អាមេរិក ពិចារណាសំណើរបស់អ៊ុយក្រែន សុំមីស៊ីលរយៈចម្ងាយឆ្ងាយ Tomahawk

ថ្លែងប្រាប់សារព័ត៌មាន Fox News កាលពីថ្ងៃអាទិត្យទី២៨ខែកញ្ញាឆ្នាំ២០២៥ អនុប្រធានាធិបតីអាមេរិក JD Vance បញ្ជាក់ថា សហរដ្ឋអាមេរិកកំពុងពិចារណាសំណើរបស់អ៊ុយក្រែន សុំមីស៊ីលរយៈចម្ងាយឆ្ងាយ Tomahawk យកទៅជួយទីក្រុងកៀវ ប្រយុទ្ធជាមួយកងកម្លាំងរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណើនេះមិនមែនមានន័យថា អាមេរិកជាអ្នកជួយអ៊ុយក្រែនដោយផ្ទាល់នោះទេ ប៉ុន្តែប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានស្នើឲ្យទីក្រុងវ៉ាស៊ីនតោន លក់មីស៊ីលទាំងនេះទៅឲ្យបណ្តាប្រទេសនៅអឺរ៉ុប ដូច្នេះសម្ព័ន្ធមិត្តទាំងនោះ អាចទិញមីស៊ីលយកទៅផ្គត់ផ្គង់ដល់ទីក្រុងកៀវបាន។

តាមសម្តីអនុប្រធានាធិបតីអាមេរិក, លោកព្រមទាំងប្រមុខសេតវិមាន ដូណាល់ ត្រាំ នឹងធ្វើការសម្រេចចិត្តចុងក្រោយលើបញ្ហានេះ។ មីស៊ីល Tomahawk រយៈចម្ងាយ២ ៥០០គីឡូម៉ែត្រនឹងពង្រឹងខែលការពាររបស់អ៊ុយក្រែនប្រឆាំងនឹងការវាយប្រហារយ៉ាងខ្លាំងក្លារបស់រុស្ស៊ី។

រឿងនេះកើតឡើងបន្ទាប់ពី លោក ហ្សេលេនស្គី ព្រមានមន្ត្រីវិមានក្រឹមឡាំងថា ពួកគេគួរតែរៀបចំទប់ទល់​នឹង​ការវាយប្រហារ ប្រសិនបើទីក្រុងមូស្គូមិនព្រមបញ្ចប់សង្គ្រាម ដោយប្រាប់​ថា កងកម្លាំងរបស់លោកបានត្រៀមខ្លួនជាស្រេចដើម្បីកំណត់គោលដៅហេដ្ឋារចនាសម្ព័ន្ធថាមពល និងរោងចក្រសព្វាវុធ ក្រោយ​មាន​ការគាំទ្រយ៉ាងពេញទំហឹង​ពីលោក ត្រាំ។

លោក ហ្សេលេនស្គី និយាយបន្ទាប់ពីថ្លែងសុន្ទរកថានៅក្នុងមហាសន្និបាតអង្គការសហប្រជាជាតិថា ទីក្រុងកៀវ ​នឹងមិនផ្តោតលើជនស៊ីវិលនោះទេ ប៉ុន្តែអាសនៈអំណាចរបស់រុស្ស៊ី រួមទាំងវិមានក្រឹមឡាំង នៅតែជាគោលដៅដ៏​មាន​សក្តានុពល។ អ៊ុយក្រែនមានយន្តហោះគ្មានមនុស្សបើក ដែលអាចចូលទៅជ្រៅក្នុងទឹកដីរុស្ស៊ី ប៉ុន្តែលោក​កំពុងស្វែងរកអាវុធរយៈចម្ងាយឆ្ងាយបន្ថែមពីទីក្រុងវ៉ាស៊ីនតោន ដើម្បីបង្កើនសម្ពាធលើទីក្រុងមូស្គូ៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ផ្ដាំ​រុស្ស៊ីឲ្យត្រៀម​រក​កន្លែង​ពាំង​​គ្រាប់​ ក្រោយត្រាំបើកដៃ​ឲ្យ​វាយប្រហាររយៈចម្ងាយ​ឆ្ងាយ