ព័ត៌មានអន្ដរជាតិ

រដ្ឋាភិបាលជប៉ុនបញ្ជាក់ជំហរថាជប៉ុនដាច់ខាតមិនបង្កើតអាវុធនុយក្លេអ៊ែរទេ

បានផុស

៧ ខែ មុន

នៅ

ថ្ងៃសៅរ៍ ២០ ធ្នូ ២០២៥

ដោយ

រដ្ឋាភិបាលជប៉ុន បានបញ្ជាក់ថា រាប់ទសវត្សរ៍មកហើយ ប្រទេសជប៉ុនមិនមានអាវុធនុយក្លេអ៊ែរនោះទេ ដោយបដិសេធការចេញផ្សាយនាពេលថ្មីៗនេះ ដែលថា៖«មានមន្ត្រីជាន់ខ្ពស់ក្នុងជួររដ្ឋាភិបាលម្នាក់» បានស្នើឱ្យប្រទេសនេះគួរតែពិចារណាបង្កើតអាវុធមហាប្រល័យនេះដើម្បីការពារខ្លួន ស្របពេលដែលពិភពលោកកំពុងញាំញីដោយសង្គ្រាម។

នាយករដ្ឋមន្ត្រី លោកស្រី Sanae Takaichi ថ្លែងក្នុងសន្និសីទកាសែតមួយ។ JAPAN FORWARD

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីដែលមិនបញ្ចេញឈ្មោះនិយាយថា ជប៉ុនគួរតែមានអាវុធនុយក្លេអ៊ែរ ព្រោះតែស្ថានភាពសន្តិសុខពិភពលោកកាន់តែអាក្រក់ ប៉ុន្តែលោកក៏បានទទួលស្គាល់ថា ចំណាត់ការដែលខ្លួនបានលើកឡើងក៏មានផលវិបាកខាងនយោបាយផងដែរ។ ទូរទស្សន៍រដ្ឋ NHK និងប្រព័ន្ធផ្សព្វផ្សាយផ្សេងទៀតបានរាយការណ៍ថាមន្ត្រីដែលបានលើកឡើងនេះ គឺមកពីអង្គភាពរបស់នាយករដ្ឋមន្ត្រី លោកស្រី Sanae Takaichi ។

ចំណែកនៅឯសន្និសីទសារព័ត៌មានដែលធ្វើឡើងជាប្រចាំនៅទីក្រុងតូក្យូ ប្រធានខុទ្ទកាល័យនាយករដ្ឋមន្ត្រី លោក Minoru Kihara បាននិយាយថា គោលនយោបាយគ្មាននុយក្លេអ៊ែរទាំងបីរបស់ប្រទេសជប៉ុនគ្មានការផ្លាស់ប្តូរទេ។ លោកក៏បានបដិសេធមិនធ្វើអត្ថាធិប្បាយលើការលើកឡើង ឬមិននិយាយថាតើបុគ្គលមន្រី្តរូបនោះនឹងបន្តនៅក្នុងមុខតំណែងណាមួយ ចំពេលមានការអំពាវនាវពីមេដឹកនាំគណបក្សប្រឆាំងឱ្យដកមន្ត្រីរូបនោះចេញ។

គួរឱ្យដឹងផងដែរថា ប្រទេសជប៉ុនមានការរីកចម្រើនផ្នែកនយោបាយ និងការបញ្ចេញមតិជាសាធារណៈកាន់តែច្រើនឡើង ក្នុងការបន្ធូរបន្ថយគោលការណ៍មិនឲ្យមានអាវុធនុយក្លេអ៊ែរចំនួនបីរបស់ខ្លួន រួមមាន មិនឱ្យកាន់កាប់ មិនផលិត និងមិនអនុញ្ញាតឱ្យអាវុធនុយក្លេអ៊ែរចូលក្នុងទឹកដីរបស់ខ្លួន។

ខណៈដែលអាវុធនុយក្លេអ៊ែរនៅតែជាប្រធានបទដ៏រសើបខ្លាំងក្នុងប្រទេសតែមួយគត់ដែលធ្លាប់ទទួលរងគ្រោះពីការទម្លាក់គ្រាប់បែកបរមាណូ ជាពិសេសប្រទេសនេះនៅតែមានមន្ទិលសង្ស័យ ពីការធានាសន្តិសុខនានាពីសហរដ្ឋអាមេរិកក្រោមការដឹកនាំរបស់ប្រធានាធិបតី លោក Donald Trump និងការគំរាមកំហែងកាន់តែខ្លាំងឡើងពីប្រទេសជិតខាងដែលមានអាវុធនុយក្លេអ៊ែរ ដូចជាចិន រុស្ស៊ី និងកូរ៉េខាងជើង តែងតែលើកយករឿងនេះមកជជែកឥតឈប់៕

អត្ថបទ៖ ណឺ មិនា