៃកោះចំនួន ៩ នៅតំបន់ប៉ាស៊ីហ្វិកខាងត្បូងស្ថិតនៅរវាងកោះហាវ៉ៃ និងប្រទេសអូស្ត្រាលី ហើយមានប្រជាជនចំនួន ១១,៦៤៦ នាក់ និងមានផ្ទៃដីត្រឹមតែ ១៦ គីឡូម៉ែត្រក្រឡានៃផ្ទៃដីសរុប ។

ប្រទេសកោះនេះបានបិទព្រំដែនរបស់ខ្លួនយ៉ាងឆាប់រហ័សនៅពេលចាប់ផ្ដើមនៃជំងឺរាតត្បាតសម្រាប់ជនបរទេសទាំងអស់ ហើយបានណែនាំរយៈពេលធ្វើចត្តាឡីស័កផងដែរ ។

២. តុងហ្គា (Tonga)

តុងហ្គាគឺជាប្រទេសប៉ូលីនេស៊ី (Polynesian) និងជាប្រជុំកោះដែលមានកោះចំនួន ១៦៩ តែមានមនុស្សរស់នៅលើកោះតែ ៣៦ ប៉ុណ្ណោះ ។ វាជាប្រទេសមួយក្នុងចំណោមប្រទេសដែលមានប្រជាជនច្រើនជាងគេនៅប៉ាស៊ីហ្វិកដែលមានប្រជាជន ១០៤,៤៩៤ នាក់ ។

ព្រំដែនប្រទេសតុងហ្គាត្រូវបានបិទសម្រាប់ការចូលមកដល់របស់ជនបរទេសទាំងអស់ ប៉ុន្តែមានករណីលើកលែង ប្រសិនបើមានការអនុញ្ញាតពីអាជ្ញាធររដ្ឋាភិបាលដែលពាក់ព័ន្ធ ហើយព្រះរាជាណាចក្រនេះបានដាក់បម្រាមគោចរពេលយប់ចាប់ពីពាក់កណ្តាលអធ្រាត្រដល់ម៉ោង ៥ ព្រឹក ។

៣. តូខេឡៅ (Tokelau)

តូខេឡៅ ជាទឹកដីអាស្រ័យរបស់នូវែលហ្សេឡង់នៅមហាសមុទ្រប៉ាស៊ីហ្វិកភាគខាងត្បូងមានប្រជាជនតាមការប៉ាន់ស្មានត្រឹមតែ ១,៤១១ នាក់ ។

ការរឹតត្បិតតាមព្រំដែនត្រូវបានណែនាំយ៉ាងឆាប់រហ័សដើម្បីទប់ស្កាត់ការរីករាលដាលនៃជំងឺកូវីដ ១៩ ទៅកាន់កោះនេះ ហើយអ្នកដំណើរទាំងអស់ត្រូវឆ្លងកាត់ការត្រួតពិនិត្យសុខភាពនៅកោះ Samoa មុនពេលធ្វើដំណើរទៅ ។

៤. កោះភីតកាន (Pitcairn Islands)

កោះភីតកាន គឺជាក្រុមមួយនៃកោះភ្នំភ្លើងចំនួន ៤ នៅមហាសមុទ្រប៉ាស៊ីហ្វិកភាគខាងត្បូងដែលកើតឡើងពីដែនដីក្រៅប្រទេសអង់គ្លេស (British Overseas Territory) នៅមហាសមុទ្រប៉ាស៊ីហ្វិក ។ ទឹកដីនេះមានបណ្តោយតែ ៣.២១ គីឡូម៉ែត្រ និងទទឹង ១.៦០ គីឡូម៉ែត្រប៉ុណ្ណោះ ។

កោះដែលមានប្រជាជនត្រឹមតែ ៥០ នាក់មួយនេះបាននិយាយថា ការរឹតបន្តឹងការធ្វើដំណើរនឹងនៅតែមានរហូតដល់យ៉ាងហោចណាស់ខែមីនា ឆ្នាំ ២០២២ ។

៥. កោះ​ខូក (Cook Islands)

កោះខូកមានកោះចំនួន ១៥ នៅមហាសមុទ្រប៉ាស៊ីហ្វិកខាងត្បូង ហើយបានគ្រប់គ្រងជាប្រទេសដោយខ្លួនឯងពីប្រទេសនូវែលហ្សេឡង់ ។

កោះដែលមានប្រជាជនចំនួន ១៧,៤៥៩ នាក់នៅតែមិនមានករណីឆ្លងជំងឺកូវីដ ១៩ បន្ទាប់ពីបានបិទព្រំដែនរបស់ខ្លួនទៅកាន់ពិភពលោក ។

៦. កោះគីរីបាទី (Kiribati)

គីរីបាទីជាប្រទេសកោះឯករាជ្យមួយនៅកណ្តាលមហាសមុទ្រប៉ាស៊ីហ្វិក ។ កោះនេះមានប្រជាជនត្រឹមតែជាង ១១០,០០០ នាក់ដែលច្រើនជាងពាក់កណ្តាលនៃពួកគេរស់នៅលើកោះ Tarawa ។ រដ្ឋនេះមានកោះតូចៗចំនួន ៣២ និងកោះផ្កាថ្មមួយកន្លែងគឺ Banaba ។

ប្រទេសនេះបានចាត់វិធានការយ៉ាងឆាប់រហ័សដើម្បីគ្រប់គ្រងការរីករាលដាលនៃវីរុសដោយបិទរាល់ការធ្វើដំណើរដែលមិនចាំបាច់នៅពាក់កណ្តាលខែមីនា និងអនុវត្តការធ្វើចត្តាឡីស័ករយៈពេល ១៤ ថ្ងៃ ។

៧. កោះណូរូ (Nauru)

កោះណូរូ ដែលមានទីតាំងនៅកោះម៉ាយក្រូណេស៊ី (Micronesia) គឺជាប្រទេសដែលតូចជាងគេលំដាប់ទី ៣ នៅលើពិភពលោកដែលមានប្រជាជន ១២,៧០០ នាក់  ។ គេដឹងថាកោះនេះមានមណ្ឌលឃុំឃាំងជនអន្តោប្រវេសន៍នៅឯនាយឆ្នេរប្រទសអូស្ត្រាលី ។

ប្រទេសនេះបានអនុវត្តការរឹតបន្តឹងជំងឺកូវីដ ១៩ យ៉ាងតឹងរ៉ឹង ។ រដ្ឋាភិបាលបានប្រកាសអាសន្នថ្នាក់ជាតិជាវិធានការណ៍បង្ការ ទោះបីមិនបានកត់ត្រាករណីឆ្លងវីរុសសូម្បីមួយករណីក៏ដោយ ហើយបានផ្អាកការហោះហើរទាំងអស់ទៅកាន់ប្រទេសនេះ ។

ប្រទេសនេះក៏បានណែនាំការធ្វើចត្តាឡីស័ករយៈពេល ១៤ ថ្ងៃសម្រាប់ការមកដល់របស់ភ្ញៀវទេសចរទាំងអស់ ។

៨. កោះណៀ (Niue)

កោះណៀ ជាកោះផ្កាថ្មមួយនៅតំបន់ប៉ាស៊ីហ្វិកខាងត្បូងមានទំហំ ១ ភាគ ៦ នៃទំហំទីក្រុងឡុងដ៍ ។ វាជារដ្ឋគ្រប់គ្រងដោយខ្លួនឯងជាមួយប្រទេសនូវែលហ្សេឡង់ ។

កោះណៀមានចំនួនប្រជាជនតែ ១,៧០០ នាក់ប៉ុណ្ណោះរស់នៅលើកោះនេះ ខណៈមនុស្សជាង ៣០,០០០ នាក់ ឬជាង ៩៥ ភាគរយនៃប្រជាជនរបស់ខ្លួនរស់នៅក្នុងប្រទេសនូវែលហ្សេឡង់ដែលពួកគេមានសិទ្ធិជាពលរដ្ឋ ។

កោះណៀបានអនុវត្តការរឹតត្បិតការធ្វើដំណើរយ៉ាងខ្លាំង នៅពេលចាប់ផ្តើមរោគរាតត្បាត ខណៈដែលឥឡូវនេះកំពុងចាប់ផ្តើមបន្ថូរបន្ថយ បន្ទាប់ពីរដ្ឋាភិបាលបានយល់ព្រមបង្កើនចំនួនអ្នកដំណើរដែលធ្វើដំណើរមកពីប្រទេសនូវែលហ្សេឡង់ ។

៩. កោះប៉ាឡៅ (Palau)

កោះប៉ាឡៅដែលជាប្រជុំកោះមានកោះជាង ៥០០ នៅមហាសមុទ្រប៉ាស៊ីហ្វិកខាងលិចមានចំនួនប្រជាជនប្រហែល ១៨,០០០ នាក់ ។ កាលពីពេលថ្មីៗនេះប្រទេសនេះបានទទួលការដឹកជញ្ជូនវ៉ាក់សាំងលើកដំបូងរបស់ខ្លួនពីក្រុមហ៊ុនឱសថរបស់អាមេរិកឈ្មោះ Moderna ។

ក្រុមមន្រ្តីកោះប៉ាឡៅមានគោលបំណងចាក់វ៉ា់ក់សាំងនៅទូទាំងប្រទេសនៅត្រឹមខែមេសា ប៉ុន្តែពួកគេនិយាយថា កាលបរិច្ឆេទអាចនឹងត្រូវពន្យារពេលដោយសារតែការរង់ចាំក្នុងការបែងចែកដូស ។ រហូតមកដល់ពេលនេះកោះប៉ាឡៅមិនបានកត់ត្រាករណីឆ្លង ឬការស្លាប់ដោយសារជំងឺកូវីដ ១៩ សូម្បីតែមួយករណី ៕

ប្រែសម្រួលដោយ ៖ ជីវ័ន្ត

ប្រភព ៖ Daily Mail

ចុចអាន ៖ ប្រទេសមួយចំនួនដាក់កំហិតប្រើប្រាស់វ៉ាក់សាំង AstraZeneca ក្រោយមានករណីកកឈាមដ៏កម្រ

ចុចអាន ៖ គួរដឹងឲ្យហើយ! វ៉ាក់សាំងកូវីដដូសទី២ មានប្រតិកម្មខ្លាំងជាងដូសទី១ទៅទៀត

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម